Read bassa UNDWA TUKWABILANA 16 Bible Online

UNDWA TUKWABILANA 16 - bassa bible

UNDWA TUKWABILANA 16

¹No shiyono upiana ata Ebib[23] eshe, maa na untanganana AGWANGWAMA na shɛ Agwatana bụ iyimɛyɛ tɛkashɛka tɛnda. Iwɛnɛ po nu upiana ata la Agwatana bụ ubu bɛcinjɛ ni Ijipti na amɛ ụjita.

²Bɛ shɛ ba taga AGWANGWAMA na shɛ Agwatana bụ ụrụpɛ tɛkashɛka na agwụdụ kwo kaa ni inɛ, no ofwo ata bɛɛ zhɛ ba tala maa ga a na zhɛba bụ.

³Bɛ shɛ shɛ ba ya iyimɛyɛ nɛ 'yajɛ ifucinjɛ o. Ijitɛ icenje ɛbi zhɛ ba ya iyimɛyɛ ɛtɛ zasa Ifucingɛ, ibɛ shɛ iyimɛyɛ ụbaụta, iwɛnɛ po ni izɛlɛgwu abụ banɛ la na cɛnjɛ ti Ijipti nụ usumwa, iwɛ maa ne teyinje ụjita ata aka na abụ banɛ la na cɛnjɛ ti Ijipti tutu ukwunanga uraiŋ bụ.

⁴Kede a kwụbɛ Ifucingɛ no ofwo elele na tugwungwu tụ bụ ti teje tutu ijitɛ ɛtɛ icenje o. Kede iyi heleni usunda ata obu to ụrụpɛ nụ ụrụmɛ ụjita ata uhiiŋ tutu uvwungwa o.

⁵Ta kwụna iyi ụrụpɛ tɛkashɛka na amɛ ashɛpwụ elele na AGWANGWAMA na shɛ Agwatana bụ ibi peni o;

⁶ama ga shɛ no ofwo ata AGWANGWAMA na shɛ Agwatana bụ zhɛ a tala maa ga a na zhɛba bụ, apata abɛ shɛ ba kwụna iyi ụrụpɛ tɛkashɛka, nụ ụrụmɛ, tu uwaŋna zhɛ twonuo, na aka gana ata abụ banɛ la ni Ijipti.

⁷Bɛ shɛ bo nyoso uŋ maa yɛ ụŋ no ofwo ata AGWANGWAMA na shɛ Agwatana bụ zhɛ a tala; bɛ shɛ kaa bo gwulo ya nu udulo bu ti iyi heri nu uvwungwa.

⁸Ijitɛ icihiŋ ɛbi zhɛ ba ya iyimɛyɛ ɛtɛ zasa Ifucingɛ; ụjita ucenje ụ shɛ tusotulonu ti ikɛnyi ta AGWANGWAMA na shɛ Agwatana bụ; bɛ shɛ shɛ ba nda ugondu jita ata o.

⁹Rɛta alade ecenje; kwuno alade ata ecenje tɛrɛta te kwuni na aka na ebu kwuni ohiu bu tugwubo hiiŋ.

¹⁰Na untanganana AGWANGWAMA na shɛ Agwatana bụ isene ya alade ata ecenje tɛnda tedure nu upwaŋ u tukwulana tu'waŋnɛ, unaa na ɛbi zhɛ ba pana AGWANGWAMA na shɛ Agwatana bụ nu gana na ti bee bi peni-uwebiye.

¹¹Bwada unyasa na agba AGWANGWAMA na shɛ Agwatana bụ, ta miaụŋ mụ bụ me eyi, ta miaụŋ mụ bụ mo o, ta miaụŋ-mu-ugondu bu me eyi, ta miaụŋ-mu-ugondu bu mo o, ta Bulivai na namɛ na amɛ ashɛpwụ bụ, ta bugaiŋ, te bu'weteji, keeni bululo na namɛ no ofwo bu, no ofwo ata AGWANGWAMA na shɛ Agwatana bụ zhɛ a tala, maa ga a na zhɛba bụ.

¹²Ne teyinje maa bɛ shɛwa la du bujama ni Ijipti. No shiyono onu-tupana ga eshe tebiye maa na nda aŋ.

¹³Na untangana isene yo obodongom tɛnda ijitɛ icenje, na aka na ebi jicinje iyimɛyɛ bụ keeni meni mụ bụ mụ tụ'walụ ta afwafwa.

¹⁴Bwada unyasa ni iyimɛyɛ ɛtɛ bụ isene, ta miaụŋ mụ bụ me eyi, ta miaụŋ mụ bụ mo o, ta miaụŋ-mu-ugondu bu me eyi, ta miaụŋ-mu-ugondu bu mo o, ta Bulivai, ta bugaiŋ, te bu'weteji, to bululo na namɛ na amɛ ashɛpwụ bụ.

¹⁵Iwɛnɛ po ijitɛ icenje ibɛ ɛbi zhɛ ba untaganana AGWANGWAMA na shɛ Agwatana bụ isene ɛtɛ no ofwo ata bɛɛ zhɛ ba tala. Iwɛnɛ po AGWANGWAMA na shɛ Agwatana bụ zhɛ ma bụ pana-uwebiye ni iyi elele nɛ ma bụ 'walana, tu ugondu we elele na namɛ ni i'ɛlɛ bụ, maa i na kaana ugombo, iwɛ maa bweji unyasa ni ibɛ kpaaŋ.

¹⁶Ge etwenyi bụ nɛ mɛmɛ bɛcinjɛ na agba AGWANGWAMA na shɛ Agwatana bụ kpalụ tatụ nu uywa uywa no ofwo ata bɛɛ zhɛ ba tala: na aka isene iyimɛyɛ nɛ zasa Ifucingɛ, ta aka isene ya alade ata ecenje, keeni aka isene yo obodongom. A shɛ shɛ kaa mɛmɛ bɛcinjɛ na agba AGWANGWAMA ni i'ɛlɛ yo ohondo.

¹⁷Bụtụ bụtụ shɛ ba pana gana na ti ikɛnyi ibwɛ ci, nu gana na tu uwebiye nɛ AGWANGWAMA na shɛ Agwatana bụ ibi peni namɛ.

¹⁸Tulogono ajɛmɛ-ụshɛrɛya keeni atwa shihwolu na ashɛpwụ elele na AGWANGWAMA na shɛ Agwatana bụ ibi peni, gana na ta alamụ bụ namanjɛ. Ga a na duma kaa ashɛrɛya atwa ata ne tishiriri.

¹⁹To ubo ụshɛrɛya o; ta zanga kaa atwa o; ta ya ukwuribi ugworo, iwɛnɛ po ukwuribi ugworo wo lubicingo eshe bụtụ na ga incɛ, woo sukwutogo kaa ụshɛrɛya bụtụ bi tiririri.

²⁰Tiririri me tiririri kiri abɛ shɛ bu na 'wa, iwɛ maa yɛ uraiŋ, maa du leshiji cɛnjɛ ta ata AGWANGWAMA na shɛ Agwatana bụ ibi peni.

²¹Ta shɛla itɛtɛnuwɛŋ; ụ'wụ'wụ we elele na shɛ Ashɛra[24] to dongonu utukwu-ụrụpɛ na ebi meni AGWANGWAMA na shɛ Agwatana bụ o.

²²To shikicingo kaa itɛtɛnuwɛŋ utayɛ o, AGWANGWAMA na shɛ Agwatana bụ, o imo iŋ.