Read bassa UNDWA TUKWABILANA 28 Bible Online

UNDWA TUKWABILANA 28 - bassa bible

UNDWA TUKWABILANA 28

¹Yaa shɛ aba hwuga-unu wa AGWANGWAMA na shɛ Agwatana bụ, obo shiyono kaa eshe maa na nda onu ubwa tụpana a na Ngee bi peni hwayɛ ga kpaaŋ, asha AGWANGWAMA na shɛ Agwatana bụ zhɛ mo bu shikicingo te zeci uhwuri edenji na namɛ na cɛnjɛ tu unyizo ga kpaaŋ.

²Yaa shɛ aba hwuga-unu wa AGWANGWAMA na shɛ Agwatana bụ, nazhɛ ewebiye ga tụpana kpaaŋ zhɛ a sha anaa bụ.

³AGWANGWAMA zhɛ a pana ashɛpwụ bụ keeni shihilo shɛ bụ uwebiye.

⁴Bɛɛ zhɛ ba nda maa na mata duwa, tụ'walụ ta cɛnjɛ tụ bụ ti zhɛ tu na mata duwa, iyimabiga bụ zhɛ na mata duwa, ti inɛ bụ keeni agwụdụ bụ.

⁵Bɛɛ zhɛ kaa ba pana iyimɛyɛ nɛ abụ bɛrɛ ne ehilo uwebiye.

⁶Bɛɛ zhɛ kaa ba pana tubana keeni tugwure tụ bụ uwebiye.

⁷AGWANGWAMA zhɛ ma bụ lasagwụ atwa i'ime bu a na ishijɛ maa a bụ sukakanɛ. Ɛ zhɛ e dure uhwaŋna uko gba maa a bụ sukakanɛ, ama ɛ zhɛ tuba mo bu gozhigono, o dulogo ihwɛŋnɛ icenje.

⁸AGWANGWAMA zhɛ a pana ugondu bu keeni orubwu bu uwebiye, keeni iyi elele nɛ aba nda; bɛɛ zhɛ kaa ma bụ pana-uwebiye na cɛnjɛ ta ata bɛɛ zhɛ ma bụ pana.

⁹Yaa shɛ abụ untanganɛ onu-tupana AGWANGWAMA, aba zha kaa tahaŋnụ ni ihwɛŋnɛ ibwɛ, nazhɛ bɛɛ zhɛ mo bu shikicingo maa shanɛ bụ atwa tijilo ni ikɛnyi ibwɛ, gana na ti bee bi shileni-unu.

¹⁰Nazhɛ atwa unyizo ga kpaaŋ zhɛ a kwụba, maa a na bụ suyana tedure ni izeci ya AGWANGWAMA; ɛ zhɛ kaa a nda inyɛsɛ bụ.

¹¹AGWANGWAMA kaa zhɛ a nda maa ibu zhɛmanɛ te gembi duwa, maa meci miaụŋ duwa, ti iyimabiga bụ, ta cɛnjɛ tụ bụ, na amɛ cɛnjɛ ta ata AGWANGWAMA shileni la eshi bu unu maa bi zhɛ ma bụ pana.

¹²AGWANGWAMA kaa zhɛ ma bụ kapɛshɛngana uduciya ubwa ubiye wa azuba, bɛɛ zhɛ kaa ba pana cɛnjɛ tụ bụ eshilo na aka na teni cɛŋ, maa pana ugondu we elele na aba nda ni i'ɛlɛ bụ uwebiye. Gabụ kaa bi zhɛ bu na unanga edenji ofwugwo iyi, ama tuba bu zha shɛ bu na una aŋ o.

¹³Yaa shɛ aba hwuga-unu wa AGWANGWAMA na shɛ Agwatana bụ, a na Ama bụ pana hwayɛ ga, obo shiyono kaa eshe maa na nda aŋ; nazhɛ bɛɛ zhɛ ma bụ nda maa shɛ uhiuhiu, bu zha shɛ ma bụ nda maa shɛ utwonyi o. Bi zhɛ bu na kaana go tumungo kiri, bu zha shɛ bu no gwulo ekwunyi o.

¹⁴Ta vwula nu u'ala ubiye kwo kaa nu u'ala ugwulwo maa genji n-ndumwa me elele mu na Ama bụ pana-unu muba hwayɛ ga, maa na zhɛba tuwa o.

