Read bassa JON 10 Bible Online

JON 10 - bassa bible

JON 10

¹Ge Jisus hiɛŋ,[36] Iwɛ-tɛkana Omo hi mbiso maa, bụtụ na teni shi no odubo isume ya agwụdụ, ama yaa shɛ boo mungo nyapadụ, asha bɛ shɛ buzundo na bɛshɛrɛ.

²Ama bụtụ na bo tono no odubo, ubwa shɛ bi'iywa-ba-agwụdụ.

³Bungbaracɛ bo odubo zhɛ ba kapɛshɛngana bu odubo, agwụdụ du a hwuga rụhwụŋ ru bwa, bɛɛ zhɛ na suyagana agwụdụ ubwa ni izeci nɛ bee pegeni aŋ, maa bu na zarɛga aŋ no tupohondo.

⁴Aka na bee hwuleni agwụdụ ubwa umbe, nazhɛ agwụdụ a 'wa bụ kpaaŋ aba, iwɛnɛ te e mepi rụhwụŋ ru bwa.

⁵A zha shɛ a 'wa bugaiŋ o, ama ɛ zhɛ no gozhigono bu, iwɛnɛ te e mepi shi rụhwụŋ ra bugaiŋ.

⁶Ge Jisus manganganɛ aŋ n-ndumwa mu ga, ama e eshiciji shi iwɛ nɛ baa njɛ na aba o.

⁷Ge Jisus hiɛŋ aŋ sasana, Iwɛ-tɛkana Omo hi mbiso maa, Gamba n shɛ odubo isume ɛtɛ ya agwụdụ.

⁸Atwa elele na zhajɛ hiiŋ ne mi, aba shɛ ozundo na ashɛrɛ, agwụdụ hwụjɛ shɛ iwɛ aba o.

⁹Gamba n shɛ odubo, bụtụ be elele na teni tedure ne mi, bi zhɛ bo bino, bi zhɛ be teni, bɛɛ zhɛ ba bana, bɛɛ zhɛ ba ta ofwo tiyaga ugbe.

¹⁰Buzundo ba zhajɛ maa zundo izunde, maa kwụna maa nda du iyi ufwu. Ama N zhajɛ maa atwa 'yaga uraiŋ, maa kaa a 'yaga uŋ te gembi duwa.

¹¹Gamba n shɛ bi'iywa-ba-agwụdụ bi biye. Bi'iywa-ba-agwụdụ bi biye kaa bo shiyono uhiuhiu ubwa no tu'wo iwɛ agwụdụ ubwa.

¹²Aka na ti yɛu-ugondu nɛ ya lashɛga ukwuribi ụgwụ iwɛ ugondu agwụdụ, kwụbɛ tu ugwusu we ci, bi zhɛ ba ganga agwụdụ bo gozhigo iwɛnɛ ta agwụdụ shɛ shɛ a na ubwa, nazhɛ ugwusu wa ima aŋ, ba garataga aŋ hwɛɛ.

¹³Yɛu ɛtɛ ugondu yo gozhigo iwɛnɛ ta agwụdụ shɛ shɛ a na ubwa, i'ɛlɛ ibwa zaba na agwụdụ ata o.

¹⁴Gamba n shɛ bi'iywa-ba-agwụdụ bi biye. M mepi enee mi, aba du kaa e m mepi.

¹⁵Gana na te Bishi m mepi, Ngee mepi du kaa Bishi, Ngee shiyeni kaa uhiuhiu mu no tu'wo iwɛ agwụdụ.

¹⁶N ta 'yajɛ agwụdụ anya a na ta zasaba ni isume gɛ. I shɛ tilɛɛ maa me suje aŋ du, maa a na hwuga rụhwụŋ ri mi, iwɛ maa a shɛ unyama uko ni i'ɛlɛ bi'iywa ba aba.

¹⁷Bishi mo n lubo, iwɛnɛ to Omo shiyono uhiuhiu mu no tu'wo iwɛ maa ma shapanana uŋ.

¹⁸I zasa bụtụ na ba shapa uŋ no olugwo mi, ama Gamba mo shilo uŋ ni ikɛnyi mi. N 'yajɛ ụhwada maa mo shilo uŋ, Ngaa 'yajɛ kaa ụhwada maa ma shapanana uŋ. No olugwo Bishi mi Ngɛɛ lɛshijɛ unu-tupana ga.

¹⁹Tubogwu ti zhaganɛ sasana Eju iwɛ n-ndumwa ma ata.

²⁰Atwa ofwugwo na ashashɛ aba hiɛŋ, Butumwa-bi-ibiri namɛ na amɛ ubwa, ba sụma-umpɛ. Iwembe po ahiɛ shilajɛ n-ndumwa mu bwaa?

