Read bassa JON 15 Bible Online

JON 15 - bassa bible

JON 15

¹Ge Jisus hiɛŋ, Gamba n shɛ ukparɛ ufwafwa u tugom, Bishi mi tuba ubwa shɛ bufwashɛ.

²A'walụ elele na 'weri shi na amɛ mi, bi zhɛ ba vwala aŋ, ama a na elele na a 'wala tụ'walụ, bi zhɛ ba nangangana[51] aŋ tebiye maa e keeni tụ'walụ tu'wala.

³N-ndumwa mu ga Ngee hi mbishi mi hi nangwangwanua tebiye.

⁴Nama ma na amɛ mi, gana na tu Ngaa namɛ du na shɛmɛ shi hiŋ. Gana na ta a'walụ ufwafwa eri shi a 'wala tụ'walụ ni ikɛnyi aba uzawa ticimbono nu ukparɛ ufwafwa, gobwonu du ehi eri shi hia 'wala nu uzawa ticimbono ne mi.

⁵Gamba n shɛ ukparɛ ata ufwafwa, ahiɛba tuba hiɛ shɛ a'wa'walụ. Bụtụ na cimbeni ne mi, Ngee cimbeni du kaa na amɛ ubwa, ubwa zhɛ ba 'wala tụ'walụ duwa, iwɛnɛ te ehi eri shi hia nda iyi elele uzawa mu.

⁶Yaa shɛ bụtụ cimbeni shi ne mi, ɛ zhɛ a kala bu gana a'wa'walụ ụ'wụ'wụ, aka na te e hweteni nazhɛ ɛɛ zhɛ o hwugo aŋ maa e zweni nu ulwa maa e hwoŋzhinji aŋ.

⁷Yaa shɛ ehi cimbeni ne mi, n-ndumwa mi mi du kaa mu namɛ na shɛmɛ shi hiŋ, asha lụpa ma iyi elele nɛ ahia jala, ɛ zhɛ ma hi ndana iŋ.

⁸Yaa shɛ ahia 'wala tụ'walụ duwa, nazhɛ Bishi mi zhɛ ba 'yaga ụjɛrụma, iwɛ maa tuba hiɛ shɛ eseshi-iyi mi.

⁹Gana na te Bishi n lubi, gana ata du Ngee hi lubi. Nama ma no tulubo ti mi.

¹⁰Yaa shɛ ahia hwuga-unu imbisegeni mi, nazhɛ ɛhi zhɛ hia nama no tulubo ti mi, gana na Ngaa untanganɛ onu-tupana Bishi mi, Ngaa namɛ du no tulubo tu bwa.

¹¹N hi mbishi iwɛ gɛ iwɛ maa ga unyasa mu nama na shɛmɛ shi hiŋ, iwɛ maa ga unyasa ata hiŋ ulwa.

¹²Unu ata mu tụpana ụ shɛ iwɛ maa hi no momo lubonu gana na ti Ngee hi lubi.

¹³I zasa bụtụ na ta 'yajɛ tulubo tu na tu hwuri ma tu ga o, ibɛ shɛ maa bụtụ keri uhiuhiu ubwa iwɛ eyejilo ubwa.

¹⁴Yaa shɛ ahia nda iyi elele nɛ Ngee hi peni-unu ibɛ, asha ahiɛba hiɛ shɛ eyejilo mi.

¹⁵N zha shɛ mɛ hi hiɛŋ ya miaụŋ-mu-ugondu[52] o, iwɛnɛ ti yɛu-ugondu mepi shi iyi nɛ agwuma-ihwɛ ibwɛ a nda, ama N zhɛ mɛ hi hiɛŋ ya eyejilo mi, iwɛnɛ tu Ngoo hi mbiswo iyi elele nɛ Ngɛɛ hwujɛ no olugwo Bishi mi.

¹⁶Shɛ ahiɛba hi n teri o, ama Gamba n hi teri, Ngee hi shileni maa hi zhe maa hi 'weri tụ'walụ, maa tụ'walụ ta ata ti hiŋ tu nama, iwɛ maa Bishi ihi peni iyi elele nɛ ahia lụpa ni izeci mi.

¹⁷Unu na Ngee hi peni ta, maa no momo lubonu ma.

¹⁸Yaa shɛ atwa unyizo mo hi imo, asha mapa ma maa Gamba oo imwo nazhɛ oo hi imo.

¹⁹Yaa shɛ ahi ga shɛ atwa unyizo, atwa unyizo gɛ zhɛ mo hi lubo iwɛnɛ ta ahi ga shɛ atwa aba. Ama hiɛ shɛ shɛ atwa unyizo. Gamba n hi teri maa hi beni nu unyizo ga, iwɛbɛ po atwa unyizo mo hi imo.

²⁰Ne teyinje ma iwɛ ɛtɛ Ngee hi mbishi, Ngɛɛ hiɛŋ, Bujama[53] hwuri shi agwangwama[54] ubwa o. Yaa shɛ aa n shɛka, ɛ zhɛ ma hiɛ shɛka du, yaa shɛ kaa aa 'wa imbisegeni mi, asha ɛ zhɛ a 'wa du imbisegeni hiŋ.

²¹Ama ɛ zhɛ ma hi nda ijɛ hwɛɛ iwɛ izeci mi, iwɛnɛ te e mepi shi bụtụ na n tumwanɛ.

²²Yaa shɛ Ngee nge zhe shi maa mo mbiso aŋ n-ndumwa, a ga zha shɛ a mapa tụwụma ti iwɛwɛ ya aba o. Ama a zasa ya onungwu maa e benengeni tụwụma ti iwɛwɛ ya aba o.

²³Bụtụ na mo n imo, bo imo du Bishi mi.

²⁴Yaa shɛ Ngaa nga njɛ shɛ ugondu na ashashɛ aba unaa na ta zasa bụtụ na nduwa uŋ, a ga zha shɛ a mapa tụwụma ti iwɛwɛ ya aba o. Ama a kwụbwa uŋ ya, oo n imwo te Bishi mi hwɛɛ.

²⁵Ama inɛ ɛtɛ shɛ iwɛ maa iwɛ nɛ oo 'nywotwo nu Undwa wa aba i sɛ, iwɛ ɛtɛ hiɛŋ, E n imi uzawa ecilo.

²⁶Ama aka na ta bụsụmɛ-bu-uno na shɛ Mpiala ma ata ma kapɛshɛngana atwa maa Agwatana shɛ tɛkana, mu gata Ngɛɛ zhɛ ma tumwanɛ maa mu banɛ no olugwo Bishi mi zhajɛ, ubwa zhɛ ma n la tiseyida.

²⁷Hi zhɛ du hi ma n la tiseyida, iwɛnɛ ta ahi namɛ ne mi taa nu umozhigo.