Read bassa UNDWA TUKWABILANA 7 Bible Online

UNDWA TUKWABILANA 7 - bassa bible

UNDWA TUKWABILANA 7

¹Aka na ta AGWANGWAMA na shɛ Agwatana bụ ibi shepi hwuŋ maa zhe na cɛnjɛ ta ata ɛbi zhɛ bo tono maa leshiji, maa unzhi edenji ofwugwo a na ga namɛ apata, aba shɛ Ɛhit, na Agigash, na A'amo, ne Ekenan, nɛ Ɛpɛrɛz, nɛ Ɛhiv, keeni Ɛjɛbus, edenji ga ecenje e gembenji, aa 'yajɛ kaa ikɛnyi ee bu hwuri.

²Aka na ta AGWANGWAMA na shɛ Agwatana bụ ubu utegeni aŋ, abụ lasụ aŋ; asha bɛ shɛ be iricingo aŋ hwɛ hwɛɛ. Bɛ shɛ shɛ kaa ba twa-unu na aba o, to hioko kaa du inyɛmɛnyɛmɛ ya aba o.

³Ta nda tụmbụla na aba o, ta pana ma miaụŋ ma aba me eyi miaụŋ mi hiŋ mo o maa e zeni o, ta pana ma kaa du miaụŋ mi hiŋ mo o miaụŋ ma aba me eyi maa mu tuna aŋ o.

⁴Iwɛnɛ po ɛ zhɛ a nyɛngɛcɛnga miaụŋ mi hiŋ maa kede a n 'wa o, maa a na zhɛba tuwa; nazhɛ isɛbwɛ mi Gamba AGWANGWAMA zhɛ ma hi sukakana, Ngɛɛ zhɛ mo hi iricingo kakayɛ.

⁵Ama gana na ɛhi zhɛ hia nda aŋ na: hwuŋzotongo ma otukwu-ụrụpɛ aba, bwarataga ma ntatanuwaŋ ma aba, logo ma imbele ya Ashɛra[12] ya aba maa hi hwoŋzhenji ntatanuwaŋ ma aba mu tɛshaba.

⁶Ahiɛba hiɛ shanɛ AGWANGWAMA na shɛ Agwatana hiŋ atwa tijilo. AGWANGWAMA na shɛ Agwatana kaa ihi teri maa hiɛ shɛ atwa ubwa a na baa 'yajɛ, a na banɛ na atwa na namɛ na cɛnjɛ tu unyizo kpaaŋ.

⁷Shɛ iwɛ maa ahiɛba hi gembi ufwugwo hi hwuri anya atwa upo AGWANGWAMA ihi peteni tulubo tu bwa, bee hi teri o, ama ahiɛba hi 'nyanɛ hi hwuri atwa kpaaŋ.

⁸Ama iwɛnɛ AGWANGWAMA ihi lubi, ibɛ po baa untanganɛ unu na bee shileni la eshi hiŋ. Iwɛbɛ po du AGWANGWAMA ihi bicinji na tijama tu Faro agwuma Ijipti tedure nu ukpahiŋ ubwa ụ'wụtụ.

⁹Iwɛbɛ po mapa ma maa AGWANGWAMA na shɛ Agwatana hiŋ ubwa shɛ Agwatana Mokondo tɛcara, baa shɛ bu naa na kaa ba untangana unu ubwa tutwa keeni tulubo tu bwa ti biye na awaŋnɛ akpakwụ-a-ta (1,000) a na o lubo bu, a na kaa a untangana onu ubwa tụpana.

¹⁰Bi zhɛ ba tụpana atwa na o imo bu ne eshe aba caakwụ, tedure ne ti'iricingo tu na bɛɛ zhɛ be iricingo aŋ. Bi zha shɛ ba nda ti'insu na bụtụ na bo imo bu o, bi zhɛ ba tụpana bụ ne eshe ubwa caakwụ.

¹¹Iwɛbɛ po ahiɛ shɛ hio shiyono unu-tupana ubwa eshe maa hi na nda uŋ, keeni shikpogo, keeni andwa anaa na Ngee hi peni-unu hwayɛ ga.

¹²Yaa shɛ ahiɛ shɛlajɛ iwɛ onu-tupana ga, ahia nda kaa iyi nɛ aa jɛmɛ na tɛcara, nazhɛ AGWANGWAMA na shɛ Agwatana hiŋ zhɛ ba ta tuhwulo nu unu na baa twa la ne hiŋ maa mo hi mbisono tulubo tu bwa ti biye tu na bee shileni la eshi hiŋ unu hwɛɛ ta ahiɛba du.

