Read bassa UGONDU WA ATUMWA 19 Bible Online

UGONDU WA ATUMWA 19 - bassa bible

UGONDU WA ATUMWA 19

¹Aka na tu ga Apụlụs namɛ nu Korint, go Poul tuba duleji a'una na zeteji uuwa bee ci Ɛfɛsɛs. Apata baa kwụbɛ eseshi-iyi oko.

²Bee heŋteni aŋ, bɛɛ hiɛŋ, Hi loshigwo yibwa Mpiala mi Tijilo hŋ ta ahiɛ tɛtanɛ bana rishe?[72] Ɛɛ jishijɛ bụ, ɛɛ hiɛŋ, Awo, okwo Mpiala mi Tijilo mu namba, tu ta hwụjɛ shɛ o.

³Go Poul heŋteni aŋ, bɛɛ hiɛŋ, Ubaptizim imbe tuba aa hiɛ njɛɛ? Ɛɛ jishijɛ bụ, ɛɛ hiɛŋ, Ubaptizim Jon.

⁴Go Poul hiɛŋ aŋ, Ga Jon njɛ atwa ubaptizim wa ahaŋsa-tɛjɛshɛrɛga, bɛɛ hiɛŋ atwa, ga a tɛtana bụtụ na be ci ne ekwunyi ubwa rishe, ubwa shɛ ge Jisus.

⁵Aka na ta a hwụjɛ iwɛ ɛtɛ, aa njɛ aŋ ubaptizim ni izeci ya Agwangwama Jisus.

⁶Aka na tu go Poul petengeni aŋ i'ɛlɛ, nazhɛ Mpiala mi Tijilo mu zwe nu uhiuhiu wa aba, ee kwuni rɛjɛmɛ ri nya keeni tigesere tụdụma.[73]

⁷Etwenyi ata hwɛɛ namɛ gana atwa umpwa-na-ba-eyebi.

⁸Go Poul bo tono nu umwono tụ'ụlwatagwụ, baa duma iwɛ ne eshe-hwoo uuwa i ci ipiɛnɛ itɛtu. Baa dumanga n-ndumwa na aba, maa shihaŋsa sha aba shi leni iwɛ Cɛnjɛ-ta-tugwama ta Agwatana.

⁹Ama shihaŋsa sha atwa oko shi hweteni, aa lacɛ rishe-tɛtɛtana, aa dumangana Uhwaŋna ga wa Agwangwama iyi iwɛ, ne eshe atwa kpaaŋ. Ibɛ po go Poul beni no olugwo aba, boo bogwu eseshi-iyi swooŋ, baa dumanga iwɛ na aba iyi-heri iyi-heri nu umwono umakarata Tairanus.[74]

¹⁰Gabata baa njɛ na aba uuwa i ci shiywa shi yebi. Atwa elele na namɛ ne Esia hwụjɛ iwɛ ya Agwangwama, te Eju, ta atwa na shɛ shɛ Eju.

¹¹Agwatana njɛ ugondu tedure ni i'ɛlɛ Poul uhwuri unaa na baa shana ba nda aka aka.

¹²O sugo tugwuno ti ibwɛzu keeni akwụgba Poul aa 'waŋnana agwumashɛ, ụngwụ wa aba wo hwuwowu, tu mpiala mụ wɛ ma bana na shɛmɛ sha atwa.

¹³Ama atwa oko na ashashɛ Eju a na shɛ awa-inibi aba, o rungo, ee shepi izeci ya Agwangwama Jisus, iwɛ maa a na suyanana atwa na mpiala mụ wɛ mu namɛ na shɛmɛ sha aba, iwɛ maa ɛ nɛ hiɛŋ, M bu teji izeci Jisus na go Poul ba ananga.

¹⁴Miaụŋ-me-eyi me Biju bu ko na shɛ Bunonongbo bụ 'wụtụ, na ɛɛ hiɛŋ izeci ibwɛ ge, Sikiva, mi cenje, aba a nda iŋ.

¹⁵Ama mpiala ma ata mụ wɛ mi jishijɛ aŋ, mɛɛ hiɛŋ, M mepi Jisus, Ngee mepi kaa iwɛ Poul, ama ata aba tuba ahiɛ shɛɛ?

