Read bassa UGONDU WA ATUMWA 20 Bible Online

UGONDU WA ATUMWA 20 - bassa bible

UGONDU WA ATUMWA 20

¹Aka na to rundu ra ata ru hwuwowu, go Poul tumwanɛ maa ga suyanɛ eseshi-iyi, bee keeni aŋ ikɛnyi duwa, baa 'walụ aŋ, nazhɛ baa njɛ aŋ ongbo, bee beni apata bee hwuri Masɛdonia.

²Bee duleji ekpekpe aba, bee keeni aŋ ikɛnyi nu n-ndumwa mu ufwugwo, nazhɛ bee zhe na cɛnjɛ te Egrik.

³Aka na tu baa namɛ apata ipiɛnɛ itɛtu, Eju imanganjɛ gana na maa a kwụnɛ bụ ti bɛɛ zhɛ bo tono ụhaŋtụ. Ibɛ po ahaŋsa oko hiɛŋ bụ go gwulo maa dulo Masɛdonia.

⁴Ibɛ po go Sopata, yɛu Pairus na shɛ bụtụ bi Bɛria na Aristakus, na Sɛkundus a na shɛ atwa Tɛsɛlonika, na Gaiyos na shɛ bụtụ bi Dɛbi no Timoti, na Taikikos keeni Trofimus a na shɛ atwa Esia, she bu tutu Esia.

⁵Ama atwa ata tuba e tu hwuleni aa tɛ 'yacɛ nu Troas.

⁶Aka na ti Isene iyimɛyɛ uzawa Ifucingɛ keshici, eti teni ụhaŋtụ, eti beni ni Filipai, ati namɛ ijitɛ itɛ nu uhwaŋna nazhɛ eti ci ofwo aba nu Troas. Atu namɛ apata ijitɛ icenje.

⁷Aka na tụ ụjita bu ulade ci, atu ụlwatagwụ maa ta nda titeyinje, go Poul jɛmɛ n-ndumwa na atwa ata. Iwɛnɛ bee heŋshi maa bi zhɛ bo hwulo ti iyi heri, baa uranjɛ n-ndumwa mu bwa tụdụma uuwa ụjita dwonu.

⁸Asụtụla ofwugwo namɛ nu umwono ata wa azuba atu ụlwatagwụ.

⁹Usemberi uko na ɛɛ hiɛŋ, ge Itikus, ga jɛjɛ nu uwundu umwono ata, bee leyi malabụ mụ 'wụtụ. Tu go Poul uranjɛ n-ndumwa mu bwa tụdụma te ilegeji, ge Itikus bɛzhɛrɛngwa nu umwono ata wa azuba ụtatụ baa layɛ bee 'wi, ɛɛ ishicinjɛ bụ.

¹⁰Ama aka na tu go Poul zwe, bee ubeni bu, baa halanganɛ bụ, bɛɛ hiɛŋ aŋ, Ta nda ma rundu o, bwoonu ta hwungwa.

¹¹Go Poul munji sasana nu umwono ata wa azuba. Aka na tu boo dwotwogonu ibrɛd ɛtɛ baa yɛ, bee keeni n-ndumwa tụdụma na aba te ilegeji, uuwa iyi heri, nazhɛ bee hwuri.

¹²Nazhɛ aa shapɛ usemberi ata tu baa shɛ ya buumwa, shɛmɛ sha aba shɛ na shi lemi shɛ zasa cwɛŋ o.

¹³Ama atuba tu hwuri umbe, eti teni ụhaŋtụ, eti ci Asos, apata ata jala maa ta shapa Poul nụ ụhaŋtụ. Iwɛnɛ tu baa imanjɛ na ahaŋsa ubwa maa ni ivwunɛ bɛɛ zhɛ bɛ zhɛ tahaŋnụ na cɛnjɛ maa to apata.

¹⁴Ama aka na baa twa no tu na Asos, eti shepi bu, ati zhajɛ Mituline.

¹⁵Eti beni apata eti teni ụhaŋtụ otu to tuhwulo geri-be-eshe, eti zhe Kios, ti iyi heri nazhɛ ati zhajɛ Samos, nụ ụjita ụtatụ nazhɛ eti ci ya Militus.

¹⁶Go Poul imwangwa na ahaŋsa ubwa maa kashɛka Ɛfɛsɛs nụ ụhaŋtụ, iwɛ maa kede nda aka ufwu ni Esia o. Iwɛnɛ tu baa nda izɛlɛgwu, maa yɛɛ gɛ zhɛ yo tumono bu maa nama nu Jɛrusalɛm nụ Ụjita Pɛntɛkost.

¹⁷Go Poul tumwanɛ bụtụ na beni ni Militus i zhe Ɛfɛsɛs maa suyanɛ n-nyarɛ mụ Tụ'ụlwa-tụ-ụhiɛŋshɛ-Agwangwama maa mu zhajɛ pu bwa.

¹⁸Aka na te e ci pu bwa, bɛɛ hiɛŋ aŋ, Ahiɛba ni ikɛnyi hiŋ hi mepi du maa taa nụ ụjita na Ngee ci cɛnjɛ te Esia, Ngaa namɛ ne hiŋ aka elele kpaaŋ.

