Read bassa UGONDU WA ATUMWA 18 Bible Online

UGONDU WA ATUMWA 18 - bassa bible

UGONDU WA ATUMWA 18

¹Na aba inɛ gɛ, go Poul genji Atɛns, bee hwuri Korint.

²Baa twa ne Biju bu ko na ɛɛ hiɛŋ, ga Akwila, na shɛ bụtụ bu Pontus, ne biyikwo bwa ge Prisila, e te ilegeji shi ta a banɛ ni Itali o. Iwɛnɛ ti ge Kilaudius na shɛ uhiu cɛnjɛ ta ata peni Eju elele unu maa ge beni nu Rom. Ibɛ po go Poul tuba zhajɛ no ofwo aba,

³baa jɛjɛ na aba, aa nda ugondu, iwɛnɛ ta tihinya ta aba tɛ shɛ tu ko. Shimwono-shi-tugwuno aa nda.

⁴Go Poul ba duma n-ndumwa nụ Ụjita-ụhinjanụ we elele, baa njɛ maa shihaŋsa she Eju keeni Egrik shi leni.

⁵Aka na ga Sailas no Timoti banɛ nu Masɛdonia, ee ci apata, i tɛtajɛ kaa Poul maa ananga iwɛ ya Agwatana, bee le tiseyida no ofwo Eju, bɛɛ hiɛŋ, Ge Jisus ubwa shɛ ga Krast.

⁶Aka na ta a sukakanɛ Poul, ee gbezhiji bu, bee bibizeni aŋ tugwuno tu bwa,[70] bɛɛ hiɛŋ aŋ, Tijama tu ufwu hiŋ tɛnda tu namɛ no ohiuhiu hiŋ. N namɛ shɛshɛshɛ no olugwo hiŋ. Te kwuni na aka ga, N zhɛ no ofwo atwa na shɛ shɛ Eju.

⁷Tu go Poul beni apata, bee zhe ni ihwɛ bụtụ bu ko na ɛɛ hiɛŋ, ge Titius Justus[71] na ba zhɛba Agwatana. Ihwɛ ibwɛ dongonu umwono tụ'ụlwatagwụ.

⁸Ama ge Krispos, na shɛ uhiu umwono tụ'ụlwatagwụ tɛtanɛ Agwangwama rishe, ta atwa ihwɛ ibwɛ hwɛɛ. Atwa Korint a na gembi ufwugwo tɛtanɛ du rishe na aka na ta a hwụjɛ iwɛ ubwa, aa njɛ aŋ ubaptizim.

⁹Ama Agwangwama mbishi Poul iwɛ nụ ụjita no ozobu, bɛɛ hiɛŋ bụ, Ta nda inyɛsɛ o, ama na duma iwɛ, ta nama shiru o.

¹⁰Iwɛnɛ po N namɛ na bụ, i zasa bụtụ na zhɛ me bu suleni maa ma bu gwụcɛnga o. Iwɛnɛ tu Ngaa 'yajɛ atwa gembi ufwugwo nụ ụshɛpwụ ga.

¹¹Ibɛ po go Poul namɛ apata uywa uko ni ipiɛnɛ icihiŋ, boo mbisono aŋ n-ndumwa ma Agwatana.

¹²Ama aka na tu ga Galio shɛ ugwomina wa Akaya, Eju ishijɛ na ahaŋsa oko, aa sukakanɛ Poul, ee zeriji bu no ogbudu ụshɛrɛya.

¹³Ɛɛ hiɛŋ, Bụtụ ga ba duma n-ndumwa mu na mi zhɛ ma nda maa shihaŋsa sha atwa shi leni maa a na zhɛba Agwatana, nu uhwaŋna na Undwa tu leni shi!

¹⁴Gana na tu go Poul ba jala maa kɛpishinjɛ unu ubwa maa dumana iwɛ, ga Galio hiɛŋ Eju ata, Ahiɛba Eju, yaa ga shɛ iwɛ n-ndumwa mo orugwusu mu ko kwo kaa iyi iwɛ ike i'wɛtwɛ bụtụ ga njɛ, N ngɛ zhɛ ma hwulaga n-ndumwa mi hiŋ tebiye.