¹⁶Nazhɛ bụtụ ata mpiala ma ata mụ wɛ mu namɛ na amɛ ubwa jwe ungapa, bee zweni aŋ, ukpahiŋ ubwa hwuri una aba hwɛɛ, bee jibi aŋ. Nazhɛ ee beni nu umwono ata mohondo keeni ụngwụ-tu'ala, ee gezheji.

¹⁷Atwa elele na namɛ nɛ Ɛfɛsɛs hwɛɛ, te Eju ta atwa na shɛ shɛ Eju, hwụjɛ iwɛ ɛtɛ. Ibɛ po inyɛsɛ shɛ aŋ hwɛɛ, nazhɛ izeci ya Agwangwama Jisus keeni ụjɛrụma ti'yaga.

¹⁸Atwa ofwugwo a na tɛtanɛ-rishe, zhajɛ ee sweji iyi nɛ aa ga nda nu unu wa aba.

¹⁹Atwa na ga nda la tishino, suje atakada aba tishino, ee suteni aŋ urubwo uko, ee hwoŋzhinji aŋ ne eshe atwa kpaaŋ. Aa imanjɛ ulumo ukwuribi wa aba, aa kwụbɛ maa ụ shɛ azụrụfa arinya igbɛɛ-woshi-ni-bɛ-tɛ (50,000).

²⁰Ibɛ po ukpahiŋ n-ndumwa ma Agwangwama keeni ugombo, woo mburusonu.

²¹Na aba na ti inɛ gɛ hwuwowu hwɛɛ, nazhɛ Mpiala mi 'yagajɛ Poul[75] maa haŋsa maa bi zhɛ bo dulo Masɛdonia keeni Akaya, maa zha Jɛrusalɛm. Bɛɛ hiɛŋ, Na aba na ti Ngee ci Jɛrusalɛm, i n shanɛ du tilɛɛ maa ma zha ma kwụba Rom.

²²Go Poul tumwanɛ atwa eyebi na amɛ atwa na o mbiyono bu ugondu, aba shɛ go Timoti keeni Erastus, maa e zhe Masɛdonia keeni Akaya. Ubwa tuba tɛ zhɛ ba nama nu ukpeleshi cɛnjɛ te Esia na aka fwalaa.

²³Shɛ ohwulu tuhorukono iticwɛŋ ishijɛ nɛ Ɛfɛsɛs iwɛ Uhwaŋna wa Agwangwama o.

²⁴Bụtụ bu ko na ɛɛ hiɛŋ, gɛ Dɛmɛtrius, na shɛ bụlụma ba azụrụfa, bee shepi azụrụfa baa njɛ isume tuwa tu na ɛɛ hiɛŋ, Atɛmis. Ule na bee sugeni atwa na a nda injɛɛnjɛɛ i'ɛlɛ zasa cwɛŋ o.

²⁵Atwa ata aba ba suyanɛ maa a ulwa, keeni atwa na a nda du ugondu gana ata aba, bɛɛ hiɛŋ aŋ, Ahiɛba atwa vwɛ, hi mepi hŋ maa nu ugondu ga ata 'yaga uduciya tu?

²⁶Ahiɛba ni ikɛnyi hiŋ, hiɛ kwụbɛ, ahiɛ hwụjɛ du maa shɛ nɛ Ɛfɛsɛs ga kiri go Poul ga ba jɛsharaga-shihaŋsa sha atwa o, baa inzhanga atwa ofwugwo, tutu ukpeleshi cɛnjɛ tu ga te Esia hwɛɛ. Bɛɛ hiɛŋ, Tuwa tu na bụtụ njɛ ni i'ɛlɛ, tɛ shɛ shɛ Agwatana o.

²⁷Ebe na namba shɛ shɛ maa ugondu ga tu kiri aa nda ufwu o, ama maa du kede isume tuwa tu ga to o tụ 'wụtụ ɛɛ hiɛŋ, Atɛmis i shɛ ya iyi elele o, ee zucinje du igɛhi ɛtɛ ibwɛ i'wɛtwɛ. Ubwa kaa atwa Esia keeni atwa unyizo hwɛɛ a zhɛba.

