Read bassa UGONDU WA ATUMWA 13 Bible Online

UGONDU WA ATUMWA 13 - bassa bible

UGONDU WA ATUMWA 13

¹Egesere keeni embesegeni namba la na tụ'ụlwa-tụ-ụhiɛŋshɛ-Agwangwama ta Antiok, aba shɛ ga Banabas, ne Simion na ɛɛ hiɛŋ, ga Naijɛ, no Lukios na shɛ bụtụ bu Saireni, na Manen, na namɛ la ni ihwɛ ya Agwuma Hɛrod[47] ata shɛ uhiu cɛnjɛ ta ata, keeni Soul.

²Aka na ta a zhɛba Agwangwama, aa nda ezumi,[48] maa bu no mbiyono aŋ ugondu. Mpiala mi Tijilo mi hiɛŋ, Shilo ma Banabas keeni Soul swooŋ iwɛ ugondu na Ngaa suyanɛ aŋ iwɛ ubwa.

³Aka na ta a njɛ ezumi, aa njɛ adua, ee petengeni aŋ i'ɛlɛ ya aba, ee genji aŋ maa e hwuri.

⁴Aka na tu Mpiala mi Tijilo mu tumwanɛ aŋ utumwa, ee zhe ee ci Sɛlusia, ee beni apata, ee teni ụhaŋtụ ee zhe Saipros.

⁵Aka na te e ci Salamis, ee enenji n-ndumwa ma Agwatana no shimwono shɛ tụ'ụlwatagwụ she Eju. Aa 'waŋnɛ Jon.[49]

⁶Aka na te e duri cɛnjɛ ta ata uuwa ee ci Pafos, aa kwụbɛ Biju bu ko na ba nda tishino, na shɛ bigesere bu tukata, ɛɛ hiɛŋ izeci ibwɛ, ga Ba-Jisus.

⁷Bu namɛ nu ugwomina ata ɛɛ hiɛŋ gɛ Sɛgius Polus, na be eshicigo iyi. Ugwomina ata ubwa suyanɛ Banabas no Soul maa hwuga Iwɛ ya Agwatana.

⁸Ama ge Elimas, bụtụ ata bi tishino, (egini izeci ɛtɛ i shɛ sukakana aŋ) baa jala maa sheyingo ahaŋsa ugwomina ata maa kede tɛtana-rishe o.

⁹Ama go Soul, na ɛɛ hiɛŋ du go Poul, gana na tu Mpiala mi Tijilo mi shini amɛ ubwa, baa ngbaracɛ bụ zenjizenji.

¹⁰Bɛɛ hiɛŋ bụ, Oo gabụ yɛu Ibiri, nɛ i'inswɛ keeni amiaụŋ kpaaŋ shini na amɛ bụ, gabụ busukakanɛ bi iyi tiririri ye elele, bi zha shɛ suu ba ganga ihwɛŋnɛ ya Agwangwama i tiririri tukapa!

¹¹Hioko, Agwangwama zhɛ ma bu pa u'ala ubwa hwuwayɛ go, bi zhɛ bo lubono, bi zha shɛ ba kwụba uwaŋna uuwa i ci aka oko. Gunu ata uzhikwozhikwo keeni ulubwo ubi bu, nazhɛ baa jala bụtụ na maa untangana bụ u'ala.

¹²Aka na tu ugwomina ata kwụbɛ iyi nɛ teni, baa tɛtanɛ-rishe, iwɛnɛ ti imbisegeni ya Agwangwama dama bụ.

¹³Go Poul na atwa na namɛ nu bwa teni ụhaŋtụ nu Pafos, ee zhe Pɛga na namɛ na amɛ Pamfilia. Ama ga Jon genji aŋ bee gwuri nu Jɛrusalɛm.

¹⁴Ama te e beni nu Pɛga, ee duri Antiok na namɛ na amɛ Pisidia, ee teni nu umwono tụ'ụlwatagwụ nụ Ụjita-ụhinjanụ, aa jɛjɛ.

¹⁵Aka na te e hwuwi Utakada Undwa Moses keeni una we egesere[50] tɛrɛta hwɛɛ, nazhɛ ehiu umwono tụ'ụlwatagwụ tumwanɛ utumwa no ofwo aba, ɛɛ hiɛŋ, A-miaụŋ-mo-bino tu na amɛ Krast, yaa shɛ ahiɛ 'yajɛ n-ndumwa mu na mi zhɛ ma kaana atwa ga ikɛnyi, asha duma ma.

¹⁶Nazhɛ go Poul ishijɛ, baa njɛ aŋ u'ala kwupekwupe, bɛɛ hiɛŋ: Ahiɛba atwa Isrɛl keeni atwa na shɛ shɛ Eju a na a zhɛba Agwatana, hwulaga ma.