¹⁵Ama gana na ti yaa shɛ iwɛ iheŋteni iwɛ ike, keeni iwɛ izeci, keeni iwɛ Undwa hiŋ, asha duma mu ma ni ikɛnyi hiŋ, i n kwụlanɛ shɛ maa Ma sha bɛjɛmɛ-bụ-ụshɛrɛya bu n-ndumwa mu ga o.

¹⁶Nazhɛ bee unzhi aŋ no ogbudu ụshɛrɛya ubwa.

¹⁷Nazhɛ aa jɛshɛrɛjɛ hwɛɛ aba aa 'imɛ Sostɛnes, na shɛ uhiu umwono tụ'ụlwatagwụ, ee jibi bu nu umbe ogbudu ụshɛrɛya. Ama i te shi Galio okwo iyi ike ya nda ba o.

¹⁸Ama go Poul namɛ nu Korint ijitɛ ifwugwo, nazhɛ bee genji miauụ-mo-bino ma ata, bee teni ụhaŋtụ be zhe Siria, Ge Prisila na Akwila zhagajɛ nu bwa. Aa hwajɛ tihiŋzhe tu uhiuhiu Poul ni Kɛnkɛria, iwɛ unu na bee shiri.

¹⁹Ama aka na te e ci Ɛfɛsɛs, go Poul genji ata Prisila na Akwila apata, bee teni nu umwono tụ'ụlwatagwụ bwooko, baa njɛ ashamanjɛ ne Eju.

²⁰Aka na ta atwa Ɛfɛsɛs hiɛŋ bụ ga kaana ti'ilogogo na ba, baa lacɛ.

²¹Ama bi mbishi aŋ, bɛɛ hiɛŋ, Yaa shɛ Agwatana leni, N tɛ zhɛ me gwure pi hiŋ, nazhɛ bee genji aŋ bee teni ụhaŋtụ bee beni nɛ Ɛfɛsɛs.

²²Aka na tu baa banɛ nụ ụhaŋtụ ni Sɛsɛria, bee munji Jɛrusalɛm, baa 'walụ tụ'ụlwa-tụ-ụhiɛŋshɛ-Agwangwama, nazhɛ bee zwe Antiok.

²³Tu go Poul jɛjɛ apata fwalaa, nazhɛ bee hwuri, bee duleji a'una Galatia, keeni Frigia na mama 'wanụ, boo to eseshi-iyi kpaaŋ ikɛnyi dimi.

²⁴Bụtụ bu ko na ɛɛ hiɛŋ, ga Apụlụs, na udenji ubwa ụ shɛ Alɛkizandiria, zhajɛ Ɛfɛsɛs. Bụtụ ata 'yebi n-ndumwa mi biye tụdụma, baa 'yajɛ kaa ikɛnyi na tɛnda ti iyi nɛ Utakada Iwɛ ya Agwatana ya duma.

²⁵Bɛ shɛ bụtụ na ee mbisegeni iwɛ uhwaŋna wa Agwangwama, iwɛnɛ tu baa 'yajɛ tɛzhɛgɛdana na ahaŋsa ubwa, ba duma iwɛ, boo mbisogono atwa iyi nɛ i shɛ inɛ Jisus te teni cɛŋ tebiye. Ama iwɛ ubaptizim Jon kiri baa shɛ bugwoni bi ibɛ.

²⁶Bee kwuni iwɛ tụdụma ne eshe-hwoo nu umwono tụ'ụlwatagwụ. Ama aka na ti ge Prisila keeni Akwila hwụjɛ iwɛ ubwa, ee shepi bu no ofwo aba, ee keeni bu uhwaŋna wa Agwangwama ti'eshicigono kpataa.

²⁷Aka na tu ga Apụlụs ba jala maa zha Akaya, miaụŋ-mo-bino mu na mu namɛ nɛ Ɛfɛsɛs mi 'nyeteni atɛtanɛ-rishe a na namɛ na Akaya utakada, maa ge leshiji bu. Aka na ti bee ci apata, bee mbiyeni atwa na tɛtanɛ-rishe tedure no tulubo-ti-biye tebiye.

²⁸Bee ngezeni Eju na ashamanjɛ a'wụtụ ne eshe atwa kpataa, bee shepi Utakada Iwɛ ya Agwatana bee mbiseni aŋ maa ge Jisus ubwa shɛ ga Krast.