Read bassa UNDWA TUKWABILANA 21 Bible Online

UNDWA TUKWABILANA 21 - bassa bible

UNDWA TUKWABILANA 21

¹Yaa shɛ aa kwụbɛ ru'wo ra bụtụ be elele na aa kwụnɛ ti ree shiri nụ ụshɛka, na amɛ cɛnjɛ ta ata AGWANGWAMA na shɛ Agwatana bụ zhɛ ma bụ pana maa 'yaga, ee mepi shi kaa bụtụ na kwụnɛ bụ,

²asha ga n-nyarɛ keeni ajɛmɛ-ụshɛrɛya bụ zhajɛ, maa e mengenji gana na ụdụlụ wa ashɛpwụ na rongongonu bụtụ ata aa kwụnɛ namɛ.

³Ga n-nyarɛ mụ ụshɛpwụ ata gwumwongonu na bụtụ ata aa kwụnɛ uhwuri una vwɛ hwɛɛ mi shepi unasa buna, na ta njɛ shɛ ugondu kwukwuŋ, na kaa te kekwuri shi ụ'wụ'wụ-i'ilu kwukwuŋ.

⁴Ge shepi unasa ata buna maa e zwi nu ulomu na meni ma fwunga, unaa na aa hwuŋ shɛ itimɛ, na kaa aa bɛrɛ shɛ iyi, maa a kwụshɛ i'ilu unasa ata nu ulomu ata.

⁵Go onongbo na shɛ miaụŋ-me-eyi ma Alivai mi zhe apata, iwɛnɛ ti yaa shɛ aba AGWANGWAMA na shɛ Agwatana bụ teri maa a ndanɛ bụ ugondu, maa e peni du bụtụ uwebiye ni izeci ibwɛ. Tedure kaa nu n-ndumwa ma aba, e eri a kwunanga iwɛ ye elele, tu uwuru we elele na teni.

⁶Ga n-nyarɛ mụ ụshɛpwụ ata gwumwongonu na bụtụ ata aa kwụnɛ uhwuri una vwɛ hwɛɛ mi nyashɛnjɛ i'ɛlɛ ya aba kpaaŋ na tu'waba tu unasa ata buna aa kwụshɛ i'ilu nu ulomu.

⁷A shɛ kaa a la tiseyida, maa ɛ hiɛŋ, Shɛ atuba tu duduji mehieŋ ma bụtụ ga o, okwo tụkwụba tụ kwụbɛ shɛ bụtụ na duduji mehieŋ mu bwa o.

⁸Oo AGWANGWAMA, gangana atwa bụ Isrɛl, anaa na ɛbi lɛshijɛ ni Ijipti, ta patana kaa atwa bụ Isrɛl tụwụma ta bụtụ na ee duduji mehieŋ mu bwa uzawa tụwụma o, ama gangana aŋ tụwụma te mehieŋ ma ata.

⁹Gana ɛbi zhɛ ba bacɛnga tụwụma te mehieŋ mu na mu zasa tijama na ashashɛ hiŋ ta, aka na ta abɛ njɛ iyi nɛ teni cɛŋ ne eshe AGWANGWAMA.

¹⁰Aka na ebi zhe maa sukakanɛ atwa bụ i'ime nu ujasa, yaa shɛ AGWANGWAMA na shɛ Agwatana bụ kaa njɛ maa eri aŋ, abɛ njɛ aŋ kaa atwa na ujasa yɛ,

¹¹abụ kwụbɛ kaa biyikwo na pilanụ na ashashɛ atwa na ujasa yɛ, bu naa na ụbụ kwụlanɛ maa zeni maa sha biyikwo bu,

¹²asha bɛ shɛ be jicinje bu ni ihwɛ bu. Ga 'nyanga uhiuhiu ubwa maa ranga du eswenyi ubwa.

¹³Go tufwurungo i'wɛŋnɛ tijama tu bwa, ga nama nu umwono bu maa nda ụcɛnjɛ bishi keeni una bino bwa upiana uko mudu. Na aba inɛ ɛtɛ nazhɛ zhaga tono ya pu bwa maa shɛ bwolo bwa, maa kaa sha biyikwo bu.