¹⁵Ama yaa shɛ abụ zha shɛba hwuga-unu wa AGWANGWAMA na shɛ Agwatana bụ, kwo kaa maa shiyeni andwa keeni shikpogo shɛ na Ngee bi peni-unu shɛ ba hwayɛ ga kpaaŋ eshe, maa na untangana aŋ; asha onu-tukalangana ga kpaaŋ zhɛ a zhajɛ nu uhiuhiu bu.

¹⁶AGWANGWAMA zhɛ a kalana ụshɛpwụ bụ unu, te shihilo shɛ bụ.

¹⁷Bɛɛ zhɛ ba kalana iyimɛyɛ nɛ abụ bɛrɛ ne ehilo unu.

¹⁸Unu ata tukalana zhɛ wa ima miaụŋ mu na ebi meci, maa kede mu na kaana ufwugwo na cɛnjɛ tụ bụ o, ti iyimabiga bụ ye elele nɛ abụ 'yajɛ.

¹⁹Unu-tukalana zhɛ ma bụ ima na aka na ebi teni, keeni aka na ebi beni.

²⁰AGWANGWAMA zhɛ a nda maa ge iyi elele ibu sukwutogonu, maa ge iyi elele nɛ aba nda ni i'ɛlɛ bụ i shɛ iyi tɛgadaga, uuwa i ci aka na ebi ileni abɛ njɛ ufwu kakayɛ hwɛ hwɛɛ, iwɛ iyi iwɛ nɛ aba ndangana, iwɛnɛ te ebi n jineci.[33]

²¹AGWANGWAMA zhɛ a nda maa ga ụngwụ ụwɛ ụbụ 'imɛ uuwa i ci aka na bee bi iricinji na cɛnjɛ ta ata ɛbi zhɛ bo tono maa leshiji.

²²AGWANGWAMA zhɛ ma bụ kwụna nụ ụngwụ na wa zala bụtụ, na mpiala tisha, nu u'waba tɛzhanga, no oholobwo gana ulwa, nu ubata,[34]

²³Eshilo zha shɛ o ngbo, cɛnjɛ tu na obo rukoto ti zhɛ to hwotono gana ụshɛmbɛrɛ. Nu uvwugo ụ'wụtụ, ta tu'waba tụ bụ ti zhɛ tu na unsa cinya, ijɛ kpaaŋ ibɛ zhɛ mo bu urugono uuwa bu to ilono hwɛɛ.

²⁴AGWANGWAMA zhɛ a nda maa ge eshilo cɛnjɛ tụ bụ a shɛ ubwodolo keeni upwupwutu, na zhɛ wa banɛ na azuba na zhɛ mo bu ubo, uuwa i ci aka na ebi ileni hwɛɛ.

²⁵AGWANGWAMA zho lono maa ga atwa i'ime bu a bụ lasụ. Uhwaŋna uko gba ɛbi zhɛ ba bana maa sukakanɛ aŋ, ama ihwɛŋnɛ icenje tuba ɛbi zhɛ bo gozhigono aŋ. Ɛ zhɛ no bu urugono nu usumwa geri geri na cɛnjɛ cɛnjɛ-ta-tugwama tu unyizo ga.

²⁶N'wo mụ bụ kaa mi zhɛ ma sha iyimɛyɛ shanụnụ sha azuba, keeni isundɛ ehilo i cɛnjɛ tu unyizo ga. I zha shɛ kaa ya 'yaga bụtụ be elele na zhɛ bo unzo aŋ o.

²⁷AGWANGWAMA zhɛ ma bụ kwụna na shɛtwa shi Ijipti, no ogbogwu, ni ibilɛ tubana, keeni ukwuru na zasa tɛzhɛmanana kwukwuŋ.

²⁸AGWANGWAMA zhɛ ma bụ kwụna nụ ụmpɛ tụsụma, nu ulubwo keeni ahaŋsa tusukwutogwu.

²⁹Bi zhɛ bu no gwumwogwumwo nu uwaŋna, gana na olubo o gwumwogwumwo, iyi elele zha shɛ ma bụ zhɛmana o. Ɛ zhɛ ma bu uranga umungwuta keeni orugwusu tɛnda aka elele, i zasa kaa bụtụ be elele na zhɛ mo bu mbiyono.

³⁰Bi zhɛ bu na 'wa eyikwo, ama anya atwa aba zhɛ no woto na aba. Bi zhɛ bu na ma shimwono, bi zha shɛ kaa bo woto na shɛba o. Bi zhɛ bu na hwaŋ itimɛ ya afwafwa, bi zha shɛ kaa ba ya tụ'walụ ta aba o.

