Read bassa UNDWA TUKWABILANA 3 Bible Online

UNDWA TUKWABILANA 3 - bassa bible

UNDWA TUKWABILANA 3

¹Na aba ibɛ nazhɛ ɛti yinjɛ etu munji otu to uhwaŋna ata zhɛ Bashan. Ibɛ go Og agwuma Bashan banɛ medenji atwa ubwa kpaaŋ aa tu sukakanɛ, to dongonu ụshɛpwụ ata ɛɛ hiɛŋ Ɛdrɛi.

²Ama AGWANGWAMA n hiɛŋ, Ta nda inyɛsɛ ibwɛ o. Iwɛnɛ po N nduwa maa eri bu, ta atwa ubwa keeni cɛnjɛ tu bwa kpaaŋ. Nda bụ gana ata abɛ njɛ la Sihon agwuma A'amo, na yɛ la tugwama ti Hɛshbon.

³Gana AGWANGWAMA na shɛ Agwatana tu njɛ maa ta ala Og agwuma Bashan ta, atụ kwụnɛ aŋ uuwa i ci aka na bụtụ be elele vwɛ shɛ ya.

⁴Eti lesheji ashɛpwụ ubwa kpaaŋ, na aka ata. I zasa ụshɛpwụ wa aba we elele eti leshiji shi o. Ashɛpwụ ata namɛ dupu-ne-eshe-umpwa, ibɛ shɛ cɛnjɛ tu na tu rungwutwonu geri na ɛɛ hiɛŋ Agob hwɛ hwɛɛ, ibɛ shɛ cɛnjɛ-ta-tugwama tu Og nu Bashan.

⁵E kepi ashɛpwụ ga kpaaŋ nu uba na zeci, ee kepenji shidubo sha aba ne ezhibi i'wɛ'wɛ, ti lesheji du ekpekpe ubwa, a na gembi ufwugwo tebiye a na zasa uba.

⁶Tɛ njɛ ụshɛpwụ we elele ufwu, atụ kwụnɛ atwa elele, te etwenyi, te eyikwo, ta miaụŋ. Gana na atɛ njɛ la Sihon agwuma Hɛshbon.

⁷Ama tu suji iyimabiga keeni iyi elele nɛ ujasa yɛ na ashɛpwụ ata kpaaŋ atɛ njɛ iŋ ufwa tu ujasa.

⁸Gana eti lesheji cɛnjɛ ta ata na shɛgwuma sha ata sha A'amo shi yebi shɛ na shɛ jɛjɛ hileniye Jodan ta, te kwune nu ulomu Anon i ci Ishɛmɛ Hɛmon.

⁹(Atwa Saidụn aba po Ishɛmɛ ɛtɛ Hɛmon izeci maa Sirion, A'amo aba po iŋ tuba izeci maa Seni).

¹⁰Ti lesheji ashɛpwụ a'wụtụ cɛnjɛ ta ata tụ tụndalụụ kpaaŋ, ti Giliad kpaaŋ, keeni Bashan kpaaŋ, tutu Salɛka keeni Ɛdrɛi, a na shɛ ashɛpwụ a'wụtụ cɛnjɛ-ta-tugwama tu Og bụtụ ata bu Bashan.

¹¹(Go Og ubwa shɛ agwuma umɛwɛɛ na vwɛ ya na Arɛfaim. Ogodo ubwa[5] a shɛ ụshɛmbɛrɛ;[6] ụnjɛswa wa aba ụ shɛ imbele i'ɛlɛ icinjishi, uholo wa aba ụ shɛ imbele i'ɛlɛ ineshi, nu gana na te bimenji bu tukpororo namɛ. A ta namba taa hwayɛ nu ụshɛpwụ ata ụ'wụtụ A'amon, ɛɛ hiɛŋ Raba).

¹²Aka na eti lesheji cɛnjɛ ta ata, na aka ata, Ngee peni atwa Rubɛn keeni atwa Gad tugwungwu ta aba te kwune na Aroe, na namɛ nu ụpalanụ Urefu Anon, medenji ashashɛ cɛnjɛ ti ishɛmɛ Giliad, medenji ashɛpwụ a'wụtụ a na namɛ na tuba.

¹³Ashashɛ ụlamụ Manasɛ aba Ngee peni cɛnjɛ ti Giliad tu na tu vwɛ, keeni Bashan kpaaŋ, na shɛ cɛnjɛ-ta-tugwama tu Og, tuba tɛ shɛ cɛnjɛ tu na tu rungwutwonu Agob kpaaŋ. (Ɛ hiɛŋ cɛnjɛ ta ata tu Bashan kpaaŋ maa cɛnjɛ ta Arɛfaim.

¹⁴Ga Jai yɛu-ye-eyi Manasɛ, lesheji cɛnjɛ tu na tu rungwutwonu Agob kpaaŋ, tuba tɛ shɛ Bashan, tutu tugwungwu ta atwa Gɛshu keeni atwa Meaka. Boo po olomu ata izeci ibwɛ, maa, Havot-jai[7] tutu taa hwayɛ.)

