Read bassa JON 12 Bible Online

JON 12 - bassa bible

JON 12

¹Ti Isene Tɛkashɛka vwɛ ijitɛ icihiŋ, ge Jisus teni ụshɛpwụ ata ɛɛ hiɛŋ, Bɛtani, ibɛ shɛ ofwo ata ga Lazaros na bɛɛ hicinjɛ no tu'wo namɛ.

²Aa ndanɛ bụ iyimɛyɛ apata, ga Mata njɛ ugondu. Ama ga Lazaros shɛ bụtụ bu ko na atwa na jɛjɛ nu uteburu ne Jisus.

³Nazhɛ ge Meri shepi manɛbɛ mu ko mụ ụhiụŋ ubiye mi ibene mu na aa njɛ ni iyi nɛ ɛɛ hiɛŋ nad tugom, mu na mu zhanjɛ duwa, bee dudugeni Jisus nɛ ɛvwɛvwɛjɛ ubwa, boo wofwoji du ɛvwɛvwɛjɛ ata ubwa ne tihiŋzhe tu bwa. Ibɛ po ụhiụŋ manɛbɛ ma ata mi biye shini umwono ata.

⁴Nazhɛ ga Judas Iskariot na shɛ bụtụ bu ko na ashashɛ eseshi-iyi Jisus, na kaa du zhɛ ba sanga bu ne tidere, hiɛŋ,

⁵Iwembe kwuŋ po e senji shi manɛbɛ mu ga mụ ụhiụŋ ubiye i ci azụrụfa arinya umpwa-na-ba-a-ta, maa e peni okofwoo?

⁶Ama bɛ jɛmɛ iwɛ gɛ, shɛ maa iwɛ okofwo u gwumanɛ bu o, ama iwɛnɛ baa shɛ buzundo, ubwa kaa ba 'waŋna arɛta ukwuribi, baa bwaga uŋ maa bu no momo mbiyono.

⁷Ge Jisus hiɛŋ, Ganga bu ma, ba nda ijɛ iwɛ ụjita na ɛɛ zhɛ mo n no.

⁸Okofwo zhɛ a nama ne hiŋ aka elele, ama N zha shɛ tuba ma nama ne hiŋ aka elele o.

⁹Aka na tu ofwugwo we Eju mepi maa ge Jisus namba apata, aa zhajɛ, shɛ iwɛ Jisus kiri o, ama iwɛ maa a kwụbɛ du Lazaros ata bɛɛ hicinjɛ no tu'wo.

¹⁰Ibɛ po ehiu onongbo njɛ ushaura iwɛ maa a kwụnɛ Lazaros du.

¹¹Iwɛ ubwa upo Eju ofwugwo o hwulo aa tɛtana Jisus rishe.

¹²Aka na ti iyi heri, nazhɛ ufwugwo ụ'wụtụ na zhajɛ ni Isene ɛtɛ hwụjɛ maa ge Jisus be ci ba nu Jɛrusalɛm.

¹³Ibɛ po ee suji abaga ishiwɛ ee hwuri maa e teji bu uhwaŋna. Aa ugaga, ɛɛ hiɛŋ, Shɛtana ma[43] Agwatana! Ga Agwatana peni bụtụ ata be ci ni izeci ya Agwangwama uwebiye! Ga Agwatana peni Agwuma Isrɛl uwebiye!

¹⁴Aka na ti ge Jisus kwụbɛ biywoywo bi izhinyɛci bu ko, baa sụcɛ bụ, gana na to o 'nywotwo, ɛɛ hiɛŋ,

¹⁵Gabụ ụshɛpwụ Zayon, ta nda inyɛsɛ o; hioko, Agwuma bu ta e ci, bwaata patanɛ biywoywo bi izhinyɛci.

¹⁶Eseshi-iyi Jisus eshiciji shi ijɛ kpaaŋ ni hiiŋ ata o, ama aka na te e peni Jisus ụjɛrụma, nazhɛ ee teyinje maa ijɛ oo 'nywotwo la iwɛ ubwa, ibɛ gɛnɛnɛ aa ndana bụ.

¹⁷Ibɛ du po atwa ofwugwo ata a na namɛ nu bwa apata le tiseyida maa bu suyanɛ la Lazaros, bɛɛ bɛcinjɛ bụ nu u'uye.

