Read bassa JON 5 Bible Online

JON 5 - bassa bible

JON 5

¹Na aba inɛ gɛ ge Jisus zhe Isene Tɛkashɛka nɛ namɛ nu Jɛrusalɛm.

²Ukwokwo wa ataga uko namba nu Jɛrusalɛm, na ɛɛ hiɛŋ izeci ubwa ne Rihibru, Bɛtizata, u dongonu Odubo Agwụdụ, u 'yajɛ shɛngba shɛ ta.

³Na shɛngba sha ata atwa ofwugwo a na a gwumanga weteji, to sholubo, to okwuturu, ta atwa na tu'waba ta aba tu 'wegeni, [aa 'yacɛ aka na te meni ma ata mi zhɛ ma nda bulama.[20]

⁴I 'yajɛ aka na butumwa ba Agwangwama ba azuba be zwe boo vwundo meni ma ata. Aka na te meni ma ata mu vwundwo, bụtụ be elele na hwurimbe teni mu hiiŋ, okwo gana elele tụ ụngwụ ubwa ge gembi, bi zhɛ ba zhɛmanana].

⁵Ama bụtụ bu ko namba ba gwuma shiywa talacɛ-na-shɛba-shɛ-tụndatụ.

⁶Ti ge Jisus kwụbɛ bụ ti bee weci, bee mepi maa bu wotowo gana ata cebe. Bɛɛ hiɛŋ bụ, I bu kwụlanɛ suu maa nama fwaaŋ?

⁷Ugwumashɛ ata jishijɛ bụ, bɛɛ hiɛŋ, Iyɛri mi, N zasa bụtụ ma n kala nu ukwokwo ga aka na te meni mu vwundo. Ama aka elele Eme ci, binya bụtụ mo n hwulono.

⁸Ge Jisus hiɛŋ bụ, Ishijɛ shepi akpa bu maa zhe tahaŋnụ.

⁹Gunu ata bụtụ ata namɛ ga fwaaŋ, bee shepi akpa ubwa, bee kwuni tahaŋnụ. Jita ata kaa shɛ Ụjita-ụhinjanụ.

¹⁰Ibɛ po Eju hiɛŋ bụtụ ata aa nɛnjɛ, Ụjita-ụhinjanu na, Undwa leni shi maa shepi akpa bu o.

¹¹Ama bụtụ ata jishijɛ aŋ, bɛɛ hiɛŋ, Bụtụ na n nɛnjɛ ubwa kaa n hiɛŋ ma shapa akpa mi maa ma zha tahaŋnụ.

¹²Ee heŋteni bu, ɛɛ hiɛŋ, Gaaba bi hiɛŋ, Shapa akpa bụ maa zhe tahaŋnụụ?

¹³Ama bụtụ ata aa nɛnjɛ mepi shi Jisus. Iwɛnɛ ti ge Jisus ishijɛ apata swɛɛ ta atwamwa te tileni apata bee hwuri.

¹⁴Na aba inɛ gɛ, ge Jisus kwụbɛ bụtụ ata nu Umwono wa Agwatana, bɛɛ hiɛŋ bụ, Hioko, bu namwawaŋ ya fwaaŋ, ama ta nda ya iwɛwɛ o, iwɛ maa kede iyi nɛ wụmanjɛ uhwuri inɛ gɛ ibi jiteni ya o.

¹⁵Ama ta bụtụ ata beni apata, bee mbishi Eju maa ge Jisus ubwa n nɛnjɛ upo Ngaa zhɛmananɛ.

¹⁶Iwɛbɛ po Eju a shɛka ya Jisus iwɛnɛ tu baa nda ugondu gana ga nụ Ụjita-ụhinjanụ.

¹⁷Ama ge Jisus jishijɛ aŋ, bɛɛ hiɛŋ, Bishi mi ba nda ugondu uuwa i ci aka ga, gabata du Ama nda ugondu.

¹⁸Iwɛ ecilo ga ibɛ po Eju a jalakaka duwa maa a kwụnɛ Jisus, shɛ iwɛnɛ baa 'wa sụ iwɛ Ụjita-ụhinjanụ kiri o, ama iwɛnɛ bɛɛ hiɛŋ Agwatana ubwa shɛ Bishi bwa du, baa mama nangwụcɛnjɛ na Agwatana.

¹⁹Ge Jisus jishijɛ aŋ, bɛɛ hiɛŋ, Iwɛ-tɛkana Omo hi mbiso maa, yɛu eri shi ya nda iyi elele ni ikɛnyi ibwɛ o, semi iyi nɛ baa kwụba te Bishi bwa ba nda. Iyi elele nɛ Bishi ata ba nda, ibɛ du Yɛu ibwɛ ya nda.

²⁰Bishi kaa bo lubo Yɛu ibwɛ, ibɛ po boo mbisono bu iyi elele nɛ baa nda, tu ugondu na uhwuri una ga, bi zhɛ bo mbisono bu du iwɛ maa u hi dama.

²¹Gana na te Bishi bɛ hicinjɛ atwa na 'wi, baa pananana aŋ uraiŋ, gobwonu du Yɛu ya pana atwa na baa jala uraiŋ.

²²Bishi jɛmɛ shɛ ụshɛrɛya bụtụ be elele o, ama bu suji ashɛrɛya elele bee utegeni Yɛu ibwɛ,

²³iwɛ maa atwa eri na pana Yɛu ụjɛrụma gana na ta a pana du Bishi ụjɛrụma. Bụtụ na peni shi Yɛu ụjɛrụma, asha bi peni shi du Bishi na tumwanɛ bụ ụjɛrụma o.