¹³Bi zhɛ mo hi lubo, bɛɛ zhɛ ma hi pana uwebiye, bɛɛ zhɛ ma hi kaana ufwugwo tugombo. Bi zhɛ du ba nda maa hi na mata miaụŋ te gembi ufwugwo, bi zhɛ ba pana cɛnjɛ te shihilo shi hiŋ uwebiye, to ohiu hiŋ, te meni ma tụ'walụ ta afwafwa, ta manɛbɛ mi hiŋ, ti iyimabiga hiŋ, ta miaụŋ-ma-agwụdụ hiŋ, na cɛnjɛ ta ata bee shileni la eshi hiŋ unu maa bi zhɛ ma hi pana.

¹⁴Ahiɛba bɛɛ zhɛ ba pana uwebiye uhwuri atwa elele. Bu'ulo be elele zha shɛ ba nama na ashashɛ hiŋ o, kwo kaa na ashashɛ iyimabiga hiŋ o.

¹⁵AGWANGWAMA kaa zhɛ a bacɛnga ụngwụ we elele no olugwo hiŋ; bi zha shɛ kaa ma hi patana ụngwụ ata ụwɛ namɛ ni Ijipti, na ehi mepi o, ama bi zhɛ ba patana uŋ atwa elele na mo hi imo.

¹⁶Hiɛ shɛ kaa hie iricingo atwa elele na AGWANGWAMA na shɛ Agwatana hiŋ ihi utegeni, to hioko ma inyɛmɛnyɛmɛ ya aba o. Ta zhɛba ma kaa du tuwa ta aba o, iwɛnɛ ti tɛɛ zhɛ ta sha gana ugwuru na zhɛ ma hi ima.

¹⁷Ta mama hiaŋnụ ma maa, Edenji ga kaa gembi ufwugwo ee tu hwuri, gana na eti eri to unzo aaŋ?

¹⁸Hiɛ shɛ shɛ hia nda inyɛsɛ ya aba o, ama teyinje ma iyi nɛ AGWANGWAMA na shɛ Agwatana hiŋ njɛ la Faro keeni atwa Ijipti kpaaŋ.

¹⁹Teyinje ma tishikpe tụ 'wụtụ 'wụtụ, ne eseyida, ni iyi ya arụhwajɛ, na tudama tụ 'wụtụ keeni ukpahiŋ ụ'wụtụ na eshe hiŋ kwụbɛ la, nazhɛ AGWANGWAMA na shɛ Agwatana hiŋ ihi bɛcinjɛ. Gobwonu du AGWANGWAMA na shɛ Agwatana hiŋ zhɛ ba nda atwa elele na ahia nda inyɛsɛ ya aba.

²⁰Shɛ inɛ ɛtɛ kiri o, AGWANGWAMA na shɛ Agwatana hiŋ zhɛ ba tumwanɛ tishikpe[13] na ashashɛ aba, uuwa i ci aka na atwa na ga vwɛ keeni atwa na ga mama intanɛ iwɛ hiŋ ileni hwɛɛ.

²¹Kede ohwulu ihi po iyi iwɛ aba o; iwɛnɛ po AGWANGWAMA na shɛ Agwatana hiŋ namɛ na ashashɛ hiŋ, bɛ shɛ Agwatana a'wụtụ 'wụtụ na kaa 'yajɛ igɛhi.

²²AGWANGWAMA na shɛ Agwatana hiŋ zhɛ no hi unzongo edenji ata kwurɛ kwurɛ, ta kwụna aŋ ma kpaaŋ na aka oko gba o, shibwonu isundɛ ehilo zhɛ mo hi hwulo ufwugwo.

²³Ama AGWANGWAMA na shɛ Agwatana hiŋ zhɛ mo hi utogono aŋ, bɛɛ zhɛ kaa du bo zwono aŋ no tusukwutogwu tu 'wụtụ 'wụtụ, uuwa i ci aka na ee ileni hwɛɛ.

²⁴Bi zhɛ kaa mo hi utogono shɛgwuma sha aba ni i'ɛlɛ hiŋ, bi zhɛ ba nda izeci ya aba ufwu nu unyizo ga. I za bụtụ na zhɛ ba ala maa shikono maa ma hi sukakana, uuwa hi to iricingo aŋ hwɛɛ o.

²⁵Hwoŋzhingo ma ntatanuwaŋ mu tɛshaba ma tuwa ta aba nu ulwa. Ta nda ma ukwedeyi wa azụrụfa keeni azhɛnarɛya na aa shananjɛ o, to sugo aŋ ma iwɛ ikɛnyi hiŋ o, iwɛnɛ ti yaa shanɛ AGWANGWAMA na shɛ Agwatana hiŋ iyi-tupwaŋ.

²⁶Te tecinje ma ijɛ ɛtɛ tupwaŋ nu umwono hiŋ o, shibwonu unu-tukalana zhɛ ma hi ima gana ibɛ. Na nda ma inyizhi tuwa ta aba hwɛ hwɛɛ, maa hi no imo tu hwɛ hwɛɛ iwɛnɛ ta AGWANGWAMA kolwonuo tu unu.