Read bassa UNDWA TUKWABILANA 23 Bible Online

UNDWA TUKWABILANA 23 - bassa bible

UNDWA TUKWABILANA 23

¹Bụtụ be elele na shɛ ivwɛlɛ iwɛnɛ tu nlamwa mu bwa mu bwadụ, kwo kaa tubwa aa bwɛ mụ, bɛ shɛ shɛ bo tono ya na tu'ulwa ta atwa AGWANGWAMA o.

²Bụtụ be elele na shɛ meyingo ma ambɛ, bɛ zha shɛ bo tono na tu'ulwa ta atwa AGWANGWAMA o; okwo tutu awaŋnɛ aba a'umpwa o, i zasa bụtụ okwo bu ko nu umwamwa ubwa i shɛ bo tono ya na tu'ulwatagwụ ta atwa AGWANGWAMA o.

³Bụtụ na shɛ Bu'amon kwo kaa Bumoab, bɛ shɛ shɛ bo tono na tu'ulwatagwụ ta atwa AGWANGWAMA o; okwo tutu awaŋnɛ aba a'umpwa o, i zasa bụtụ okwo bu ko na aa 'yajɛ na shɛ bo tono na tu'ulwatagwụ ta atwa AGWANGWAMA tutu unyizo-nom.

⁴Iwɛnɛ po e hi teji la uhwaŋna ni iyimɛyɛ keeni meni, aka na ta ahiɛ banɛ ni Ijipti, keeni iwɛnɛ ta a njɛ la Balam yɛu-ye-eyi Bio na banɛ nu Pito una Mɛsopotemia ụgwụ maa ma hi kalana-unu.

⁵Okwo gana elele na kaa ti yaa shɛ, AGWANGWAMA na shɛ Agwatana bụ kaa shɛlajɛ shɛ iwɛ Balam ata o, ama bi sheyinji unu ata tukalana bee bi peni-uwebiye, iwɛnɛ ta AGWANGWAMA na shɛ Agwatana bụ mo bu lubo.

⁶Bɛ shɛ shɛ ba dwalakakana aŋ amɛ-olom, kwo kaa maa i zhɛmanɛ aŋ kwukwuŋ tutu tu'wo tụ bụ unyizo-nom.

⁷Ta nda inyizhi udenji Idụm, iwɛnɛ ta a shɛ miaụŋ-mo-bino bu. Ta nda inyizhi udenji Ijipti, iwɛnɛ ta abụ shɛwa la bulashɛ na cɛnjɛ ta aba.

⁸Miaụŋ mu na uwaŋnɛ wa aba ụtatụ zhɛ wa mata, mi zhɛ mo tono na tu'ulwatagwụ ta atwa AGWANGWAMA.

⁹Aka na ɛbi zhɛ ba bana maa sukakanɛ atwa bụ i'ime a na namɛ nu ugba wa aba ujasa, asha meme becinji ni iyi iwɛ ye elele.

¹⁰Yaa shɛ bụtụ be elele namba na ashashɛ hiŋ na hashɛganụ tedure ni iyi ikpɛsu ike nɛ teneni bu nụ ụjita, asha ga bana nu ugba tu'ulwatagwụ, bɛ shɛ shɛ bo tono na amɛ ugba tu'ulwatagwụ o.

¹¹Ama aka na ụrụmɛ shɛ, ga dụla meni, aka na tu uwaŋna teni, nazhɛ ga zhajɛ ya na amɛ ugba tu'ulwatagwụ.

¹²Jala ofwo oko no tupohondo tu ugba ata u tu'ulwatagwụ maa na bana na zha apata maa no inzo iyi elele.

¹³Na 'waŋna bungwuzhɛ ni i'wɛŋnɛ bu ujasa; maa aka na ɛbi zhɛ ba suswa no tupohondo, maa hini u'ibwa ni ibɛ, maa urigeni ijɛ ɛtɛ ebi inzhi.

¹⁴Gana na ta AGWANGWAMA na shɛ Agwatana bụ o rungo na ashashe ugba tu'ulwatagwụ tụ bụ, maa mo bu bicingo, maa kaa mo bu utogono atwa i'ime bu nu umbe bu, iwɛbɛ po yaa shɛ tilɛɛ maa ga ugba tu'ulwatagwụ tụ bụ na nama shɛshɛshɛ, iwɛ maa kede kwụba iyi elele nɛ 'wanjɛ na ashashɛ bụ maa ma bụ panɛ aba o.

¹⁵Yaa shɛ bujama gezhigeni agwuma-ihwɛ ibwɛ, baa zhajɛ pụ bụ maa ma bụ datana, to gwuricingono bu agwuma-ihwɛ ɛtɛ ibwɛ o.

¹⁶Ga gɛga na ashashɛ bụ, no ofwo na bee teri na amɛ ashɛpwụ bụ oko, no ofwo na kwụlanɛ bụ hwɛɛ; ta nda bụ kaa tawɛ tawɛ o.

¹⁷Kede butubwenyi kwo kaa biyikwo be elele ni Isrɛl shɛ buwɛle bi isume tuwa na aa tụpa ukwuribi o.

¹⁸To tocingo ukwuribi na aa cɛpɛ buwɛle bi isume tuwa kwo kaa aa cɛpɛ iwɛ uwɛwɛ[28] iwɛ unu-tishilo we elele nu umwono wa AGWANGWAMA na shɛ Agwatana bụ o. Iwɛnɛ po ijɛ ɛtɛ hwɛɛ ibɛ iyebi shanɛ AGWANGWAMA na shɛ Agwatana bụ iyi-tupwaŋ.

¹⁹Ta na unanga bụtụ bi Isrɛl na shɛ yɛu-bino bu iyi maa ma bụ patanana o, tu ukwuribi, ti iyimɛyɛ, ti iyi elele nɛ aa unanjɛ bụtụ o.

²⁰Ga shɛ bugaiŋ aba unanga iyi maa patana, ama ta unanga yɛu-bino bu na shɛ bụtụ bi Isrɛl iyi iwɛ tupatana o; iwɛ maa AGWANGWAMA na shɛ Agwatana bụ ibi peni-uwebiye ni iyi elele nɛ aba nda na cɛnjɛ ta ata ɛbi zhɛ bo tono maa leshiji.

²¹Aka na ebi shileni AGWANGWAMA na shɛ Agwatana bụ unu, ta nda ti'insu ta tụtụpa ti ibɛ o. Iwɛnɛ po AGWANGWAMA na shɛ Agwatana bụ zhɛ mo bu hoŋtono iwɛ ibɛ tilɛɛ, i zhɛ kaa ma bụ shana iwɛwɛ.

²²Ama yaa shɛ ebi shiri shi unu, i zha shɛ ma bụ shana iwɛwɛ o.

²³No shiyono iyi nɛ aba duma nu unu bu eshe, iwɛnɛ ti yaa shɛ gabụ bi meme heŋseji maa shileni AGWANGWAMA na shɛ Agwatana bụ unu nu unu bu.

²⁴Aka na ebi teni ni itimɛ ya afwafwa uyebi bu, ya tụ'walụ ta aba gana elele na ubu kwụlanɛ maa shiji, ama to shiyono ma te elele ni i'wɛŋnɛ bu o.

²⁵Aka na ebi teni ni itimɛ yo ohiu uyebi bu a na te shikeni, bi eri ba cushanga ongbongbozu aba ni i'ɛlɛ bụ maa yɛ, ama to tumongono ohiu uyebi bu a na te shikeni tɛjajaga ni igwuzhi o.