Read bassa UNDWA TUKWABILANA 13 Bible Online

UNDWA TUKWABILANA 13 - bassa bible

UNDWA TUKWABILANA 13

¹Yaa shɛ bigesere bu ko kwo kaa buwetegeni-ba-awalabụ bu ko, ibi peni useyida kwo kaa ụrụhwajɛ uko,

²yaa shɛ useyida ata kwo kaa ụrụhwajɛ ata bee bi mbishi njɛ ga, yaa shɛ kaa bɛɛ hiɛŋ, Mizha tu 'wa tuwa tu na ebi ge mepi shi la kwukwuŋ, maa tɛ ndanɛ tụ iyi,

³ta shɛlaga n-ndumwa me bigesere kwo kaa buwetegeni ata ba awalabụ o. Iwɛnɛ po AGWANGWAMA na shɛ Agwatana hiŋ ubwa ma hiɛ makana maa mapa okwo hio lubo ga AGWANGWAMA na shɛ Agwatana hiŋ na shɛmɛ shi hiŋ kpaaŋ keeni shihwulu shi hiŋ kpaaŋ.

⁴Na 'wa ma AGWANGWAMA na shɛ Agwatana hiŋ, na tahaŋnụ ti hiŋ tizha maa hi na sụma bụ inyɛsɛ, maa hi untangana onu ubwa tụpana maa du hi hwụjɛ-unu ubwa, hiɛ shɛ hi na zhɛba bụ, maa kaa hi mogwu nu bwa.

⁵Ama kwụna ma bigesere keeni buwetegeni ata ba awalabụ, iwɛnɛ tu boo hi mbisogono maa hiɛ lacɛ AGWANGWAMA na shɛ Agwatana hiŋ na ihi bɛcinjɛ na tijama ta cɛnjɛ ti Ijipti. Bụtụ ata shɛ bụtụ bụ wɛ na ma bụ nda maa genji uhwaŋna na AGWANGWAMA na shɛ Agwatana bụ ibi peni-unu maa zhe tahaŋnụ na amɛ ubwa. Bɛ shɛ ba kwụna bụ, maa na bacɛnga iyi iwɛ na ashashɛ hiŋ.

⁶Okwo yaa shɛ yɛu-bino bu nɛ abụ banɛ amɛ oko nu bwa, kwo kaa yɛu bụ ye eyi, kwo kaa yɛu bụ yo o, kwo kaa biyikwo na obo lubo duwa, kwo kaa biyejilo bu be eligidi, baa bụ halakaka saiŋ saiŋ, bɛɛ hiɛŋ, Hwure ti zhe maa tɛ zhɛbɛ tuwa tu na ahiɛ ga zhɛbɛ shɛ la, hwɛɛ te eshi bu,

⁷ibɛ shɛ tuwa ta atwa na ihi rungwutwonu, okwo oo gwumwongonu, na bụ, kwo kaa aa dụlụmɛ na bụ; te kwuni nu uce unyizo ụzalụ uko i ci uce ụzalụ uyebi,

⁸to lono bu o, ta shɛlaga du kaa iwɛ ubwa o, to hioko kaa du inyɛmɛnyɛmɛ ibwɛ o, ta ima bụ kaa du u'ula o.

⁹Ama kwụna bụ! Ga shɛ u'ala bụ u to bu utayɛ hiiŋ tɛ ɛ zhɛ a kwụna bụ, nazhɛ atwa vwɛ kpaaŋ tegeni bu du atayɛ.

¹⁰Tagana bụ atayɛ maa kwụnɛ bụ, iwɛnɛ ti bee dwelekeci gana na maa ma bụ mba maa genji AGWANGWAMA na shɛ Agwatana bụ na ubu bɛcinjɛ na tijama ta cɛnjɛ ti Ijipti.

¹¹Iwɛ maa atwa kpaaŋ hwụjɛ, maa a njɛ inyɛsɛ, maa kede a njɛ ya iyi tugworozwo gɛnɛ ɛtɛ kwukwuŋ na ashashɛ hiŋ o.

¹²Yaa shɛ abụ namɛ na amɛ ashɛpwụ bụ oko, a na AGWANGWAMA na shɛ Agwatana bụ ibi peni maa gɛga,

¹³abụ hwụjɛ maa bwonu ogworozwo oko tusashɛ beni na shashɛ hiŋ, oo mbo atwa oko na ga jɛjɛ nụ ụshɛpwụ ata, ɛɛ hiɛŋ aŋ, Hwure ti zhe ma maa tɛ zhɛbɛ ma tuwa tu na abụ ta zhɛbɛ shɛ la kwukwuŋ,

¹⁴asha bɛ shɛ bo hwoyigono, maa dwelekeci iwɛ ibɛ tebiye. Yaa shɛ aa njɛ ga iyi-tupwaŋ gɛnɛ ɛtɛ na ashashɛ hiŋ gom,

¹⁵asha i shɛ i tilɛɛ maa kwụnɛ atwa na jɛjɛ nụ ụshɛpwụ ata nu utokwobi, iricingo uŋ hwɛ hwɛɛ, ti iyi elele nɛ namɛ nu bwa, ti iyimabiga.

¹⁶Sotulonu iyi elele nɛ ujasa yɛ nu bwa kpaaŋ ne rishe ru ukpekiti ubwa, maa hwoŋzhinji ụshɛpwụ ata keeni iyi nɛ ujasa yɛ na amɛ ubwa kpaaŋ, gana maa ụrụpɛ wa AGWANGWAMA na shɛ Agwatana bụ obu to. I zhɛ ya sha utukwu unyizo-nom. Kede kaa o mo ya ụshɛpwụ ata sasana o.

¹⁷To lono maa ijɛ ɛtɛ ee peni n-ndumwa-tụwụma, maa i shɛ aa nda ufwu, nama ni i'ɛlɛ bụ okwo ike o, iwɛ maa AGWANGWAMA genji isɛbwɛ ɛtɛ ibwɛ i'wɛtwɛ tɛnda na bụ, maa du hioko inyɛmɛnyɛmɛ bụ, maa ma bụ mapana iwɛ, maa ma bụ kaana ufwugwo tugombo, gana na ti bee shileni la eshi bu unu.

¹⁸Na hwuga-unu wa AGWANGWAMA na shɛ Agwatana bụ, maa untangana kaa andwa ubwa elele na Ngee bi peni-unu wa aba hwayɛ ga, na nda kaa iyi nɛ teni cɛŋ ne eshe AGWANGWAMA na shɛ Agwatana bụ.