²⁸Aka na ta a hwụjɛ iwɛ ɛtɛ, isɛbwɛ shini shɛmɛ sha aba, aa uganɛ, ɛɛ hiɛŋ, Atɛmis, gabụ biyikwo ba atwa Ɛfɛsɛs na shɛ biyikwo bụ 'wụtụ.

²⁹Nazhɛ ụshɛpwụ ata namɛ kobu kobu hwɛɛ. Aa 'imɛ Gaiyos keeni Aristakus, aba shɛ atwa eyebi a na banɛ nu Masɛdonia, a na zhagajɛ no Poul na tahaŋnụ tu bwa. Ibɛ atwa ata suri na ahaŋsa oko, ee teni nu umwono tụ'ụlwatagwụ.

³⁰Aka na tu go Poul ba jala maa tono no ofwo atwa ata, ama eseshi-iyi leneni shi bu o.

³¹Atwa oko a na shɛ eyejilo Poul na ashashɛ a'yagajɛ Esia tumwananɛ bụ butumwa, aa lụpɛ bụ, maa kede kara maa tono nu umwono ata tụ'ụlwatagwụ o.

³²Iwɛnɛ po atwa oko uganɛ iyi ike, anya atwa a ugana inyɛ iyi, iwɛbɛ po tu'ulwa ta ata tu namɛ kobu kobu. Pa'ụtụ atwa ofwugwo mepi shi ecilo no po atwa ata zhajɛ aa ụlwatagwụ o.

³³Ama Eju bɛcinjɛ Alɛkizanda nu ofwugwo ata, ee shepi bu nu umbe. Nazhɛ ga Alɛkizanda njɛ aŋ u'ala kwupekwupe, maa a nama shiru, iwɛnɛ tu baa jala maa sweji unu ubwa.

³⁴Ama aka na te e eshiciji maa Biju baa shɛ, aa uganɛ zhiaaŋ hwɛɛ aba te ilegeji duwa, ɛɛ hiɛŋ, Atɛmis, gabụ biyikwo ba atwa Ɛfɛsɛs bụ 'wụtụ.

³⁵Aka na te bi'nyeci bụ ụshɛpwụ ata njɛ maa go ofwugwo wa atwa ata nama shiru, bɛɛ hiɛŋ, Ahiɛba atwa Ɛfɛsɛs, Gaaba ta namba te mepi shi maa ụshɛpwụ ga wɛ Ɛfɛsɛs, ubwa shɛ bungbaracɛ bi isume Atɛmis ga ụ'wụtụ, keeni itɛtɛnuwɛŋ ibwɛ nɛ banɛ na azuba layɛɛ?

³⁶Iwɛ ecilo ata, gana na ti ijɛ zasa ashamanjɛ, hiɛ shɛ hia nama shiru, maa kede hiɛ njɛ iyi elele nu uzawa tuhaŋsa o.

³⁷Hi zɛrijɛ atwa ga epe, e zunji shi kaa i'wɛŋnɛ nsumo mu tu o, a dumanganɛ shɛ kaa tuwa tu tu n-ndumwa mụ wɛ o.

³⁸Yaa shɛ gɛ Dɛmɛtrius keeni atwa ugondu i'ɛlɛ a na namɛ nu bwa 'yajɛ ashamanjɛ na bụtụ be elele, umwono-ụshɛrɛya kapɛshɛngwawa, ogwomina kaa namba, asha ga mama suyaganụ ụshɛrɛya apata.

³⁹Ama yaa shɛ ahia jalakaka iyi elele iwɛ n-ndumwa mi nya,[76] asha i shɛ tilɛɛ maa hi kwụnanjɛ muna ata na tu'ulwa tu na tɛ shɛ ma tu tu undwa.

⁴⁰Iwɛnɛ po ebe zhɛ ma tu mana, ti yaa shɛ aa tu suyanɛ ụshɛrɛya iwɛ ujasa tibila hwuwayɛ, tu zasa kaa ecilo na teni cɛŋ maa ta pana iwɛ ti'ima tu ga o.

⁴¹Aka na tu baa jɛmɛ iwɛ ɛtɛ, baa kwunanjɛ tu'ulwa.