³¹Ɛ zhɛ a kwụna buna bụ ne eshe bu, bi zha shɛ kaa ba ya usunda ubwa o. Ɛ zhɛ a shapa izhinyɛci bu na abwagara ne eshe bu, a zha shɛ kaa me bu gwuricingeni bu o. Ɛ zhɛ a pana atwa i'ime bu ụgwụdụ bụ, i zasa bụtụ be elele na kaa zhɛ mo bu mbiyono tilɛshijɛ o.

³²Bi zhɛ ba ngbaraka ta a pana anya atwa miaụŋ mụ bụ me eyi keeni miaụŋ mụ bụ mo o iyi-heri, iwɛ aba kaa zha shɛ ma bụ ta o; bu zasa kaa ukpahiŋ maa lɛshijɛ aŋ o.

³³Udenji na ebi mepi shi kwukwuŋ ubwa zhɛ wa ya tụ'walụ ta cɛnjɛ tụ bụ keeni ugondu na abɛ njɛ ụbaụta ubwa. Umungwuta keeni ti'idongono kiri ɛɛ zhɛ no bu idongono tutu.

³⁴Iyi nɛ eshe bu zhɛ na kwụba zhɛ ma bụ sụmɛcɛnga ụmpɛ.

³⁵AGWANGWAMA zhɛ ma bụ patana akpakpacɛ na zasa tɛzhɛmanana no shilulo keeni ivwunɛ, te kwune no ohwulu uvwuna bụ tutu omukomuko uhiuhiu bu.

³⁶AGWANGWAMA zhɛ ma bụ shapa ta agwuma na ebi shikicinji maa ma bụ untangana ba zha no ofwo udenji na ebi te mepi shi la kwukwuŋ, te eshi bu. Apata ɛbi zhɛ ba zhɛba tuwa ti i'wɛ'wɛ keeni atayɛ.

³⁷Bi zhɛ kaa ba sha iyi tudama, nu ushi tishono, keeni u'wo-tutwa, na ashashɛ atwa, no ofwo na AGWANGWAMA zhɛ ma bụ zarɛga.

³⁸Bi zhɛ ba 'waŋna izɛgwu tibila duwa ne ehilo bu, bi zhɛ kaa ba dwa cwɛŋ bana; iwɛnɛ to ovworo zhɛ a ya iŋ.

³⁹Bi zhɛ ba bila afwafwa ni itimɛ bụ, ɛbi zhɛ kaa bo vwolo aŋ, ama bi zha shɛ kaa ba swa meni ma aba o, bi zha shɛ kaa du bo two tụ'walụ ta aba o; iwɛnɛ te eshishi zhɛ a ya aŋ.

⁴⁰Bi zhɛ ba 'yaga i'wɛ'wɛ buta tutu rungwutwonu tugwungwu tụ bụ, ama bi zha shɛ kaa ba sụkwụtwa manɛbɛ ma aba o, iwɛnɛ ta buta bụ zhɛ ba libingwa.

⁴¹Bi zhɛ ba mata miaụŋ-me-eyi keeni mu na mo o, ama mi zha shɛ ma sha kaa mu naa bụ o; iwɛnɛ tu ujasa zhɛ wa ya mụ.

⁴²Ovworo aba zhɛ a ya i'wɛ'wɛ bụ keeni tụ'walụ ta cɛnjɛ tụ bụ kpaaŋ.

⁴³Bulashɛ na namɛ na ashashɛ bụ zhɛ na kaana gu ugombo na azuba bụ tutu; gabụ tuba bi zhɛ bu na kaana go tuzwo tutuu.

⁴⁴Ubwa kiri zhɛ na bụ unanga iyi, bi zha shɛ kaa ba unanga bụ iyi elele o. Ubwa zhɛ ba sha uhiu bu, gabụ tuba bi zhɛ bɛ lɛ ekwunyi nu bwa.

⁴⁵Onu-tukalangana ga kpaaŋ zhɛ mo bu urugono, ɛɛ zhɛ mo bu vwutono, uuwa i ci aka na ebi ileni hwɛɛ, iwɛnɛ ta abụ hwụjɛ shɛ unu wa AGWANGWAMA na shɛ Agwatana bụ, maa kaa untangana onu-tupana keeni andwa ubwa anaa na bee bi peni.