¹⁴Na aba ibɛ, yaa shɛ abụ zasa unyasa nu bwa, bɛ shɛ ba ganga bụ maa hwulo no ofwo elele na kwụlanɛ bụ; ama bɛ shɛ shɛ ba sanga bụ maa leshiji ukwuribi o, bɛ shɛ shɛ kaa ba nda bụ gana ta bujama na oo so, iwɛnɛ ta abụ nduwa bụ ufwu.

¹⁵Yaa shɛ bụtụ 'yajɛ eyikwo eyebi, boo lubo bu ko, boo imo bu na bi yebi, ee metenji bu kaa miaụŋ hwɛɛ, ta bu na ata boo lubo keeni bu na ata boo imo, yaa shɛ kaa biyikwo ata boo imo ubwa metenji bu yɛu-ye-eyi ihiiŋ,

¹⁶asha aka na tụ ụjita na bɛɛ zhɛ bo hwoŋso miaụŋ mu bwa me eyi i'wɛŋnɛ ibwɛ maa mɛ yɛ ogwu ubwa ci, bɛ shɛ shɛ ba nda yɛu bu na ata boo lubo gana yɛu ibwɛ ihiiŋ ti yɛu bu na ata boo imo, nɛ kaa ga shɛ yɛu ibwɛ ihiiŋ ta namɛ o.

¹⁷Ama bɛ shɛ bo lono maa yɛu bu na ata boo imo i shɛ inɛ ihiiŋ, tedure na tụpana tu na bɛɛ zhɛ ba pana bụ orobwo eyebi ni iyi elele nɛ baa 'yajɛ. Iwɛnɛ po ubwa shɛ ukpahiŋ ubwa uhiiŋ, ubwa shɛ ba gɛga ajɛjɛ yɛu umbe.

¹⁸Yaa shɛ bụtụ 'yajɛ yɛu-ye-eyi nɛ shɛ ugworozwo, nɛ kaa i shɛ yɛu tigezhe, inɛɛ nɛ hwụjɛ shɛ unu bishi bwa kwo kaa una bino bwa, nɛ shɛ maa okwo oo vwulo bu, bi zha shɛ bo shilono aŋ acɛbɛ o,

¹⁹asha ge bishi bwa no bino bwa a untangana bụ maa e becinji bu e shepi bu no ofwo n-nyarɛ mụ ụshɛpwụ ubwa, no odubo uba ofwo ata baa namɛ.

²⁰Ga e mbishi n-nyarɛ mụ ụshɛpwụ ata ubwa maa, Yɛu gɛ tu i shɛ ugworozwo, baa shɛ kaa yɛu tigezhe, bụ hwụjɛ shɛ unu tu o; baa shɛ kaa bidederishe keeni buswe bu mayaga.

²¹Nazhɛ ge etwenyi ụshɛpwụ ata kpaaŋ tegeni bu atayɛ maa a kwụnɛ bụ; iwɛ maa becinji iyi iwɛ na ashashɛ hiŋ, nazhɛ atwa Isrɛl kpaaŋ zhɛ a hwuga, ɛɛ zhɛ a nda inyɛsɛ.

²²Yaa shɛ bụtụ njɛ iwɛwɛ nɛ teni cɛŋ maa e peni bu ulwapɛ no tu'wo, aa kwụnɛ bụ ga, ebi sweci ru'wo ru bwa nụ ụ'wụ'wụ,

²³ru'wo ra ata ru bwa rɛ shɛ shɛ ra swata nụ ụ'wụ'wụ ata tutu iyi heleni ru o, ama bɛ shɛ bo no ru gunu ụjita ata, iwɛnɛ ta Agwatana keleni bụtụ na e sweci nụ ụ'wụ'wụ unu. Ta hashɛgana cɛnjɛ ta ata AGWANGWAMA na shɛ Agwatana bụ zhɛ ma bụ pana maa 'yaga o.