²⁴Iwɛ-tɛkana Omo hi mbiso maa, bụtụ be elele na ba hwuga iwe mi, baa tɛtanɛ kaa bụtụ na n tumwanɛ rishe, bi 'yajɛ uraiŋ unyizo-nom, bụtụ ata zha shɛ ba zha ya nụ ụshɛrɛya o, ama bi beni no tu'wo bee teni nu uraiŋ.

²⁵Iwɛ-tɛkana Omo hi mbiso maa, aka zhɛ o to, aka ata du tuwo ya hwuwayɛ, ta atwa na 'wi zhɛ a hwuga rụhwụŋ ri Yɛu ya Agwatana, atwa na hwụjɛ zhɛ a 'yaga uraiŋ.

²⁶Gana na te Bishi 'yajɛ uraiŋ ni ikɛnyi ibwɛ, gabata du bee peni Yɛu ibwɛ maa 'yaga du uraiŋ ni ikɛnyi ibwɛ.

²⁷Bee peni bu du ụhwada maa bu na duma ụshɛrɛya iwɛnɛ tu baa shɛ Yɛu Bụtụ.

²⁸Kede iwɛ gɛ ihi dama o, iwɛnɛ ta aka zhɛ o to ta atwa na zweni ne e'uye zhɛ a hwuga rụhwụŋ ru bwa

²⁹ɛɛ zhɛ a banɛ ne e'uye. Atwa na njɛ la iyi ibiye, ɛ zhɛ ɛ hiɛ o tono uraiŋ unyizo-nom, ama atwa na njɛ la iyi tisashɛ, ɛ zhɛ ɛ hiɛ o tono n-ndumwa-tụwụma.

³⁰Ge Jisus hiɛŋ,[21] N eri shi ma nda iyi elele ni ikɛnyi mi o, ama gana na Ama hwuga, gana ata du Ama duma ụshɛrɛya. Ụshɛrɛya na kaa Ama duma ụ shɛ ụshɛrɛya u tishiriri, iwɛnɛ ti Ngee jelekeci shi ukwulana mu, semi ukwulana Bishi mi[22] na n tumwanɛ.

³¹Yaa shɛ Ngaa mama la tiseyida, asha tiseyida ti mi tɛ shɛ shɛ tiseyida ti tɛkana o.

³²Ama binya bụtụ namba na ma n la tiseyida, M mepi kaa maa tiseyida tu na bụtụ ata ma n la, tɛ shɛ tiseyida ti tɛkana.

³³Hi tumwanɛ la du atwa no ofwo Jon, bee le iwɛ-tɛkana ata tiseyida.

³⁴N 'wa sụ iwɛ tiseyida tu na atwa ma n la o, ama Ma duma iwɛ gɛ iwɛ maa e hi bicinji.

³⁵Ga Jon ubwa shɛ ụsụtula ata ee shiyeni ulwa, na wa ta no tupohondo, ihiɛ kwụlanɛ la kaa maa hi nama nu uhioko-uhwaŋna ubwa maa hiɛ njɛ unyasa fwalaa.

³⁶Ama N 'yajɛ iyi nɛ ma n la tiseyida tu na tu hwuri ma tu Jon, ogondu elele na Bishi mi m peni maa mo hwuwo, ogondu ata Ama nda ma n la du tiseyida maa Bishi mi n tumwanɛ utumwa.

³⁷Bishi mi na n tumwanɛ n le du tiseyida. Hi ta hwụjɛ shɛ kaa rụhwụŋ ru bwa kwukwuŋ, hi ta kwụbɛ shɛ bụ kaa du maa hi mepi gana na tu baa shɛ o,

³⁸hi untanganɛ shɛ kaa utumwa ubwa na shɛmɛ shi hŋ o, iwɛnɛ ta hiɛ tɛtanɛ shɛ bụtụ ata baa tumwanɛ utumwa rishe.

³⁹Hia yalaga utakada Iwɛ ya Agwatana iwɛnɛ ahia haŋsa maa tedure nu utakada ata ɛhi zhɛ hia 'yaga uraiŋ unyizo-nom, utakada ata kaa leshiji du tiseyida ti mi.

⁴⁰Ama ihiɛ kwụlanɛ shɛ kaa maa hi zhajɛ pi mi maa hi 'yaga uraiŋ o.

⁴¹N jeri shi ụjɛrụma na atwa zhɛ ma n muna o.

⁴²M mepi maa hi lubi shi Agwatana na shɛmɛ shi hŋ o.

⁴³N zhajɛ ni izeci Bishi mi, hi leshiji shi kaa iwe mi o. Ama yaa shɛ binya bụtụ zhajɛ ni izeci ikɛnyi ibwɛ, hi zhɛ hia lashɛga bụ.

⁴⁴Gana naa ehi eri hia tɛtana-rishee? Ahiɛba na hia jala maa anya hŋ na hi dumanga, hi jelekeci shi kaa maa Agwatana ata mokondo ihi dumanga o.

⁴⁵Ta haŋsa ma maa Gamba n zhɛ ma hi suyana hwuŋ ụshɛrɛya na agba Bishi mi o. Ama go Moses ata ahiɛ ngbaracɛ, ubwa gbaa zhɛ ma hi suyana hwuŋ ụshɛrɛya.

⁴⁶Yaa shɛ ahi ga tɛtanɛ iwɛ Moses rishe, hi gɛ zhɛ hia tɛtana du iwe mi rishe, iwɛnɛ tu go Moses 'nyeci iwe mi nu utakada ubwa.

⁴⁷Ama yaa shɛ ahiɛ tɛtanɛ shɛ iwɛ nɛ go Moses 'nyeci rishe, asha gana naa ɛhi zhɛ hia tɛtana n-ndumwa mi mi rishee?