¹⁸Ecilo ga upo atwa ofwugwo teji bu uhwaŋna ta, iwɛnɛ ta a hwụjɛ maa bu nduwa la ụrụhwajɛ gana ata.

¹⁹Afarisi mama hiaŋnụ, Hiɛ kwụbɛ maa hi zasa ya titeni te elele o. Iwɛnɛ ta atwa unyizo kpaaŋ 'wawa bụ!

²⁰Egrik oko namba na ashashɛ atwa na zhajɛ maa a zhɛbɛ Agwatana ni Isene ɛtɛ.

²¹Ibɛ po atwa ata zhaganɛ Filip, na shɛ bụtụ bu Bɛtɛsaida, na namɛ na cɛnjɛ tu Galili, ɛɛ hiɛŋ bụ, Iyɛri, ta jala maa ta kwụba Jisus.

²²Ge Filip zhajɛ bee mbishi Andru, ga Andru ne Filip zhagajɛ ee mbishi Jisus.

²³Ama ge Jisus jishijɛ aŋ, bɛɛ hiɛŋ, Aka ci ya maa e peni Yɛu Bụtụ ụjɛrụma.

²⁴Iwɛ-tɛkana Omo hi mbiso maa, yaa shɛ bụzagwụ bo rihiu bi leyi shi na cɛnjɛ maa bu fwoshi, asha bụzagwụ ata bu ko kiri zhɛ ba nama. Ama yaa shɛ boo fwoshi nazhɛ bɛɛ zhɛ ba mata tụ'walụ tụ 'wụtụ.

²⁵Bụtụ na bo lubo uriaŋ ubwa, asha nazhɛ bɛɛ zhɛ ba inzhɛnga uŋ, ama bụtụ na bo imo uraiŋ ubwa nu unyizo ga, asha nazhɛ baa intana uŋ tutu uraiŋ unyizo-nom.

²⁶Bụtụ be elele na ma n ndana iyi, asha ga ma n 'wa, ofwo na Ngaa namɛ, apata du yɛu-ugondu mu zhɛ ya nama. Bụtụ be elele na kaa ma n ndana iyi, Bishi mi zhɛ ba pana bụ ụjɛrụma.

²⁷Ohwulu mo n horoko hwuwayɛ, imbe Ngɛɛ zhɛ mɛ hiɛɛŋ? Maa Mɛ hiɛŋ suu, Ada, m bicinji na auwa ga? Awo. Iwɛ ijɛ kaa gbaa Ngaa zhajɛ na aka ga.

²⁸Ada, pana izeci bu ụjɛrụma! Nazhɛ rụhwụŋ ru ko ru dumanɛ iwɛ na azuba, rɛɛ hiɛŋ, M pwonuo iŋ ụjɛrụma, N tɛ zhɛ kaa ma pananana iŋ ụjɛrụma.

²⁹Aka na ta atwa ofwugwo a na shikekeni apata hwụjɛ iŋ, ɛɛ hiɛŋ, Uto nu keri. Ama atwa oko tuba hiɛŋ, butumwa-ba-azuba nu jɛmɛ iwɛ nu bwa.

³⁰Ge Jisus jishijɛ aŋ, bɛɛ hiɛŋ, Shɛ iwe mi rụhwụŋ ru go ru dumanɛ iwɛ o, ama iwe hiŋ.

³¹Aka ci ya hwuwayɛ maa a jɛmɛ ụshɛrɛya unyizo ga, aka ci ya hwuwayɛ maa e becinji uhiu unyizo ga no tupohondo.

³²Aka na ee n shepi ee mungicinji na azuba, nazhɛ Ngɛɛ zhɛ mɛ mbɛ atwa kpaaŋ pi mi.

³³Ge Jisus jɛmɛ iwɛ gɛ iwɛ maa mbisono atwa tu'wo tu gana na bɛɛ zhɛ bo 'wo.

³⁴Nazhɛ atwa ata ofwugwo jishijɛ bụ, ɛɛ hiɛŋ, Tụ hwụjɛ nu Undwa maa ga Krast ata zhɛ ba nama hwuŋ unyizo-nom. Nanaa tuba ɛbi hiɛŋ ya maa, ɛ zhɛ o mungicingo yɛu bụtụụ? Gaaba kwuŋ shɛ yɛu ɛtɛ bụtụụ?

