Read bassa JON 19 Bible Online

JON 19 - bassa bible

JON 19

¹Nazhɛ ga Pɛilat shepi Jisus bee lwepi bu nu udugwu.

²Asaza pieci esepi adanya, aa njɛ udara, ee peteni Jisus nu uhiuhiu, ee urigeni bu utogwo uduhwa ushenje.

³Aa zhajɛ pu bwa, ɛɛ hiɛŋ bụ, Zaaci! Tumaka Agwuma Eju! Nazhɛ oo po bu uwaŋpɛ nu upada.

⁴Ga Pɛilat beni sasana no tupohondo, bɛɛ hiɛŋ aŋ, Hioko ma, N zɛrijɛ bụtụ ga no ofwo hiŋ iwɛ maa hi mepi maa N kwụbɛtanɛ shɛ bụ tụwụma o.

⁵Ge Jisus beni no tupohondo, tu baa ta patanɛ udara ata we esepi adanya, ti bee te urigeni du utogwo ata uduhwa ushenje. Ga Pɛilat hiɛŋ aŋ sasana, Hioko ma bụtụ ga!

⁶Aka na te ehiu onongbo, ne edegeri kwụbɛ Jisus, aa uganɛ, ɛɛ hiɛŋ, Tagana bụ nrɛ nụ ụ'wụ'wụ-ubatanɛ! Tagana bụ nrɛ nụ ụ'wụ'wụ-ubatanɛ! Ga Pɛilat hiɛŋ aŋ, Shapa bu ma hi tegeni nrɛ nụ ụ'wụ'wụ-ubatanɛ ni ikɛnyi hiŋ. Ɛɛ hiɛŋ Gamba, N kwụbɛtanɛ shɛ bụ tụwụma o.

⁷Eju jishijɛ Pɛilat, ɛɛ hiɛŋ, Ti 'yajɛ Undwa, ama gana na tu Undwa ata tu shɛ, asha bɛ shɛ aa kwụna, iwɛnɛ tu baa mama njɛ Yɛu ya Agwatana.

⁸Aka na tu ga Pɛilat hwụjɛ iwɛ ɛtɛ, ibɛ po inyɛsɛ keeni bu tisha duwa.

⁹Bee teni sasana nu umwamwa, bee heŋteni Jisus, bɛɛ hiɛŋ, Cee kwuŋ abu banɛɛ? Ama ge Jisus jishijɛ shɛ bụ o.

¹⁰Iwɛbɛ po ga Pɛilat hiɛŋ bụ, Bu n jɛshɛjɛ shɛ suu? Bi mepi shi suu maa N 'yajɛ ụhwada maa Ma bu ganga, Ngaa 'yajɛ du kaa ụhwada maa Ma bu ta nu ubatanɛ?

¹¹Ge Jisus jishijɛ bụ, bɛɛ hiɛŋ, Yaa shɛ Agwatana ge bi peni shi taa na azuba, bi ge eri shi ba 'yaga ụhwada maa n njɛ iyi elele o. Ama bụtụ na n shapɛ ubu peni, ubwa iwɛwɛ ibwɛ wụmanjɛ.

¹²Te kwuni na aka ata, ga Pɛilat ba jala maa ganga Jisus. Ama Eju uganɛ, ɛɛ hiɛŋ, Yaa shɛ ebi genji bụtụ ga, asha bi zha shɛ ba sha ya biyejilo Sisa o. Bụtụ be elele na mama njɛ agwuma, asha bụtụ ata be munje Sisa.

¹³Aka na ti ga Pɛilat hwụjɛ iwɛ ɛtɛ, bɛɛ zɛrijɛ Jisus no tupohondo, baa jɛjɛ ni idwɛtwɛ ụshɛrɛya, no ofwo ata aa njɛ idwɛtwɛ na atayɛ, a na ɛɛ hiɛŋ nu unu Rihibru, Gabata.

¹⁴Jita ata kaa shɛ ụjita tumama imanga ti Isene Tɛkashɛka nɛ vwɛ beyi, uwaŋna kaa gwumwonu tishikoko. Ga Pɛilat hiɛŋ Eju, Hioko ma Agwuma hiŋ!