¹⁷Agwatana atwa ga Isrɛl, teri ogwunukwoshi tu, bee gembicinji aŋ duwa na aka na ta a namɛ la na cɛnjɛ ti Ijipti, nazhɛ bɛɛ bɛcinjɛ aŋ na cɛnjɛ ta ata tedure nu ukpahiŋ ubwa ụ'wụtụ.

¹⁸Baa 'waŋnɛ aŋ[51] nụ ụshɛka gana ta shiywa buhanda.

¹⁹Aka na ti bee iricinji edenji ecenje na cɛnjɛ ti Kenan, bee suji cɛnjɛ ta aba bee peni atwa ubwa maa a 'yaga.

²⁰Aa namɛ uuwa i ci shiywa akpakwụ-eyebi-nu-dupu (450). Na aba inɛ ɛtɛ nazhɛ bee jelekeni aŋ ajɛmɛ-ụshɛrɛya, uuwa i ci aka Samuɛl na shɛ bigesere.

²¹Nazhɛ aa lụpɛ Agwatana maa pana aŋ agwuma, bee peni aŋ Soul yɛu Kish, na shɛ ụlamụ Bɛnjamin, baa yɛ tugwama uuwa i ci shiywa buhanda.

²²Aka na ta Agwatana peshinji bu, nazhɛ bee peni Devid maa sha agwuma aba. Bee le bu tiseyida, bɛɛ hiɛŋ, N towo Devid yɛu Jɛsi na shɛ bụtụ na n kwụlanɛ, na kaa zhɛ ba nda ukwulana mu hwɛɛ ugbe.

²³Nu umwamwa ata Devid, apata Agwatana bɛcinjɛ Bibicinji ata shɛ ge Jisus, bee peni atwa Isrɛl, gana na ti bee shiri la unu.

²⁴Ga Jon onogwonuo la atwa Isrɛl hwɛɛ iwɛ ubaptizim wa ahaŋsa-tɛjɛshɛrɛga, nazhɛ ge Jisus zhajɛ.

²⁵Aka na tu ga Jon ba kwunanga la ugondu ubwa, bɛɛ hiɛŋ, Gaaba ehi heŋshi maa N shɛɛ? Shɛ Gamba n shɛ bụtụ ata o. Ama hioko ma, bụtụ bu ko be ci ba ne ekwunyi mi, na Ngaa lanɛ shɛ maa mo tufwurungo okwo ihwehwe ya abida ubwa.

²⁶A-miaụŋ-mo-bino mi, mu na mɛ shɛ ajalalo Abraham, keeni atwa na shɛ shɛ Eju a na a sụma Agwatana inyɛsɛ, atuba aa tumwananɛ ubino ga.

²⁷Atwa Jɛrusalɛm, te ehiu aba, e mepi shi Jisus ata o, kwo kaa n-ndumwa me egesere ma ata aa rɛta nụ Ụjita-ụhinjanụ we elele o, ama a njɛ kaa maa gɛ iwɛ ɛtɛ aa rɛta i sɛ, na aka na te e peni bu n-ndumwa-tụwụma.

²⁸Okwo ta a kwụbɛ shɛ ecilo na teni cɛŋ maa a kwụnɛ bụ, ama a lụpɛ waa Pɛilat maa ga kwụna bụ.

²⁹Aka na ta a ụrɛcɛnjɛ iyi elele nɛ ee 'nyeci la iwɛ ubwa, nazhɛ ee kezhicinje bu nụ ụ'wụ'wụ ata ubatanɛ, ee ni bu nu u'uye.

³⁰Ama Agwatana kaa hicinjɛ bụ no tu'wo.

³¹Ijitɛ ifwugwo baa bananɛ atwa na banɛ la nu Galili a na a zhagaga nu bwa a zha la Jɛrusalɛm.

³²Atuba ta hi anangana Anabarɛ Ebiye, unu na Agwatana shileni la ogwunukwoshi tu.

³³Agwatana kaa utu ụrɛcɛnganɛ unu ata bee shiri la, atuba na tɛ shɛ ajalalo aba, aka na ti bɛɛ hicinjɛ Jisus. Gana na ti yee 'nyeci na Shɛzunga shi yebi shɛ na aa zunganganɛ Agwangwama, yɛɛ hiɛŋ, Gabụ bɛ shɛ Yɛu mi, hwayɛ ga Ngee bi meci.[52]

³⁴Iwɛnɛ ti bɛɛ hicinjɛ bụ no tu'wo, maa kede fwoso kwukwuŋ, ibɛ po baa jɛmɛ iwɛ gɛ, bɛɛ hiɛŋ, N zhɛ ma hi pana uwebiye ɛtɛ Ngee shileni la Devid unu tijilo keeni una tɛcara.