⁴⁶Ijɛ kpaaŋ zhɛ mo bu ubo gana useyida keeni ụrụhwajɛ, tutu ajalalo bu unyizo-nom.

⁴⁷Iwɛnɛ abụ ndanɛ shɛ AGWANGWAMA na shɛ Agwatana bụ iyi nu unyasa tubwada keeni amɛ-olom na amɛ bụ, tedure iwɛ iyi elele nɛ ibu balanɛ kpaaŋ,

⁴⁸iwɛbɛ po ɛbi zhɛ ba sha bujama ba atwa i'ime bu, a na AGWANGWAMA zhɛ ma bụ tumwananɛ maa a bụ sukakanɛ, ni imunɛ keeni i'uyɛ, no mohondo keeni iyi elele tuvwunga kpaaŋ. Bi zhɛ kaa ma bụ nda umungwuta ụ'wụtụ, uuwa i ci aka na bee bi iricinji kpaaŋ.

⁴⁹AGWANGWAMA zhɛ me bu sugeni udenji na zhɛ wa banɛ taa dụlụ unaa na kaa zhɛ wa banɛ nu uce cɛnjɛ tu unyizo maa ụbụ sukakanɛ, udenji na abụ hwụjɛ shɛ rɛjɛmɛ ru bwa, zhɛ me bu suleni vwuuŋ gana ugbeji,

⁵⁰udenji ata eshe ubwa o holono bụtụ, unaa na kaa 'wa sụ iwɛ bụtụ na shɛ iyɛri kwo kaa hieci shi inyɛmɛnyɛmɛ miaụŋ.

⁵¹Ɛ zhɛ a ya iyimabiga bụ keeni tụ'walụ ta cɛnjɛ tụ bụ, uuwa i ci aka na ebi ileni hwɛɛ. A zha shɛ kaa ma bụ gangana ohiu bu, te meni mụ tụ'walụ ta afwafwa, kwo kaa manɛbɛ mụ bụ, ti iyimabiga bụ kwo kaa oywoywo agwụdụ bụ o, uuwa i ci aka na aa hiɛ njɛ ufwu hwɛɛ.

⁵²Ɛ zhɛ ma bụ hwala na ashɛpwụ bụ kpaaŋ, uuwa i ci aka na ijilɛni bụ keeni uba bụ na zeci na kaa abụ ga patanɛ-rishe hwuŋzwotongwu no ofwo elele, na cɛnjɛ ta ata AGWANGWAMA na shɛ Agwatana bụ ibi peni ti teje kpaaŋ.

⁵³Gabụ kaa bi zhɛ ba ya usunda miaụŋ mụ bụ me eyi keeni miaụŋ mụ bụ mo o ni ikɛnyi bụ, mu na AGWANGWAMA na shɛ Agwatana bụ ge bi peni, iwɛ tuhwala tu na atwa i'ime bu zhɛ ma bụ hwala keeni tiriri tu na ɛbi zhɛ bu na nda.

⁵⁴Bụtụ na ge lemi amɛ, na kaa iyi balanɛ uhwuri atwa vwɛ kpaaŋ zhɛ no ngwulongongono yɛu-bino bwa, te biyikwo na ge ce amɛ ubwa, keeni miaụŋ mu na mu ga vwanɛ bụ umɛwɛɛ; iwɛnɛ tu baa zasa ya iyimɛyɛ.

⁵⁵Bi zha shɛ kaa ba muna bụtụ be elele usunda miaụŋ mu bwa me elele mu na ba ya o, iwɛnɛ ti ya zasa iyi elele nɛ vwanɛ bụ maa ya iwɛ tuhwala tu na atwa i'ime bu ubu hweri keeni tiriri tu na aba nda na ashɛpwụ bụ kpaaŋ.

⁵⁶Biyikwo na ge lemi amɛ na kaa iyi balanɛ uhwuri atwa vwɛ kpaaŋ na ashashɛ bụ, bu naa na ge leni shi maa nda ụbaụta maa ohwulu uvwuna ubwa fwụnjɛ cɛnjɛ; iwɛnɛ ti iyi balanɛ bụ keeni iwɛnɛ bee lemi amɛ duwa, bi zhɛ bo hwotonono bwolo bwa na ge ce amɛ ubwa, ti yɛu ibwɛ ye eyi keeni yɛu ibwɛ yo o,

⁵⁷bi zhɛ ba ya i'ine nɛ 'waŋ nu ukaka ubwa keeni miaụŋ mu bwa mu na bee meci ne tusweci, iwɛnɛ tu baa zasa ya iyi elele maa ya, iwɛ tuhwala tu na atwa i'ime hweri ashɛpwụ bụ keeni tiriri tu na baa nda.

