Read bassa UGONDU WA ATUMWA 11 Bible Online

UGONDU WA ATUMWA 11 - bassa bible

UGONDU WA ATUMWA 11

¹Atumwa, na atɛtanɛ-rishe a na namɛ nu Judia hwɛɛ hwụjɛ maa atwa na shɛ shɛ Eju loshigwo du n-ndumwa ma Agwatana.

²Aka na tu ga Pita munji bee zhe Jɛrusalɛm, ibɛ atwa na shɛ Eju sukakanɛ bụ nu n-ndumwa.

³Ɛɛ hiɛŋ bụ, Gabụ bi teneni atwa na shɛ shɛ Eju a na jeji shi teleyi, abɛ yɛ iyimɛyɛ na aba.

⁴Ama ga Pita kwuni aŋ n-ndumwa ma ata tuswegeni shiriri, bɛɛ hiɛŋ,

⁵Tu Ngaa namɛ nu Jopa, Ama nda adua, ahaŋsa mi zhe taa dụlụ, Ngaa kwụbɛ iyi ike nɛ shɛ gana tugwuno ti ilinɛn tụ 'wụtụ no ozobu, tu taa banɛ na azuba te e zwe, aa untanganɛ akakalụ tuba eneshi, tee zwe uuwa te n ci.

⁶Tu Ngaa ngbarakacɛ iŋ, Ngee kwuni tuhaŋsa, nazhɛ Ngaa kwụbɛ iyimabiga ihwɛ ivwunɛ ineshi, ni isundɛ ehilo, ni iyi nɛ yo hombilo keeni shanụnụ shɛ na sha hila.

⁷Ngaa hwụjɛ ta rụhwụŋ ru ko ri n hiɛŋ, A-Pita, ishijɛ ụ kwụnɛ iŋ, maa yɛ.

⁸Ama N jishijɛ Ngɛɛ hiɛŋ, Agwangwama, shɛ gana ata kwukwuŋ. I ta zasa iyi elele nɛ udenji tu jirimi tiya kwo kaa iyi nɛ zasa shɛshɛshɛ i twonuo unu mu kwukwuŋ.

⁹Ama rụhwụŋ ra ata ru dumananɛ iwɛ na azuba na aka yebi, rɛɛ jishijɛ, rɛɛ hiɛŋ, Iyi elele nɛ Agwangwama nduwa shɛshɛshɛ, ta rɛta iŋ ya maa i ta shɛ iyi nɛ ebi jirimi o.

¹⁰Ama ijɛ ɛtɛ njɛ kpalụ tatụ, nazhɛ oo mbo iŋ ee gwuricinji na azuba.

¹¹Gunu ata etwenyi oko atatụ a na aa tumwanɛ utumwa a na banɛ ni Sɛsɛria zhajɛ ee shikekeni no odubo umwono ata Ngaa namɛ.[41]

¹²Ibɛ po Mpiala mu m mbishi maa ga ma zhagaga na aba, kede ma nda oruwo. Miaụŋ-mo-bino na amɛ Krast mi cihiŋ mi beni du nu Jopa mee n she, eti teni ni ihwɛ bụtụ ata.

¹³Bee tu swegeni gana na tu baa kwụbɛ butumwa-ba-azuba nu umwono ubwa, ti bee shikeni, bɛɛ hiɛŋ bụ, Tumwana atwa maa e zhe Jopa, maa a suyanɛ Saimon ata ɛɛ hiɛŋ ga Pita.

¹⁴Ubwa zhɛ mo bu mbiso n-ndumwa mu na mi zhɛ mo bu bicingo, ta atwa ihwɛ bu hwɛɛ.

¹⁵Aka na ti Ngee kwuni n-ndumwa tụdụma, Mpiala mi Tijilo mu zwe no ofwo aba gana na ti bee zwe la no ofwo tu nu umozhigo.

¹⁶Ibɛ po Ngee teyinje n-ndumwa ma ata Agwangwama jɛmɛ la, bɛɛ hiɛŋ, Ga Jon njɛ atwa ubaptizim ne meni, ama ɛ zhɛ ma hi nda ubaptizim na Mpiala mi Tijilo.