¹⁵Ama a uganɛ, ɛɛ hiɛŋ, Shapa bụ! Shapa bụ! Tagana bụ nrɛ nụ ụ'wụ'wụ-ubatanɛ! Ga Pɛilat heŋteni aŋ, bɛɛ hiɛŋ, Agwuma hiŋ hŋ Ama tagana nrɛ nụ ụ'wụ'wụ-ubatanɛ? Ama ehiu onongbo jishijɛ bụ, ɛɛ hiɛŋ, Tu zasa agwuma anya elele namɛ swooŋ na Sisa o.

¹⁶Nazhɛ ga Pɛilat shepi Jisus bee peni aŋ maa o to bu nu ubatanɛ.

¹⁷Bee shepi ụ'wụ'wụ-ubatanɛ ubwa, bee beni bee zhe no ofwo na ɛɛ hiɛŋ, Ukokolo uhiuhiu, a na ɛɛ hiɛŋ nu unu Rihibru, Golgota.

¹⁸Apata ee tegeni Jisus nrɛ nụ ụ'wụ'wụ-ubatanɛ, medenji atwa oko eyebi. Bu ko namɛ geri bu u'ala ubiye ubwa, bu na bi yebi namɛ geri bu u'ala ugwulwo ubwa, ge Jisus tuba shiyeni na ashashɛ aba.

¹⁹Ga Pɛilat 'nyeci ti'nyeci tu ko bee peteni tu nụ ụ'wụ'wụ ata ubatanɛ. Ti'nyeci ta ata ti hiɛŋ, GE JISUS, BỤTỤ BU NAZARƐT, AGWUMA EJU.

²⁰Eju ofwugwo rɛcɛ ti'nyeci ta ata, iwɛnɛ to ofwo ata oo to Jisus nu ubatanɛ gwumwongonu nụ ụshɛpwụ ata ụ'wụtụ. E 'nyeci ti'nyeci ta ata, ne Rihibru, na Rilatin keeni Rigrik.

²¹Ibɛ po ehiu onongbo Eju hiɛŋ Pɛilat, Ta 'nyata maa Agwuma Eju o, ama 'nyata maa, ubwa hiɛŋ bɛ shɛ Agwuma Eju.

²²Ga Pɛilat jishijɛ aŋ, bɛɛ hiɛŋ, N 'nywotwo iyi nɛ Ngee 'nyeci.

²³Aka na ta asaza to Jisus nu ubatanɛ ata, ee suji i'wɛŋnɛ ibwɛ i tu'urugono, oo dwotwogonu iŋ orubwo eneshi, iwɛ maa busaza be elele suji ma tu bwa, medenji idikɛ ibwɛ du. Ama idikɛ ɛtɛ zasa tutogono, a nɛ iŋ mudu, te kwune na azuba ibɛ tutu uvwi ibɛ.

²⁴Iwɛbɛ po aa mama hiaŋnụ, Kede ti beji iŋ ma o, ama tu 'wɛŋ ma icɛcɛ iwɛ ibɛ, maa ti mepi ma bụtụ na zhɛ ba ya iŋ. Inɛ ɛtɛ teni iwɛ maa Iwɛ ya Agwatana nɛ oo 'nywotwo la i sɛ, iwɛ ɛtɛ hiɛŋ, O dwotwogonu i'wɛŋnɛ mi i tu'urugono abaaba, aa 'wɛŋ icɛcɛ iwɛ idikɛ mi. Iyi nɛ asaza njɛ ta.

²⁵Atwa na shikekeni to dongonu ụ'wụ'wụ ata ubatanɛ Jisus, a shɛ ge Meri bino bwa, ne Meri buhongwu bino bwa, na shɛ biyikwo Klopas keeni Meri biyikwo bu Magdala.

²⁶Aka na ti ge Jisus kwụbɛ bino bwa, keeni biseshi-bi-iyi ata bee ge lubi, te e shikekeni apata. Ge Jisus hiɛŋ bino bwa, Omu, kwụba yɛu bu.

²⁷Nazhɛ bɛɛ hiɛŋ biseshi-bi-iyi ata, Kwụba bino bu. Te kwuni na aka ata, biseshi-bi-iyi ata shepi Meri ni ihwɛ ibwɛ.

