Read bassa UNDWA TUKWABILANA 24 Bible Online

UNDWA TUKWABILANA 24 - bassa bible

UNDWA TUKWABILANA 24

¹Aka na ta bụtụ bu ko 'wa biyikwo, bee zeni bu, yaa shɛ biyikwo ata kwụbɛ shɛ ya rishe ro bwolo bwa iwɛnɛ to bwolo ata bwa to iyi nɛ teni shi cɛŋ ugbe no ofwo ubwa, bee 'nyeteni biyikwo ata utakada maa bacɛnga bụ, bee utegeni bu ni i'ɛlɛ, bee unzhi bu ni ihwɛ ibwɛ, biyikwo ata ishɛjɛ ga, bee beni ni ihwɛ ibwɛ.

²Yaa shɛ biyikwo ata zhe baa cɛnɛ butubwenyi bi nya,

³yaa shɛ kaa bwolo ata bu umɛwɛɛ jeri shi bu, bee 'nyeteni bu utakada ụ tụbacɛnga, bee utegeni bu ni i'ɛlɛ, bee unzhi bu bee beni ni ihwɛ ibwɛ, kwo kaa bwolo ata bu umɛwɛɛ na ge zeni bu 'wi,

⁴asha bwolo ata bụ ngwụshɛ, na ge becinji bu la, shɛ shɛ be jicingeneni bu maa sha ya biyikwo bwa, na aba na tu boo hoshigwonuo bu la o. Iwɛnɛ ti inɛ ɛtɛ i shɛ iyi-tupwaŋ ne eshe AGWANGWAMA. Ta shapɛrɛganɛ kaa cɛnjɛ ta ata AGWANGWAMA na shɛ Agwatana bụ zhɛ ma bụ pana maa tɛ shɛ iyi-yo-ogwu bu tụwụma o.

⁵Aka na ta bụtụ zeni biyikwo tu ufwo tu ufwo, kede bana maa zha ujasa kwo kaa maa e utegeni bu ugondu we elele o; ga mama 'yaga maa nama ni ihwɛ uywa uko, maa nda unyasa ne biyikwo bwa na bee zeni.

⁶Bụtụ shɛ shɛ ba lashɛga inɛnɛ kwo kaa bunoswo nu ufwafwa o; asha uraiŋ ta bee leshiji nu ufwafwa.

⁷Yaa shɛ aa kwụbɛ bụtụ na bo zundo yɛu-bino bwa nɛ shɛ Bihibru, yaa shɛ kaa baa nda bụ gana ta bujama kwo kaa ba sanga bụ, asha ga kwụnɛ buzundo ata; gana ɛbi zhɛ ba bacɛnga iyi iwɛ na ashashɛ hiŋ ta.

⁸Na nda pece nụ ụngwụ-uwaŋna[29] na wa zala bụtụ, ama no shiyono eshe tebiye maa njɛ gana na Alivai na shɛ onongbo e bi sekekeni; nu gana na Ngee peni aŋ unu, no shiyono eshe maa njɛ gana ata.

⁹Ne teyinje iyi nɛ AGWANGWAMA na shɛ Agwatana bụ njɛ la Miriam nu uhwaŋna ata, ta ahiɛ banɛ la ni Ijipti.

¹⁰Aka na abụ unanjɛ uyebi bu iyi, to tono nu umwono ubwa maa lɛshijɛ iyi ufwafwa nu bwa o.

¹¹Shikono no tupohondo, maa bụtụ ata abụ ga unanjɛ iyi banɛ maa ma bụ pana iyi ufwafwa bụ.

¹²Yaa shɛ kaa bụtụ ata shɛ bukofwo, asha iyi ufwafwa ubwa shɛ shɛ ya nama ni i'ɛlɛ bụ uuwa iyi heri o.

¹³Aka na tu uwaŋna zhɛ utwonuo, gwuricingono bu ufwafwa ubwa iwɛ maa woto nu upaga ubwa maa ma bụ pana-uwebiye. I zhɛ kaa ma bụ shana tiririri na agba AGWANGWAMA na shɛ Agwatana bụ.

¹⁴Ta na ya bụtụ na ebi peni ụgwụ, na kaa shɛ bukofwo keeni bụtụ na ukekeshi iyi wa nda imwere o, okwo baa shɛ bụtụ bu ko na ashashɛ miaụŋ-mo-bino bu, kwo kaa bụtụ bu ko na ashashɛ alashɛ na namɛ na cɛnjɛ tụ bụ na amɛ ashɛpwụ bụ o.

¹⁵Tụpa bụ utashɛ ubwa gunu ụjita ata tu bee hwuwi uŋ tɛnda, nazhɛ uwaŋna teni. (Iwɛnɛ po bukofwo baa shɛ, apata kaa ahaŋsa ubwa namɛ hwɛɛ); shibwonu bi zhɛ ma bụ uganana pa AGWANGWAMA, yɛɛ zhɛ kaa ma bụ shana iwɛwɛ.

¹⁶A shɛ shɛ a kwụna eshi tụlụkpashɛ ta miaụŋ o, kede kaa du a kwụnɛ miaụŋ tụlụkpashɛ te eshi o, bụtụ bụtụ shɛ bo 'wo tu'wo ti iwɛwɛ ikɛnyi ibwɛ.

¹⁷To no ubo ụshɛrɛya ụ bụlashɛ kwo kaa una yɛu-bu'weteji o, kwo kaa maa leshiji iyi nɛ bululo bo urugono nu ufwafwa o.

¹⁸Ama ne teyinje maa bɛ shɛwa la du bulashɛ ni Ijipti nazhɛ AGWANGWAMA na shɛ Agwatana bụ ibi lɛshijɛ apata. Iwɛbɛ po Ama bụ pana-unu maa njɛ ijɛ.

¹⁹Aka na aba dwa iyimɛyɛ ne ehilo bu, abụ inzhɛnganɛ kaa ushi ne ehilo ata, to gwulo ya maa shapɛ uŋ o; ga una ata ụ shɛ ya iwɛ bulashɛ, ne bu'weteji keeni bululo; iwɛ maa AGWANGWAMA na shɛ Agwatana bụ ibi peni-uwebiye nu ugondu we elele na namɛ ni i'ɛlɛ bu.

²⁰Aka na aba pagana i'wɛ'wɛ buta bụ iyi (maa tụ'walụ ta aba tu'waŋtatangwụ) to gwulo ya na shɛ'walụ sha aba o; gɛ inɛ ɛtɛ i shɛ ya iwɛ bulashɛ, ne bu'weteji keeni bululo.

²¹Aka na obo two afwafwa ni itimɛ ya afwafwa bụ, ta ndaanana ya tumwata ta aba o, gɛ inɛ ɛtɛ i shɛ ya iwɛ bulashɛ, ne bu'weteji keeni bululo.

²²Bɛ shɛ bi ne teyinje maa bɛ shɛwa la du bulashɛ na cɛnjɛ ti Ijipti, iwɛbɛ po Ama bụ pana-unu maa njɛ ijɛ.