³⁵Iwɛbɛ po yaa dumananɛ na Shɛzunga sha Agwangwama shi nya, yɛɛ hiɛŋ, Bi zha shɛ bo lono maa bụtụ bụ bi tijilo fwoshi kwukwuŋ.

³⁶Aka na ti ge Devid ndanɛ la ukwulana wa Agwatana iyi, bee leyi malabụ, ee ni bu no ofwo eshi ubwa, bee fwoshi.

³⁷Ama bụtụ ata na Agwatana hicinjɛ fwoshi shi o.

³⁸A-miaụŋ-mo-bino mi, mapa ma maa ni izeci bụtụ ata, ee hi gengeni iwɛwɛ hiŋ.

³⁹Ni izeci bụtụ ata ibɛ n-ndumwa mi iyi elele mɛ zhɛmɛ atwa elele na tɛtanɛ bụ rishe, inɛɛ nɛ Undwa Moses ge eri shi wa pana aŋ la n-ndumwa-zhɛ.

⁴⁰Ibɛ po na nda ma pece iwɛ maa kede iyi nɛ egesere jɛmɛ la kezhe no ohiuhiu hŋ o.[53]

⁴¹Hioko ma, ahiɛba atwa umama kwụba! Ga ihi dama; N zhɛ ma nda ugondu uko na aka hiŋ, ugondu na ahi zha shɛ hia tɛtana-rishe, okwo bụtụ ihi swegeni uŋ.

⁴²Aka na ata Banabas no Poul beni apata, nazhɛ atwa umwono ata ụ Tụ'ụlwatagwụ keeni atwa vwɛ lụpɛ aŋ maa ge gwuleneni nụ Ụjita-ụhinjanụ ye we ci maa e mbiseneni aŋ iwɛ ɛtɛ.

⁴³Aka na ta atwamwa beni nu umwono ata Tụ'ụlwatagwụ, ibɛ Eju keeni atwa na shɛ shɛ Eju tikpeke 'wa Poul na Banabas. Nazhɛ oto Poul jɛmɛ n-ndumwa na aba, ee keeni aŋ ikɛnyi maa ga untangana tulubo-ti-biye ta Agwatana dimi.

⁴⁴Aka na tu Ụjita-ụhinjanụ na 'wa una ata ci, i vwɛ cwɛŋ maa i shɛ atwa ụshɛpwụ ata ụlwatagwụ hwɛɛ aba, maa a hwụjɛ n-ndumwa ma Agwatana.

⁴⁵Aka na te Eju kwụbɛ ufwugwo wa atwa ata, ibɛ po isɛbwɛngwɛ shini shɛmɛ sha aba, aa njɛ ashamanjɛ ni iwɛ nɛ go Poul jɛmɛ, aa twagajɛ bụ.

⁴⁶Nazhɛ go Poul na Banabas jɛmɛ iwɛ ne eshe-hwoo, ɛɛ hiɛŋ, I ga shɛ tilɛɛ maa ta hi anangana tugwo iwɛ gɛ hiiŋ. Ama gana na te ehi jeri shi iŋ, ahi mama dumwangwanua ụshɛrɛya maa hiɛ lanɛ shɛ maa hi 'yaga uraiŋ ata unyizo-nom o. Hwuwayɛ go, ti zhɛ to hwulo ya no ofwo atwa na shɛ shɛ Eju.

⁴⁷Gana ata du Agwangwama iti peni-unu, bɛɛ hiɛŋ, M bi shikicinji maa shɛ uhioko-uhwaŋna wa atwa na shɛ shɛ Eju, iwɛ maa shepirigeni atwa unyizo ubino no ofwo elele na ee teje.

⁴⁸Ama aka na ta atwa na shɛ shɛ Eju hwụjɛ iwɛ ɛtɛ, aa njɛ unyasa, aa shɛtana n-ndumwa ma Agwangwama[54] mu na ee enengeni aŋ, ibɛ po atwa na ee teri iwɛ uraiŋ ata unyizo-nom tɛtanɛ-rishe.

⁴⁹Nazhɛ n-ndumwa ma Agwangwama mu mburusonu ya na cɛnjɛ ta ata hwɛɛ.

⁵⁰Ama Eju vwunji shihaŋsa she eyikwo tɛcara a na 'yajɛ ụjɛrụma, keeni atwa a'wụtụ ụshɛpwụ ata, maa a shɛka oto Poul na Banabas, ee becinji oto Poul na Banabas na cɛnjɛ ta ata tutu tugwungwu tu tuba.

⁵¹Ama oto Poul bibizeni aŋ upwupwutu shivwɛvwɛjɛ sha aba,[55] nazhɛ ee hwuri Ikonium.

⁵²Unyasa keeni Mpiala mi Tijilo shini shɛmɛ she eseshi-iyi ata.