¹⁷Yaa shɛ Agwatana peni aŋ upwaŋ ata uko uko na bee ti peni la du na aka na atɛ tɛtanɛ Agwangwama Jisus Krast rishe, asha gaaba Ngaa shɛ maa ma kapana Agwatana uhwaŋnaa?

¹⁸Aka na ta a hwụjɛ iwɛ ɛtɛ, aa 'imɛ ilɛmɛ, nazhɛ ee peni Agwatana ụjɛrụma, ɛɛ hiɛŋ, Asha Agwatana peni du atwa na shɛ shɛ Eju ohwolu maa a jɛshɛrɛjɛ-shihaŋsa maa e teni nu uraiŋ.

¹⁹Na aka ata ibɛ du atɛtanɛ-rishe a na garatagwụ na aka tɛshɛka ta ata tụ kwụnɛ la Stivin zhe tutu ee ci Fonikia, nu Saipros keeni Antiok, ama e mbishi shi bụtụ be elele iwɛ ɛtɛ o, semi Eju kiri oo mbiso.

²⁰Ama atwa oko namba na ashashɛ aba, a na shɛ etwenyi Sareni, aka na te e zhe Antiok, ee enengeni du Egrik[42] Anabarɛ Ebiye Agwangwama Jisus.

²¹Ukpahiŋ wa Agwangwama kaa namɛ na aba, atwa ofwugwo ụ'wụtụ tɛtanɛ-rishe, ee zhe no ofwo Agwangwama.

²²Unabarɛ iwɛ aba teni tụ'ụlwa-tụ-ụhiɛŋshɛ-Agwangwama tu na tu namɛ nu Jɛrusalɛm na acɛbɛ. Ibɛ po aa tumwanɛ Banabas maa zha tutu Antiok.

²³Aka na tu ga Banabas ci apata, baa kwụbɛ tulubo-ti-biye ta Agwatana. Baa njɛ unyasa, nazhɛ bee keeni aŋ ikɛnyi hwɛɛ aba maa ga a sụlụpanɛ iwɛ ya Agwangwama na shɛmɛ sha aba hwɛɛ.

²⁴Ga Banabas shɛ bụtụ bi biye, Mpiala mi Tijilo mi shini na amɛ ubwa keeni rishe-tɛtɛtana. Nazhɛ atwa ofwugwo keeni tizha no ofwo Agwangwama.

²⁵Nazhɛ ga Banabas zhe Tasus maa jalakacɛ Soul.

²⁶Aka na ti bɛɛ cɛ bu ugbe, bɛɛ zɛrijɛ bu na Antiok. Aa namɛ apata uywa mudu, aa ụlwatagwụ na Tụ'ụlwa-tụ-ụhiɛŋshɛ-Agwangwama, ee mbisegeni atwa iyi. Na Antiok ata, oo po eseshi-iyi izeci maa, Atwa Krast hiiŋ.

²⁷Na aka ata egesere oko banɛ nu Jɛrusalɛm ɛɛ zhɛ Antiok.

²⁸Nazhɛ bụtụ bu ko na amɛ aba na ɛɛ hiɛŋ, ga Agabụs, bɛɛ ishijɛ bee shikeni, baa jɛmɛ tigesere tedure nu ukpahiŋ Mpiala, bɛɛ hiɛŋ, imunɛ-tiya i'wɛtwɛ zhɛ ya layɛ nu unyizo hwɛ hwɛɛ. (Iwɛ ɛtɛ ga njɛ na aka na tu ga Kilaudius shɛ uhiu cɛnjɛ ta ata).

²⁹Ibɛ po eseshi-iyi heŋshi maa bụtụ bụtụ ga nda gana na ti i'ɛlɛ ibwɛ ci iwɛ utakashɛ ata maa e mbiyeni miaụŋ-mo-bino na amɛ Krast mu na mu namɛ nu Judia.

³⁰Aa njɛ iŋ ga, ee utegeni Banabas keeni Soul timbiyono ta ata, maa a 'waŋna tụ ee peni n-nyarɛ mụ Tụ'ụlwa-tụ-ụhiɛŋshɛ-AGWANGWAMA.