⁵⁸Yaa shɛ ebi shiyeni shi eshe maa na nda gana na tu n-ndumwa mu na mi 'nyeci nu utakada ga mɛ jɛmɛ kpaaŋ, maa na nda inyɛsɛ izeci gɛ ya AGWANGWAMA na shɛ Agwatana bụ, nɛ 'yajɛ ụjɛrụma keeni igɛhi,

⁵⁹asha AGWANGWAMA zhɛ ma bụ shapɛrɛganɛ ụbaụta tihiokoko, keeni ụngwụ ụwɛ na wumanjɛ, na kaa zhɛ wo ilogogo tutu ajalalo bu.

⁶⁰Ubwa kaa zhɛ ma bụ shapɛrɛganɛ sasana igwumɛgwumɛ Ijipti maa ma bụ patana, igɛtɛ aba nda inyɛsɛ ibɛ, ubwa kaa zhɛ wa swana na tu'waba tụ bụ.

⁶¹Tụ ụngwụ we elele du, keeni ụbaụta we elele tihioko unaa na e 'nyeci shi nu utakada undwa ga. AGWANGWAMA zhɛ a shapɛ maa ma bụ patana uŋ, uuwa i ci aka na ehi ileni.

⁶²Okwo tu ufwugwo hiŋ ụ shɛ la gana mkpasu ma azuba, u zhɛ wa vwa ya cwɛŋ bana; iwɛnɛ ta abụ hwụjɛ shɛ unu wa AGWANGWAMA na shɛ Agwatana bụ.

⁶³Gana na kaa yaa ga shanɛ AGWANGWAMA unyasa maa ma hi nda tebiye maa ma hi kaana ufwugwo, gabata du yɛɛ zhɛ ya shana bụ unyasa maa me hi zucingo keeni ti'iricingo. Ɛ zhɛ ma hi bacɛnga na cɛnjɛ ta ata ɛhi zhɛ hio tono maa hi leshiji.

⁶⁴AGWANGWAMA kaa zhɛ ma hi garataga maa hi zhe na ashashɛ atwa kpaaŋ, te kwune nu uce ụzalụ uko ụ cɛnjɛ tu unyizo i ci uce ụzalụ uyebi ubwa. Apata kaa ɛbi zhɛ ba zhɛba tuwa ti i'wɛ'wɛ keeni atayɛ, ma tuna ebi te mepi shi la kwukwuŋ te eshi bu hwɛɛ.

⁶⁵Bi zha shɛ bo gwushigo ụhinjanụ na ashashɛ edenji ga kwukwuŋ, bi zha shɛ kaa ba 'yaga amɛ-olom, bi zha shɛ ba 'yaga ofwo tishikono elele apata o. Ama AGWANGWAMA zhɛ ma bụ pana tɛzhɛgɛda, maa eshe bu na lụmba, maa ohwulu no bu horoko.

⁶⁶Uraiŋ bụ tiya zhɛ wa sha no oruwo tuta aka elele; bi zhɛ ba nama no ohwulu tuhoroko tụ ụjita tu uwaŋna, bi zha shɛ ba mapa tikpeke tu uraiŋ bụ o.

⁶⁷Iyi heri nu uvwungwa, bi zhɛ bɛ hiɛŋ, Yee ge cimi maa ụrụmɛ shɛ! Ụrụmɛ shɛ, bi zhɛ bɛ hiɛŋ, Yee ge cimi maa i shɛ uvwungwa! Iwɛ ohwulu na mo bu horoko, keeni iyi nɛ eshe bu zhɛ na kwụba.

⁶⁸AGWANGWAMA zhɛ mo bu shiyono ni ihɛŋtu, bo bu gwuricingo ni Ijipti, na tahaŋnụ tu na Ngee shiri-unu maa bi zha shɛ ba zha tu ya kwukwuŋ. Apata kaa ɛhi zhɛ hi mama sangana atwa i'ime hiŋ, maa hiɛ shɛ ajama aba eyi na ajama aba o o, ama i zasa kaa bụtụ be elele na zhɛ ma hi sa o.