³⁵Ge Jisus hiɛŋ aŋ, Uhioko-uhwaŋna tɛ zhɛ wa nama na ashashɛ hiŋ aka ticwɛŋ tugwo. No rungo ma tugwo nu uhioko-uhwaŋna ata, iwɛ maa kede hi nama ne tishi o. Bụtụ na ba zha tahaŋnụ ne tishi, bi mepi shi ofwo na bɛɛ zhɛ o.

³⁶Ta ahi ta 'yajɛ bana uhioko-uhwaŋna, tɛtana ma uhioko-uhwaŋna ata rishe, iwɛ maa hiɛ shɛ miaụŋ mu uhioko-uhwaŋna. Ti ge Jisus jɛmɛ iwɛ gɛ, bee hwuri baa swacɛ iwɛ maa kede a kwụbɛ bu o.

³⁷Ama okwo ti ge Jisus nduwa la arụhwajɛ ofwugwo ne eshe aba, a tɛtanɛ shɛ bụ waa kaa rishe o.

³⁸Inɛ gɛ teni iwɛ maa iwɛ nɛ bigesere ga Ayizaya dumwa la i sɛ, inɛ hiɛŋ, Agwangwama, gaaba tɛtanɛ utumwa tu rishee? Gaaba Agwangwama mbiseni ukpahiŋ ubwaa?

³⁹Iwɛ ecilo ata ee eri shi a tɛtana-rishe, iwɛnɛ ti ga Ayizaya hiɛŋ sasana,

⁴⁰Bu uteji shishe sha aba, iwɛ maa kede a kwụbɛ uhwaŋna o, baa njɛ shihaŋsa sha aba maa shɛ shɛshɛpanɛ, maa kede shihaŋsa sha aba shi eshiciji o, iwɛ aka na ɛɛ zhɛ a jɛshɛrɛga hwayɛ shihaŋsa sha aba maa a nɛnjɛ aŋ.

⁴¹Ga Ayizaya jɛmɛ iwɛ gɛ, iwɛnɛ tu baa kwụbɛ ụjɛrụma Jisus, ibɛ po baa jɛmɛ iwɛ ubwa.

⁴²Okwo ti yaa shɛ gana ata atwa ofwugwo na ashashɛ ehiu tɛtanɛ Jisus rishe, ama a jɛmɛ shɛ caakwụ o, iwɛ Afarisi iwɛ maa kede avwɛ aŋ nu umwono tụ'ụlwatagwụ o.

⁴³A jala maa atwa na dumanga aŋ, uhwuri maa Agwatana na dumanga aŋ.

⁴⁴Ge Jisus uganɛ, bɛɛ hiɛŋ, Bụtụ na n tɛtanɛ-rishe, shɛ Gamba kiri baa tɛtanɛ-rishe o, ama bu tɛtanɛ du bụtụ na n tumwanɛ rishe.

⁴⁵Bụtụ na kaa n kwụbɛ, asha bu kwụbɛ du bụtụ ata n tumwanɛ.

⁴⁶Gamba na n shɛ uhioko-uhwaŋna, N zhajɛ nu unyizo, iwɛ maa atwa elele na n tɛtanɛ-rishe kede a nama ya ne tishi o.

⁴⁷Bụtụ be elele na kaa ba hwuga n-ndumwa mi mi, baa tɛtanɛ shɛ mu rishe, shɛ Gamba n zhɛ ma duma ụshɛrɛya ubwa o. Iwɛnɛ ti Ngee zhe shi maa ma duma ụshɛrɛya unyizo, ama iwɛ maa Mo bicingo uŋ.

⁴⁸Bụtụ na ma n laka, na kaa leni shi n-ndumwa mi mi, bɛjɛmɛ-bu-ụshɛrɛya ubwa namba. N-ndumwa mu ga Ama duma, muba mi zhɛ ma duma hwuŋ ụshɛrɛya ubwa nụ ụjita umɛwɛɛ.

⁴⁹Iwɛnɛ po shɛ nụ ụhwada ikɛnyi mi Ama duma iwɛ gɛ o, ama Bishi na n tumwanɛ, ubwa m peni-unu iwɛ gɛ Ama duma keeni gana na maa ma duma iŋ.

⁵⁰M mepi kaa maa unu na bee m peni ubwa shɛ uraiŋ unyizo-nom. Ibɛ po iyi elele nɛ Ama duma, Ma duma iŋ nu gana na te Bishi mi m mbishi.