Read bassa UGONDU WA ATUMWA 1 Bible Online

UGONDU WA ATUMWA 1 - bassa bible

UGONDU WA ATUMWA 1

¹Oo O-Tiofilos, N 'nyeci iyi elele nɛ ge Jisus kwuni la tɛnda keeni timbisogono nu utakada mu uhiiŋ,[1]

²uuwa i ci ụjita ata ee shepi bu na azuba. Bu hwuweni atumwa ubwa a na bee teri iyi tusokokono tedure nu ukpahiŋ Mpiala mi Tijilo

³Bee meme mbiseni aŋ kpalụ gembi ufwugwo ijitɛ buhanda na aba na tu baa njɛ ụbaụta, maa e mepi maa bi shaananɛ buumwa. Baa dumanjɛ n-ndumwa na aba iwɛ iyi nɛ imɛ Cɛnjɛ-ta-tugwama ta Agwatana.

⁴Aka oko na tu baa ya iyimɛyɛ na aba[2] no ofwo oko, bee peni aŋ unu, bɛɛ hiɛŋ, Ta ishɛga ma nu Jɛrusalɛm o, ama na nda ma ashɛlatụ unu na Bishi shiri, unaa na du ahiɛ hwụjɛ nu unu mu.

⁵Iwɛnɛ po ne meni la ga Jon njɛ atwa ubaptizim gom, ama i vwɛ cwɛŋ tɛ ɛ zhɛ ma hi nda ubaptizim na Mpiala mi Tijilo.

⁶Aka na ta atumwa ụlwatagwụ ne Jisus, ee unseni bu, ɛɛ hiɛŋ, Agwangwama, na aka ga suu ɛbi zhɛ bo lono maa atwa Isrɛl 'yaganana ụhwada cɛnjɛ-ta-tugwama ta aba?

⁷Ge Jisus jishijɛ aŋ, bɛɛ hiɛŋ, Inɛ ɛtɛ shɛ shɛ tumapa ti hŋ o, kwo kaa ogwungwu ibɛ na Bishi shiri nu ụhwada ukɛnyi ibwɛ o.

⁸Ama hi zhɛ hia lashɛga hwuŋ ukpahiŋ na aka na ta Mpiala mi Tijilo mi zhajɛ pi hiŋ, nazhɛ ɛhi zhɛ hia sha eseyida mi, nu Jɛrusalɛm, tu Judia, tu Samaria tutu rungwutwonu unyizo kpaaŋ.

⁹Aka na ti bee hwuwi iwɛ gɛ tụdụma, nazhɛ Agwatana shepi bu na azuba, aa ngbaracɛ bụ ti bɛɛ zhɛ uuwa udomu urigeni bu, a kwụbɛ shɛ bu ya o.

¹⁰Gana na ta a ta ngbaracɛ tụla ti bee hwuri na azuba, eshigiri atwa oko eyebi a na urigeni i'wɛŋnɛ icɛnjɛ shikeni to dongonu aŋ,

¹¹ɛɛ hiɛŋ aŋ, Ahiɛba atwa Galili, iwembe po ehi te shikekeni ehi zweni azuba igbɛtɛtɛɛ? Ge Jisus ga ee becinji no olugwo hiŋ ee hwuri na azuba, gana ga ahiɛ kwụbɛ ti bee zhe na azuba, gana ata du bɛɛ zhɛ be gwure.

¹²Nazhɛ atumwa zwe ishɛmɛ ɛtɛ ɛɛ hiɛŋ, Ishɛmɛ Buta, nɛ gwumwonu nu Jɛrusalɛm, nɛ shɛ gana ashashɛ imɛle ike. Ee gwure nu Jɛrusalɛm.

¹³Aka na te e teni nụ ụshɛpwụ, ee munji nu umwono wa azuba. Atwa na namba na: ga Pita, ne Jemis, na Jon, na Andru, ne Filip, na Tomas, na Batalamu, na Matiu, ne Jemis yɛu Alifios, na Saimon na ba zhɛgɛdana iwɛ, keeni Judas yɛu Jemis.

¹⁴Atwa ga shikeni dimi na adua tɛnda[3] na ahaŋsa oko kpaaŋ aba, te eyikwo oko du, medenji Meri bino Jisus, keeni ohongwu Jisus namba na aba.

¹⁵Ufwugwo wa atwa na ụlwatagwụ nu umwono ata wa azuba ụ shɛ gana atwa dipi-yebi-nu-woshi, ga Pita ishijɛ na ashashɛ miaụŋ-mo-bino[4] ata bee shikeni, bɛɛ hiɛŋ.

¹⁶A-miaụŋ-mo-bino mi, i shɛ tilɛɛ maa gɛ Iwɛ ya Agwatana nɛ Mpiala mi Tijilo jɛmɛ la nu unu Devid i sɛ, ibɛ shɛ iwɛ Judas na zɛrijɛ la atwa na 'imɛ Jisus.

¹⁷Iwɛnɛ ta a rɛcɛ la Judas na ashashɛ tu, harɛ baa 'yajɛ la ugondu na baa ndana Agwatana na amɛ tu.

¹⁸Ga Judas so ehilo nu ukwuribi iwɛwɛ ibwɛ,[5] ibɛ po bee leyi, amɛ ubwa bagwụ na ashashɛ, evwi ubwa banɛ no tupohondo kpaaŋ.

¹⁹Atwa elele na namɛ nu Jɛrusalɛm hwụjɛ iwɛ ɛtɛ, ibɛ po oo po ehilo ata izeci na rɛjɛmɛ ra aba maa Akɛledama, nɛ (egini ibɛ shɛ, Ehilo Mehieŋ).

²⁰E 'nyeci nu Utakada Shɛzunga shɛ na aa zunganganɛ Agwangwama, ɛɛ hiɛŋ, Go ofwo ata baa namɛ la a shɛ osombo, kede bụtụ be elele nama ya apata o, Yee 'nyeteneni no ofwo anya, yɛɛ hiɛŋ, Ga binya bụtụ teni ohwolu ugondu ata baa ga nda la.

²¹Ga bụtụ bu ko na atwa ga namɛ na ashashɛ tu aka elele, taa na aka na ta Agwangwama Jisus bo rungo la no tu,

²²te kwuni taa na aka na ga Jon ba ananga la iwɛ ubaptizim,[6] uuwa i ci aka na Agwatana becinji bu no olugwo tu bee zhe na zuba, ga bụtụ ata togwu no tu maa sha useyida tihiɛ tu bwa.

²³Ibɛ po ee shikicinji atwa eyebi na ashashɛ aba, aba shɛ go Josɛf na ɛɛ hiɛŋ ga Basabas, ubwa du atwa keeni izeci tu go Justus, keeni Matias.

²⁴Aa njɛ adua, ɛɛ hiɛŋ, Agwangwama, gabụ na bi mepi shɛmɛ sha atwa kpaaŋ, iti mbiseni bụtụ na ebi teri na ashashɛ atwa ga eyebi,

²⁵maa u sha butumwa na zhɛ bo tono ohwolu ugondu na go Judas genji bee zhe no ofwo na baa lanɛ na aba.

²⁶Aa 'wɛŋ icɛcɛ, icɛcɛ 'imɛ Matias. Nazhɛ aa rɛcɛ bụ ya na ashashɛ atumwa umpwa-nu-boo-ko a na ga vwɛ.