Read bassa JON 17 Bible Online

JON 17 - bassa bible

JON 17

¹Aka na ti ge Jisus jɛmɛ iwɛ gɛ, bee shepi eshe na azuba, bɛɛ hiɛŋ, Ada, aka ci ya maa peni Yɛu bu ụjɛrụma, maa Yɛu bu du ubu peni ụjɛrụma.

²Gabụ kaa bi peni bu ụhwada wa atwa elele, iwɛ maa du u pana atwa elele a na ebi peni bu uraiŋ unyizo-nom.

³Iyi nɛ shɛ uraiŋ ata unyizo-nom na, ibɛ shɛ maa e bi mepi maa gabụ bɛ shɛ Agwatana tɛkana mokondo keeni Jisus Krast ata abu tumwanɛ utumwa.

⁴M bu pwonuo ụjɛrụma nu unyizo, ugondu ata ebu m peni maa ma nda, n hwuwo uŋ.

⁵Ada! M peni ụjɛrụma hwuwayɛ go na agba bu, ubwa shɛ ụjɛrụma ata Ngaa 'yajɛ la no ofwo bu nazhɛ aa njɛ unyizo.

⁶N nduwa maa atwa na ɛbi bɛcinjɛ nu unyizo, a na ebu m peni e bi mepi.[56] Anaa bu aa shɛ la nazhɛ ebu m peni aŋ, aba kaa untanganɛ n-ndumwa mụ bụ.

⁷O mwopwo ya hwuwayɛ go maa iyi elele nɛ ebu m peni, no olugwo bu yaa banɛ.

⁸M pwonuo aŋ kaa n-ndumwa ma ata ebu m peni, oo loshigwo mu du kaa, oo mwopwo du kaa gom maa no olugwo bu Ngaa banɛ, aa tɛtanɛ du kaa rishe maa Gabụ bu n tumwanɛ.

⁹Iwɛ aba Ama lụpa ilupwɛ gɛ, shɛ iwɛ atwa unyizo Ama lụpa iŋ o, ama iwɛ atwa na ebu m peni, iwɛnɛ ta a shɛ atwa bụ.

¹⁰Iyi mi ye elele i shɛ inɛɛ bu, inɛɛ bu du kaa i shɛ inee mi, Ngaa 'yajɛ kaa du ụjɛrụma tedure na aba.

¹¹N zha shɛ ma nama ya nu unyizo, ama atwa ga a ta namɛ nu unyizo, Gamba ta me ci pụ bụ. Bishi bi Tijilo, shiyono atwa na ebu m peni eshe ni izeci bu, iwɛ maa a shɛ iyi ike, gana na atɛ shɛ du iyi ike.

¹²Aka na Ngaa ta namɛ na aba, Mo shiyono atwa na ebu m peni eshe ni izeci bu, Ama ngbaraka aŋ du. I zasa bụtụ be elele na 'inɛ na ashashɛ aba o, semi yɛu ɛtɛ ee shileni maa zha nu ufwu tɛnda kiri, iwɛ maa gɛ iwɛ ɛtɛ oo 'nywotwo la ni Iwɛ ya Agwatana i sɛ.

¹³Gamba ta me ci pụ bụ hwuwayɛ, Ma duma inɛ gɛ nu unyizo iwɛ maa unyasa mu ulwa na shɛmɛ sha aba.

¹⁴M pwonuo aŋ n-ndumwa mụ bụ, atwa unyizo kaa o imo aŋ, iwɛnɛ ta a shɛ shɛ atwa unyizo, gana na tu Ngaa shɛ shɛ du bụtụ bu unyizo.

¹⁵M bụ lụpɛ shɛ iwɛ maa becinji aŋ nu unyizo, ama iwɛ maa no shiyono aŋ eshe iwɛ bụtụ ata bụ wɛ.[57]

¹⁶A shɛ shɛ ya atwa unyizo, gana na tu Ngaa shɛ shɛ du bụtụ bu unyizo.

¹⁷Nda aŋ atwa tijilo ni Iwɛ-tɛkana bu, n-ndumwa mụ bụ muba kaa mɛ shɛ Iwɛ-tɛkana ata.

¹⁸Gana na ta abu n tumwanɛ utumwa nu unyizo, gobwonu du Ngaa tumwanɛ aŋ utumwa nu unyizo.

¹⁹Iwɛ aba Ngaa mama nda bụtụ bi tijilo, iwɛ maa aba ni ikɛnyi aba a shɛ du atwa tijilo na tɛkana.

²⁰Shɛ iwɛ atwa ga kiri Ama nda ilupwɛ gɛ o, ama iwɛ atwa na du tɛ zhɛ ma n tetana-rishe tedure ni i'enenji ya atwa ga.

²¹Ma lụpa iwɛ maa a shɛ iyi ike kpaaŋ aba, gana na gabụ na bɛ shɛ Bishi abu namɛ na amɛ mi, Ngaa namɛ du kaa na amɛ bụ, iwɛ maa a nama du na amɛ tu gana ata, iwɛ maa atwa unyizo mepi maa Gabụ bu n tumwanɛ.

²²M pwonuo aŋ ụjɛrụma ata ebu m peni, iwɛ maa a shɛ iyi ike gana na atɛ shɛ iyi ike.

²³N namɛ na amɛ aba, abu namɛ kaa du na amɛ mi, iwɛ maa a ụrɛcɛnjɛ aŋ ni iyi ike tisha, iwɛ maa unyizo mepi maa gabụ bu n tumwanɛ utumwa, maa bu lubi aŋ gana na te bu n lubi.

²⁴Ada! I n kwụlanɛ maa ga atwa ga ebu m peni a nama du no ofwo na Ngaa namɛ, iwɛ maa a kwụbɛ du ụjɛrụma mu na ebu m peni, iwɛnɛ te ebu n lubi nazhɛ aa njɛ unyizo ga.

²⁵Bishi bi tiririri! Unyizo ubu mepi shi o, ama M bu mepi tuba, atwa ga kaa mepi maa gabụ bu n tumwanɛ utumwa.

²⁶N nduwa maa e bi mepi, N zhɛ kaa ma ta tuhwulo maa a na bu mapa, iwɛ maa tulubo tu na ebu n lubi tu nama na shɛmɛ sha aba, maa Ma nama du na shɛmɛ sha aba.