¹⁹Ngee zucinje ahaŋsa mi hwɛɛ, Ngaa ndanɛ Agwangwama iyi na malaba, na tumanga tu na tu n vwuteni na tuhaŋsagana tu na Eju ma n haŋsagana maa a n njɛ iyi iwɛ.

²⁰Hi mepi du gana na ti Ngee ngwuricinji shi iyi elele nɛ i shɛ titeni ti hiŋ, ama N hi mbisegeni iyi ne eshe atwa kpaaŋ, tu nhwaŋ mi hiŋ.

²¹N le tiseyida no ofwo Eju, iwɛ ahaŋsa na aa jɛshɛrɛjɛ ee zhe no ofwo Agwatana keeni rishe ru na aa tɛtanɛ Agwangwama tu Jisus.

²²Hwuwayɛ go, hioko ma, Gamba na Mpiala mu tɛtajɛ, maa ma zha Jɛrusalɛm, M mepi shi kaa iyi nɛ zhɛ mo n vwutono apata o.

²³Ama Mpiala mi Tijilo kiri mu mo n mbiso nụ ụshɛpwụ ụshɛpwụ maa, tukapa nu umwono-tishi keeni ụbaụta n 'yacɛ ba.

²⁴Ama iwɛ uraiŋ mu ukɛnyi mu n te shi o, iwɛnɛ tu Ngaa rɛcɛ shɛ uŋ maa ụ shɛ iyi tandụ, iwɛ maa mo hwuwo ugondu na Ama nda; ubwa shɛ ugondu ata Agwangwama m peni maa ma nda. Ugondu ata ubwa shɛ maa ga ma la Anabarɛ Ebiye u tulubo-ti-biye ta Agwatana tiseyida.

²⁵M mepi maa ahiɛba na Ngee rinji na ashashɛ hiŋ hwɛɛ hiŋ, Ngee enengeni iwɛ Cɛnjɛ-ta-tugwama ta Agwatana, i zasa bụtụ be elele na tɛ zhɛ ma n kwụba ya kwukwuŋ.

²⁶Iwɛbɛ po Omo hi mbiso hwayɛ ga kpataa, maa N namɛ shɛshɛshɛ, N zasa ya tijama tu uraiŋ bụtụ be elele na ashashɛ hiŋ o.

²⁷Iwɛnɛ po N hi swekeni shi iyi elele o, ama N hi swegeni ukwulana wa Agwatana hwɛɛ.

²⁸No momo shiyono ma eshe ni ikɛnyi hiŋ, keeni iwɛ unyama wa agwụdụ kpaaŋ a na Mpiala mi Tijilo mɛ hiɛ njɛ eshiyeni-eshe, maa gana a'iywa, maa hi na ngbaraka tụ'ụlwa-tụ-ụhiɛŋshɛ-Agwangwama[77] tu na boo so ne mehieŋ mu bwa[78]

²⁹M mepi maa gunu na ti Ngee beni epe, atwa na shɛ gana ogwusu na e sure nyarɛrɛ, zhɛ e teni na ashashɛ hiŋ, a zha shɛ o hioko inyɛmɛnyɛmɛ unyama wa agwụdụ o.

³⁰Na amɛ na amɛ hiŋ kaa atwa oko zhɛ ɛ ishijɛ, maa a na dwatwaga ụzagwụ, maa o mbo eseshi-iyi oko maa a 'wa aŋ.

³¹No shiyono ma eshe, teyinje ma maa shiywa shɛ tatụ Ngaa tɛtaganɛ bụtụ bụtụ hiŋ unu tụ ụjita tu uwaŋna, na malaba.

³²Hwuwayɛ go, Mo hi utogono Agwatana keeni tulubo tu bwa ti biye, ubwa eri ma hi ma, maa ma hi pana du iyi nɛ i shɛ urobwo hiŋ na ashashɛ atwa elele na ee tileni swooŋ.

³³N njɛ shɛ eshe iyi ukwuribi kwo kaa tugwuno ta bụtụ be elele na ashashɛ hŋ o.

³⁴Ahiɛba ni ikɛnyi hiŋ, hi mepi maa i'ɛlɛ gɛ mi, Ngaa njɛ iyi iwɛ ukekeshi mu keeni iwɛ una wa atwa na namɛ ne mi.

³⁵N hi mbiseni maa ni ikɛnyi tishana nu ugondu gana ga, ibɛ ɛhi zhɛ hio mbiyono atwa na lweji, maa kaa hi ne teyinje n-ndumwa ma ata Agwangwama Jisus jɛmɛ la, ni ikɛnyi ibwɛ, bɛɛ hiɛŋ, Bụtụ na ba pana bụtụ iyi gwoje, uhwuri bụtụ na aa pana.

³⁶Aka na tu go Poul hwuwi iwɛ gɛ tụdụma, bee kwuzhi na aba hwɛɛ, baa njɛ adua.

³⁷A cwɛ-u'wo hwɛɛ aba, aa ruwanɛ Poul i'ɛlɛ ni i'ilu.

³⁸Inɛɛ nɛ gwumanɛ aŋ uhwuri inɛ vwɛ hwɛɛ, i shɛ iwɛ ɛtɛ bɛɛ hiɛŋ aŋ, Hi zha shɛ hiɛ ma n kwụba ya kwukwuŋ. Nazhɛ ee she bu tutu ụhaŋtụ.