Read bassa UGONDU WA ATUMWA 14 Bible Online

UGONDU WA ATUMWA 14 - bassa bible

UGONDU WA ATUMWA 14

¹Go Poul na Banabas shamanɛ ee teni nu umwono tụ'ụlwatagwụ we Eju ni Ikonium gana na aa shana a nda, aa jɛmɛ iwɛ nu ukpahiŋ, ibɛ po atwa ofwugwo ụ'wụtụ, te Eju, ta atwa na shɛ shɛ Eju[56] tɛtanɛ-rishe.

²Ama Eju na tɛtanɛ shɛ iwɛ ɛtɛ rishe vwunji shihaŋsa sha atwa na shɛ shɛ Eju, iwɛ maa a njɛ atɛtanɛ-rishe ata shimiaụŋ.

³Ibɛ po oto Poul ilegeji apata duwa, aa jɛmɛ iwɛ ya Agwangwama ne eshe-hwoo, Agwangwama kaa du le tulubo tu bwa ti biye tiseyida, tedure ni iyi tudama keeni arụhwajɛ na baa njɛ tedure na aba.

⁴Atwa ụshɛpwụ ata momo dwotwogonu, upada uko namɛ ne Eju, upada uyebi namɛ na atumwa.

⁵Aka na ta atwa na shɛ shɛ Eju, ne Eju keeni ehiu aba suleni oto Poul maa a njɛ aŋ iyi iwɛ, maa e tegeni aŋ atayɛ.

⁶Ama to oto Poul mepi iŋ, ee gezhiji ee zhe Lusitra keeni Dɛbi na shɛ ashɛpwụ Laikonia, keeni cɛnjɛ tu na tu rungwutwonu uŋ.

⁷Ee enenji Anabarɛ Ebiye apata.

⁸Butubwenyi bu ko namba nu Lusitra, na kwaswatagwụ, bi teni ụdamụ ata taa te e meci bu, bi te zhe shi kwukwuŋ tahaŋnụ.

⁹Bụtụ ata hwụjɛ tu go Poul ba njɛ n-ndumwa. Go Poul zweni bu igbɛtɛtɛ, baa kwụbɛ maa bi 'yajɛ rishe-tɛtɛtana maa a nɛnjɛ bụ.

¹⁰Go Poul dumanɛ iwɛ nu bwa duwa, bɛɛ hiɛŋ bụ, Ishijɛ, shikono to ni ivwunɛ bu. Nazhɛ bụtụ ata jwe angapa, bee kwuni tahaŋnụ tizha.

¹¹Aka na ta atwa ofwugwo ata kwụbɛ iyi nɛ go Poul njɛ, aa uganɛ duwa nu unu Laikonia, ɛɛ hiɛŋ, Tuwa ti teni atwa ta a zhajɛ pu tu.

¹²Ibɛ po oo po Banabas ge, Zeus, oo po tuba Poul gɛ, Hɛrɛmɛs,[57] iwɛnɛ ti yaa shɛ ubwa dumanjɛ n-ndumwa duwa.

¹³Ibɛ po bunongbo bu tuwa ta ata ɛɛ hiɛŋ, Zeus, tu na isume tuba namɛ no tupohondo to odubo ụshɛpwụ ata suje inɛ keeni shɛgba shɛ na aa njɛ no tusumbo, baa jala maa ta ụrụpɛ na atwa ata ofwugwo.

¹⁴Ama aka na tu ga Banabas no Poul hwụjɛ iŋ, ee dwetweji i'wɛŋnɛ nɛ ee ge uregeni, ee suri ee teni na ashashɛ atwa ofwugwo ata, aa uganɛ, ɛɛ hiɛŋ,

¹⁵Iwembe po ahia jala maa hiɛ njɛ ijɛɛ? Atwa na 'yajɛ ukwedeyi gana hŋ du kaa atɛ shɛɛ, ibɛ po ati hi 'waŋnanɛ Anabarɛ Ebiye, iwɛ maa hiɛ jɛshɛrɛjɛ hi genji iyi gɛnɛ gɛ tɛnda, maa hi zhajɛ pa Agwatana na shɛ buumwa. Ubwa njɛ azuba tu unyizo hwɛɛ, keeni itekwu keeni iyi elele nɛ zweni ni ibɛ.

¹⁶Bee leneni edenji elele na koshikwo maa a njɛ iyi nu uhwaŋna na kwụlanɛ aŋ.

¹⁷Okwo ti yaa shɛ gana ata bu meme genji shi uzawa iyi ye eseyida nɛ yo mbisono tunama tu bwa o. Ubwa njɛ iyi elele, bee hi peni eshilo a na a banɛ na azuba, keeni aka iyi tu'wala bee shidinji shɛmɛ shi hŋ ni iyimɛyɛ keeni unyasa.

¹⁸Okwo to oto Poul dumanjɛ n-ndumwa mu ga, i shɛ waa iyi nɛ gwụmɛ maa e kepeni aŋ uhwaŋna maa kede o to ụrụpɛ ata na aba o.

¹⁹Ama aka na te Eju oko a na banɛ na Antiok keeni Ikonium zhajɛ apata, ee sheyinji shihaŋsa sha atwa ata, ibɛ po ee tegeni ya Poul atayɛ. Ee mbembiri bu, ee becinji nụ ụshɛpwụ ata, ee heŋshi maa du bu 'wi ya.

²⁰Ama gana na te eseshi-iyi shikekeni oo rungwutwonu bu, bɛɛ ishijɛ bee gwuleneni nụ ụshɛpwụ ata. Ama aka na ti iyi heri, ee beni apata abana Banabas, ee zhe Dɛbi.

²¹Aka na ti iyi heri, ee enenji Anabarɛ Ebiye nụ ụshɛpwụ ata, ee gwushiji eseshi-iyi gembi ufwugwo, nazhɛ ee gwuri nu Lusitra, keeni Ikonium, keeni Antiok.

²²Oo to atɛtanɛ-rishe ikɛnyi dimi, aa hiɛcɛnjɛ aŋ u'waba maa ga a untangana rishe-tɛtɛtana gbam. Ee mbishi aŋ, ɛɛ hiɛŋ, I shɛ tilɛɛ maa ụbaụta ufwugwo utu vwutengeni nazhɛ to tono Cɛnjɛ-ta-tugwama ta Agwatana.

²³Aka na te e teleji aŋ n-nyarɛ[58] na tụ'ụlwatagwụ-tụ-ụhiɛŋshɛ-Agwangwama, tedure na adua tɛnda keeni ezumi, nazhɛ ee utegeni aŋ Agwangwama na aa tɛtanɛ-rishe.

²⁴Ta a banɛ apata, ee duri Pisidia, nazhɛ ee zhe Pamfilia.

²⁵Aka na te e enenji n-ndumwa ma ata ni Pɛga, nazhɛ ee zhe Atalia.

²⁶Aka na te e beni na Atalia, ee teni ụhaŋtụ, ee zhe Antiok, no ofwo na ee tileneni aŋ la tulubo-ti-biye ta Agwatana, iwɛ ugondu wa aba na aa ụrɛcɛnjɛ tɛnda na aka ata.

²⁷Aka na te e ci Antiok, oo sotulonu tụ'ụlwa-tụ-ụhiɛŋshɛ-Agwangwama urubwo uko, ee swegeni aŋ iyi elele nɛ Agwatana njɛ tedure na aba, maa bi kepishingeni atwa na shɛ shɛ Eju odubo rishe-tɛtɛtana.

²⁸Aa namɛ apata te ilegeji na atɛtanɛ-rishe.