²¹Anya atwa hiɛŋ, n-ndumwa mu ga mɛ shɛ shɛ n-ndumwa ma bụtụ na butumwa-bi-ibiri namɛ na amɛ ubwa o. Butumwa-bi-ibiri eri be ushije eshe olubo hŋ?

²²Isene nɛ maa e teyinje aka na aa ndaananɛ Umwono wa Agwatana tijilo namɛ nu Jɛrusalɛm na aka bu ushwo.

²³Ge Jisus bo rungo na angba Sụlụmụn na namɛ nu Umwono ata wa Agwatana.

²⁴Eju rungwutwonu Jisus, ɛɛ hiɛŋ bụ, Ụkwụmbwụ naa ɛbi zhɛ ba bacɛnga oruwo na shɛmɛ shi tuu? Yaa shɛ gabụ bɛ shɛ ga Krast ata, asha iti mbishi caakwụ.

²⁵Ge Jisus jishijɛ aŋ, bɛɛ hiɛŋ, N hi mbiswo, hiɛ tɛtanɛ shɛ kaa rishe o. Ogondu na Ama ndangana ni izeci Bishi mi, ogondu ata aba ma n la tiseyida,

²⁶ama hiɛ tɛtanɛ shɛ kaa rishe o, iwɛnɛ ta ahiɛ shɛ shɛ agwụdụ mi, gana na tu Ngoo ngo hi mbiswo.

²⁷Agwụdụ mi a hwuga rụhwụŋ ri mi, M mepi aŋ du, a ma n 'wa.

²⁸Ma pana aŋ uraiŋ unyizo-nom, a zha shɛ a nda ufwu kwukwuŋ, i zasa bụtụ be elele na zhɛ ba lashɛga aŋ ni i'ɛlɛ mi o.

²⁹Bishi mi na m peni aŋ,[37] bu hwuri bụtụ be elele hwɛɛ, i zasa bụtụ be elele na eri ba lashɛga aŋ ni i'ɛlɛ Bishi mi o.

³⁰Gamba ne Bishi mi, tɛ shɛ iyi ike.

³¹Ibɛ po Eju suji sasana atayɛ maa e tegeni Jisus.

³²Ge Jisus hiɛŋ aŋ, Bishi mi ubwa m peni ogondu ga ebiye ofwugwo na Ngaa njɛ ne eshe hiŋ. Iwɛ ugondu imbe tuba ahi ma jala atayɛ tutaganaa?

³³Eju jishijɛ bụ, ɛɛ hiɛŋ, Shɛ iwɛ ugondu ubiye ata bu jala atayɛ tutagana o, ama iwɛ n-ndumwa mụ bụ mụ wɛ. Ta bɛ shɛ butugwumwa, abu mama nda Agwatana!

³⁴Ge Jisus jishijɛ aŋ, bɛɛ hiɛŋ, I 'nyeci shi suu nu Undwa hiŋ maa, Agwatana hiɛŋ, Hiɛ shɛ tuwa?

³⁵Yaa shɛ Agwatana hiɛŋ aŋ tuwa, asha Iwɛ ya Agwatana eri shi ya hashɛganụ iwɛnɛ ta Agwatana mbishi aŋ n-ndumwa mu bwa o.

³⁶Bụtụ na Agwatana teri bee shiri swooŋ, na baa tumwanɛ nu unyizo, ɛhi hiɛŋ ya maa ubwa ba dumangana Agwatana n-ndumwa mụ wɛ iwɛnɛ ti Ngɛɛ hiɛŋ, Gamba n shɛ Yɛu ya Agwatana.

³⁷Yaa shɛ shɛ ogondu Bishi mi Ama nda, asha ta ma tɛtana ma rishe o.

³⁸Ama yaa shɛ Ama nda ogondu Bishi mi, asha okwo ahiɛ n tɛtanɛ shɛ rishe, asha tɛtana ma tuba ogondu ata rishe, iwɛ maa hi mepi, maa hi eshiciji du maa Bishi namɛ na amɛ mi, Ngaa namɛ du na amɛ Bishi mi.

³⁹Ibɛ po aa jalanana maa a 'imɛ Jisus, ama bu benengeni aŋ bee hwuri.

⁴⁰Ge Jisus gwuri hileniye Urefu Jodan no ofwo ata ga Jon kwuni la ubaptizim tɛnda, baa namɛ apata.

⁴¹Atwa ofwugwo zhajɛ pu bwa; ɛɛ hiɛŋ, Ga Jon njɛ shɛ ụrụhwajɛ we elele o, ama iwɛ nɛ ga Jon jɛmɛ la iwɛ bụtụ ga kpaaŋ i shɛ iwɛ-tɛkana.

⁴²Ibɛ po atwa ofwugwo tɛtanɛ Jisus rishe apata.