¹⁵N shepi Giliad Ngee peni atwa mwamwa Maki, na shɛ ụlamụ Manasɛ.

¹⁶M peni atwa Rubɛn keeni atwa Gad tugwungwu tɛ cɛnjɛ tu na tu kwune ni Giliad tutu ulomu Anon, medenji ashashɛ ulomu ata maa ụ shɛ ogwungwu utuba, tutu keshi Urefu Jabok, na shɛ ogwungwu A'amon.

¹⁷Tugwungwu ta aba ti geri bu uwaŋna-twonuo tu kwune tuzuba tu ukwokwo Galili, keeni Itekwu ɛtɛ i Tu'wo, tutu Urefu Jodan, tee zhe geri bu uwaŋna-banụ be embi Ishɛmɛ Pisga.

¹⁸Ngee hi peni-unu te kwuni na aka ata, Ngɛɛ hiɛŋ, AGWANGWAMA na shɛ Agwatana hiŋ, ihi pwonuo cɛnjɛ ta ata tu namɛ geri bu uwaŋna-banụ Jodan maa hi 'yaga tụ. Ge etwenyi hiŋ a na waŋnɛ ujasa kpaaŋ, a mama 'imɛ ya, maa e hwuleni alamụ vwɛ atwa Isrɛl umbe maa e keshi Urefu Jodan, maa e mbiyeni aŋ cɛnjɛ ta ata tulashɛga.

¹⁹Ama eyikwo hiŋ, ta miaụŋ mi hiŋ mu na mu ta gwụmwatangwụ, ti iyimabiga hiŋ, ɛ zhɛ a nama na ashɛpwụ a'wụtụ a na Ngee hi peni. (M mepi maa hi 'yajɛ iyimabiga nɛ gembi ufwugwo).

²⁰Mbiyono ma atwa vwɛ hiŋ Isrɛl uuwa i ci aka na ee leshiji cɛnjɛ tu na AGWANGWAMA peni aŋ, geri bu uwaŋna-twonuo bu Jodan, gana na bee hi peni du epe. Nazhɛ bụtụ bụtụ hiŋ zhɛ be gwure na cɛnjɛ tu ga Ngee hi peni.

²¹Ngee peni Joshua unu na aka ata, Ngɛɛ hiɛŋ bụ, Eshe bu kwụbwa iyi nɛ AGWANGWAMA na shɛ Agwatana bụ njɛ shɛgwuma shɛ ga shi yebi; ge Sihon keeni Og. Gabata du AGWANGWAMA zhɛ a nda cɛnjɛ cɛnjɛ-ta-tugwama tu na ɛbi zhɛ ba kashana maa lesheji.

²²Ta nda ma inyɛsɛ ya aba o; AGWANGWAMA na shɛ Agwatana hiŋ ubwa zhɛ ma hi twagwụ ifelu ɛtɛ.

²³Ngaa tabwa AGWANGWAMA aka ata, Ngɛɛ hiɛŋ,

²⁴Oo AGWANGWAMA na shɛ Agwatana na Hwuri Kpaaŋ, bu kwuni maa mbiseni yɛu gɛ bu ugondu ugombo bu, keeni ukpahiŋ bụ ụ'wụtụ. I zasa agwatana anya na ta namba na azuba kwo kaa na cɛnjɛ tu unyizo na eri a nda ugondu ukpahiŋ ụ'wụtụ gana bụ o!

²⁵Ma bụ tabwa, lono ka maa Ma kasha, ma kwụba cɛnjɛ ta ata ti biye tu namɛ hileniye Jodan, cɛnjɛ ta ata tu nshama, ti biye keeni Nshama mu Lebanon.

²⁶Ama AGWANGWAMA njɛ isɛbwɛ ne mi iwe hiŋ, bɛ shɛlajɛ shɛ iwe mi o. Nazhɛ AGWANGWAMA n hiɛŋ, Gɛ inɛ ɛtɛ ibu gwumwa ya; ta duma ya iwɛ ibɛ ne mi o!

²⁷Zhaga mungo ni ihiŋhiŋ [Ishɛmɛ] Pisga, maa shepi eshe na azuba, maa mbiyanɛ geri bu uwaŋna-twonuo keeni ụzalụ tuzuba, keeni ụzalụ tuta keeni ụzalụ bu uwaŋna-banụ, yalaga tụ tebiye ne eshe bu. Iwɛnɛ po bi zha shɛ ba kasha Jodan ga o.

²⁸Ama pana Joshua unu, hiɛcɛnga bụ u'waba maa to bu ikɛnyi; iwɛnɛ ti yaa shɛ ubwa zhɛ ba 'yagaga atwa ga maa e keshi, maa e leshiji cɛnjɛ ta ata ɛbi zhɛ ba kwụba.

²⁹Iwɛbɛ po atɛ jɛjɛ nu ulomu ata namɛ ririri nụ ụshɛpwụ ata ɛɛ hiɛŋ Bɛt-pio.