Read bassa UNDWA TUKWABILANA 34 Bible Online

UNDWA TUKWABILANA 34 - bassa bible

UNDWA TUKWABILANA 34

¹Nazhɛ go Moses beni nu udadarɛ ata Moab, bee munji Ishɛmɛ Nibo, ni ihiŋhiŋ Ishɛmɛ Pisga, nɛ namɛ ne eririri Jɛriko. Ibɛ AGWANGWAMA mbiseni bu cɛnjɛ ta ata ti Giliad kpaaŋ, tutu i ci Dan;

²ta cɛnjɛ tu Naftali kpaaŋ, ta cɛnjɛ ti Ifrem keeni ma tu Manasɛ, ta cɛnjɛ tu Juda tutu i ci Itekwu Uwaŋna-twonuo,

³tụ ụzalụ tuta, keeni udadarɛ ata ulomu Jɛriko na shɛ ụshɛpwụ ata ishiwɛ, tutu i ci Zoa.

⁴Nazhɛ AGWANGWAMA hiɛŋ bụ, Cɛnjɛ tu ga tuba Ngee shileni la Abraham, na Azik keeni Jekob unu maa N zhɛ ma pana tụ ajalalo aba. M bi leneni maa kwụbɛ tụ ne eshe bu, ama bi zha shɛ tuba ba kasha maa zhe apata o.

⁵Gabata go Moses yɛu-ugondu ya AGWANGWAMA 'wi ga apata na cɛnjɛ tu Moab, nu gana na ta AGWANGWAMA jɛmɛ n-ndumwa mu bwa.

⁶Ibɛ AGWANGWAMA ni bu nu ulomu ata namɛ na cɛnjɛ tu Moab ne eririri Bɛt-pio, ama i zasa bụtụ be elele na mepi ofwo na bee ni bu gom tutu taa hwayɛ o.

⁷Go Moses namɛ shiywa dipi-yebi-nu-woshi te e meci bu na aka na ti bee 'wi. Eshe ubwa kaa ta kwụba uhwaŋna cara, ukpahiŋ tu'waba tu bwa kaa salananụ sụ o.

⁸Atwa Isrɛl kaa cwɛ-u'wo Moses nu udadarɛ ata Moab ijitɛ talacɛ, nazhɛ aa kwunanjɛ u'wo ubwa tutwa keeni ụkwụla ubwa tuta.

⁹Mpiala mi ti'inta kaa mi shini amɛ Joshua yɛu-ye-eyi Nụn, iwɛnɛ tu go Moses petengeni bu la i'ɛlɛ ibwɛ nu uhiuhiu; ibɛ po atwa Isrɛl hwụjɛ-unu ubwa. Baa njɛ kaa gana na ta AGWANGWAMA peni la Moses unu hwɛɛ.

¹⁰Te kwuni na aka ata, i zasa ya bigesere be elele na ishijɛ ni Isrɛl na shɛ gana Moses, na AGWANGWAMA mepi ne eshe tutwa na binya o.

¹¹I zasa kaa du bụtụ be elele na shɛ ya gana bwa o, ubwa la AGWANGWAMA tumwanɛ maa ndana cɛnjɛ ti Ijipti keeni Faro, ta anjɛ-ugondu Faro kpaaŋ iyi tudama keeni arụhwajɛ.

¹²I zasa kaa du bigesere binya na eri ba nda ya ugondu ụ'wụtụ kpaaŋ keeni iyi i'wɛtwɛ keeni iyi tuholono inɛɛ nɛ go Moses njɛ ne eshe atwa Isrɛl kpaaŋ kwukwuŋ.