Read bassa UNDWA TUKWABILANA 18 Bible Online

UNDWA TUKWABILANA 18 - bassa bible

UNDWA TUKWABILANA 18

¹Onongbo a na shɛ ụlamụ wa Alivai kpaaŋ a zha shɛ a 'yaga urobwo wo ogwu cɛnjɛ na atwa Isrɛl; ama ɛ zhɛ na ya apwaŋ na atwa peni AGWANGWAMA tedure na arụpɛ tuta, inɛ ɛtɛ ibɛ shɛ ogwu aba a na teni cɛŋ.

²A zha shɛ a 'yaga ogwu cɛnjɛ na ashashɛ miaụŋ-mo-bino ma aba o; ama onongbo AGWANGWAMA tɛsha ibɛ shɛ ogwu aba, gana na ti bee shileni aŋ unu.

³Aka elele na atwa to ụrụpɛ na buna kwo kaa nụ ụgwụdụ, ge peni onongbo u'ala keeni shɛpa shi yebi keeni ugbokwo.

⁴Pana bunongbo tụ'walụ ti hiiŋ to ohiu bu, te meni mụ tụ'walụ ta afwafwa bụ, ta manɛbɛ mụ bụ, keeni tuhwaga te tihiŋzhe ti hiiŋ ta agwụdụ bụ.

⁵AGWANGWAMA na shɛ Agwatana bụ ubwa teri bu maa banɛ na alamụ bụ kpaaŋ, maa shikono maa nda ugondu ni izeci ibwɛ, ta miaụŋ mu bwa me eyi unyizo-nom.

⁶Yaa shɛ kaa Bulivai banɛ na ashɛpwụ bụ elele na amɛ Isrɛl kpaaŋ, baa zhajɛ no ofwo tɛzhɛba, yaa dwa bụ kaa eshe maa nda gana na Alivai vwɛ a nda,

⁷asha ga nda ugondu tunongbo ta AGWANGWAMA na shɛ Agwatana ubwa, gana na Alivai ubwa a na vwɛ kpaaŋ a na shikeni a nda ugondu nu umbe AGWANGWAMA apata a nda.

⁸A shɛ a 'yaga urobwo iyimɛyɛ ya aba ta nangwụ, medenji ukwuribi iyi bishi bwa nɛ bee senji.

⁹Aka na ebi ci hwuŋ cɛnjɛ ta ata AGWANGWAMA na shɛ Agwatana bụ zhɛ ma bụ pana, to soso maa na 'wa iyi-tupwaŋ nɛ edenji ata a nda o.

¹⁰Kede a kwụbɛ bụtụ be elele na ashashɛ hiŋ na bo hwoŋzhingo yɛu ibwɛ ye eyi okwo yɛu ibwɛ yo o nụ ụrụpɛ o. Kede a kwụbɛ kaa bụtụ be elele na ba shɛga ụshɛga, okwo bụkwụbɛ-be-meni, okwo bɛnjɛ-bi-inibi, kwo kaa buwa o,

¹¹okwo bɛnjɛ-bi-ijile, okwo bɛnjɛ-bo-orizhonu, okwo bukwupenyi, kwo kaa bizhikwoto.

¹²Iwɛnɛ po bụtụ be elele na ba nda ijɛ kpaaŋ, bɛ shanɛ AGWANGWAMA iyi-tupwaŋ; iwɛ iyi-tupwaŋ tu ga tundangana kaa upo AGWANGWAMA na shɛ Agwatana bụ mo bu unzongo aŋ maa e beni nu umbe bu.

¹³Bɛ shɛ ba nama shɛshɛshɛ nu umbe AGWANGWAMA na shɛ Agwatana bụ.

¹⁴Edenji ata ɛbi zhɛ ba lashɛga cɛnjɛ ta aba, e shileni akwụbɛ-meni keeni ashɛjɛ acɛbɛ; ama yaa shɛ gabụ, AGWANGWAMA na shɛ Agwatana bụ ibi leneni shi maa njɛ gana ata o.

¹⁵AGWANGWAMA na shɛ Agwatana bụ zhɛ ma bụ panɛ bigesere gana mi, na ashashɛ hiŋ, na zhɛ ba banɛ na miaụŋ-mo-bino bu, ubwa ɛbi zhɛ bu na hwuga iwɛ ubwa.

¹⁶Nu gana na ta abụ lụpɛ la AGWANGWAMA na shɛ Agwatana bụ ni Ishɛmɛ Horɛb nụ ụjita tu'ulwa ta ata la, aka na ɛbi hiɛŋ, Kede AGWANGWAMA na shɛ Agwatana bụ jɛmɛ ya iwɛ na bụ o, kwo kaa kede kwụbɛ ya ulwa ga ụ'wụtụ kwukwuŋ o, shibwonu N zhɛ mo 'wo.

¹⁷Ibɛ po AGWANGWAMA n hiɛŋ, E teni kaa cɛŋ ni iyi elele nɛ aa jɛmɛ kpaaŋ.

¹⁸N zhɛ ma pana aŋ bigesere na shɛ gana bụ na zhɛ ba banɛ na ashashɛ miaụŋ-mo-bino ma aba. N zhɛ kaa mu no mbiso bu iyi nɛ bɛɛ zhɛ na duma, bi zhɛ kaa no mbiso aŋ iyi elele nɛ Ngee peni bu unu ibɛ kpaaŋ.

¹⁹Bụtụ be elele na kaa zha shɛ ba shɛlaga n-ndumwa mu na bɛɛ zhɛ ba duma ni izeci mi, N zhɛ ma pana bụtụ ata ulwapɛ ni ikɛnyi mi.

²⁰Ama bigesere na kaa zhɛ ba kara maa duma n-ndumwa ni izeci mi munaa na Ngee peni shi bu unu maa ga duma, kwo kaa bunaa na jɛmɛ iwɛ ni izeci tuwa tu ko, a shɛ a kwụna bigesere ata gbaa.

²¹Yaa shɛ kaa abɛ jɛmɛ na amɛ bụ ɛbi hiɛŋ, Gana na ɛti zhɛ ta mapa n-ndumwa mu na AGWANGWAMA jɛmɛ shɛɛ?

²²Aka na bigesere jɛmɛ iwɛ ni izeci ya AGWANGWAMA, yaa shɛ n-ndumwa ma ata mi sɛ su, kwo kaa ijɛ ɛtɛ njɛ shɛ, asha shɛ AGWANGWAMA jɛmɛ n-ndumwa ma ata o. Bigesere ata jɛmɛ n-ndumwa nụ ụhwada ukɛnyi ibwɛ, ta nda ma kaa inyɛsɛ ibwɛ o.