²⁸Na aba na ti ge Jisus mepi maa iyi elele hwuwowo cebe, iwɛ maa gɛ iwɛ nɛ oo 'nywotwo la i sɛ, bɛɛ hiɛŋ, I'uyɛ n gwụmɛ.

²⁹Ikele ike ga namba apata ee shidinji meni mụ tụ'walụ ta afwafwa mu ko mi sembi. Ee shepi ụhwụŋkwụ ee shiyeni ne meni me ebe mụ tụ'walụ ta afwafwa mi sembi, ee shepi mu ee hwuŋteni nu usanga uko usopi, ee kwutenji mu nu unu Jisus.

³⁰Aka na ti ge Jisus hunganɛ meni ma ata mụ tụ'walụ ta afwafwa mi sembi, bɛɛ hiɛŋ, Iwɛ hwuwowu ya. Nazhɛ bee zhire uhiuhiu, baa dwa ihwungwɛ.

³¹Gana na tụ ụjita ata ụ shɛ ụjita uzuma, na aa mama imanga iwɛ Ụjita-ụhinjanụ ụ'wụtụ u tuswooŋ na kaa vwɛ beyi, ibɛ po Eju lụpɛ Pɛilat maa bwarataga ivwunɛ ya aba, maa tuba e kezhicinje aŋ. Iwɛnɛ te e jeri shi maa n'wo ma ata mu swataga ni i'wɛ'wɛ ɛtɛ ya abatanɛ tutu Ụjita-ụhinjanụ.

³²Ibɛ po asaza ata zhajɛ, ee bwereteji ivwunɛ bụtụ bi hiiŋ, medenji inɛ bụtụ bi yebi a na oo to nu ubatanɛ ne Jisus.

³³Aka na te e ci Jisus, aa kwụbɛ maa bu uwo cebe, e bwereteji shi ya ivwunɛ ibwɛ o.

³⁴Ama busaza bu ko na amɛ aba sepi Jisus isɛnu na bụ'aŋbụ, gunu ata mehieŋ ne meni mu banɛ.

³⁵Bụtụ na kwụbɛ iŋ, bi le tiseyida, tiseyida tu bwa kaa tɛ shɛ tiseyida ti tɛkana, bee mepi kaa du maa ba duma iwɛ-tɛkana, iwɛ maa du hiɛ tɛtana-rishe.[59]

³⁶Ijɛ kpaaŋ teni iwɛ maa Iwɛ ya Agwatana nɛ hiɛŋ, U'umpwo ubwa okwo uko zha shɛ wa bwadụ o, i sɛ.

³⁷Iwɛ ya Agwatana inyɛ hiɛŋ sasana, Ɛ zhɛ a ngbaraka bụtụ ata ee sepeji iyi.

³⁸Na aba inɛ gɛ, nazhɛ go Josɛf Arimatia na shɛ du biseshi-bi-iyi Jisus ne tusweci, iwɛnɛ tu baa nda inyɛsɛ ye Eju, zhajɛ baa lụpɛ Pɛilat ru'wo ri Jisus. Ibɛ po ga Pɛilat peni bu ohwolu, nazhɛ bee zhe bee shepi ru'wo ru bwa.

³⁹Ge Nikodimos na zhajɛ la pi Jisus hiiŋ nụ ụjita, zhagajɛ no Josɛf, baa 'waŋnɛ manɛbɛ mu umuru mu na oo togotogwu na alos, mu na bimenji bu uzhinono ba muba bi ci gana dupu-nu-woshi-ni-bɛ-itɛ (75).

⁴⁰Ee shepi ru'wo ri Jisus ee pipi ru no tugwuno ti ilinɛn, medenji manɛbɛ ma ata mi 'yajɛ ụhiụŋ ubiye, gana na ta masha me Eju ma nda ru'wo ra aba nazhɛ e ni ru.

⁴¹No ofwo ata itimɛ namɛ, apata ee tegeni Jisus nrɛ nụ ụ'wụ'wụ-ubatanɛ, u'uye uko ufwo du namba apata unaa na ee ge te ni shi bụtụ be elele nu bwa kwukwuŋ.

⁴²Nu bwa ee ni Jisus, iwɛnɛ tụ Ụjita-ụhinjanụ vwɛ beyi, keeni iwɛnɛ tu u'uye ata du kaa gwumwongonu.