Read bassa UGONDU WA ATUMWA 23 Bible Online

UGONDU WA ATUMWA 23 - bassa bible

UGONDU WA ATUMWA 23

¹Tu go Poul ngbaracɛ atwa-ụshɛrɛya zenjizenji, bɛɛ hiɛŋ aŋ, A-miaụŋ-mo-bino mi, Bimbisegeni-ba-amɛ mi namɛ shɛshɛshɛ ta ulwa ne eshe Agwatana nu ugondu mu te kwuni cala cala uuwa i ci hwayɛ ga.

²Nazhɛ ga Ananias na shɛ Bunongbo bụ 'wụtụ peni atwa na dongonu bu unu maa go o po Poul iyi nu unu.

³Nazhɛ go Poul hiɛŋ bụ, Agwatana zhɛ ma bu pa iyi, gabụ ụdatụ ga aa sụkwụtwa ụhwụla![84] Bɛ jɛjɛ epe maa jɛmɛ ụshɛrɛya mu te teni cɛŋ nu Undwa, iwɛbɛ suu po ebi peni aŋ unu maa go o m po uwaŋpɛ gana na tu Undwa leni shi?

⁴Nazhɛ atwa na dongonu Poul hiɛŋ bụ, Gabụ hŋ ba twagaga Bunongbo bụ 'wụtụ ba Agwatana?

⁵Go Poul jishijɛ aŋ, bɛɛ hiɛŋ, A-miaụŋ-mo-bino mi, N nge mepi shi yebe maa ubwa shɛ Bunongbo bụ 'wụtụ o. Iwɛnɛ te e 'nyeci ni Iwɛ ya Agwatana, ɛɛ hiɛŋ, Ta dumangana uhiu bu iyi iwɛ o.

⁶Aka na tu go Poul mepi maa upada wa aba uko ụ shɛ Asadusi, upada unya ụ shɛ Afarisi, baa uganɛ na ashashɛ atwa ata ụshɛrɛya, bɛɛ hiɛŋ, A-miaụŋ-mo-bino mi me eyi, Bufarisi Ngaa shɛ, Ngaa shɛ kaa du yɛu ya Afarisi. Iwɛ ashɛlatụ tihiɛ ta atwa na 'wi, Ngee shikeni epe maa a jɛmɛ ụshɛrɛya mu.

⁷Aka na tu go Poul jɛmɛ iwɛ ɛtɛ, ashamanjɛ layanɛ Afarisi na Asadusi, nazhɛ tu'ulwa ta ata tu bogwu.

⁸Iwɛnɛ po Asadusi hiɛŋ maa okwo tihiɛ ta atwa na 'wi, keeni atumwa-azuba keeni mpiala zasaba o. Ama Afarisi tuba leni maa i namba hwɛɛ ibɛ.

⁹Nazhɛ n'ungwa mi keeni ugombo, ibɛ po embisegeni Undwa a na namɛ nu upada wa Afarisi ishijɛ, aa njɛ ashamanjɛ, ɛɛ hiɛŋ, Tu kwụbɛtanɛ shɛ bụtụ ga iyi iwɛ ye elele o. Gaaba mepi okwo butumwa-ba-azuba kwo kaa mpiala feye jɛmɛ iwɛ nu bwaa?

¹⁰Ama aka na to tubogwu tụ 'wụtụ ti zhajɛ na ashashɛ aba, ibɛ po inyɛsɛ shɛ uberezhe wa asaza iwɛ maa a dwatwaga hwayɛ Poul. Bee peni asaza ubwa unu maa ge zwi, maa ɛ vwɛ Poul na ashashɛ aba ni iji, maa a shapɛ bụ nu nhwaŋ ma asaza.

¹¹Aka na tụ ụrụmɛ na 'wa una ata shɛ, ibɛ Agwangwama shikeni to dongonu Poul, bɛɛ hiɛŋ bụ, Ima-isɛbwɛ! Gana na ebi le tiseyida ti mi nu Jɛrusalɛm ga, gabata du ɛbi zhɛ ba la tiseyida ti mi nu Rom.

¹²Aka na ti iyi heri, Eju twa-unu, ee shiri-unu, maa aba zha shɛ a ya, a zha shɛ kaa du a swa o, semi aka na aa kwụnɛ Poul.

¹³Atwa na twa-unu ata, hwuri atwa buhanda.

¹⁴Nazhɛ ee zhe no ofwo ehiu onongbo keeni n-nyarɛ, ɛɛ hiɛŋ aŋ, Ti shilwo-unu ụ'wụtụ maa ti zha shɛ ta hwungana iyi elele kwukwuŋ, semi aka na atụ kwụnɛ Poul.

¹⁵Iwɛ ecilo ata hwuwayɛ go, ahiɛba keeni atwa-ụshɛrɛya, tumwana ma maa e mbishe uberezhe wa asaza maa, ge me hi zucingeni Poul, gana maa hia jala maa hi keeni ụshɛrɛya ubwa tụdụma. Tu mama imwa maa ta kwụna bụ tobwolo bi te ci shi urubwo hiŋ o.

¹⁶Ama aka na ti yɛu bụngwụfwụ Poul hwụjɛ maa e gwubeji ba Poul nu uhwaŋna, bee zhe bee teni nu nhwaŋ ma asaza, bee mbishe Poul.

¹⁷Iwɛbɛ po go Poul suyanɛ uhiu wa asaza dipi-yebi uko pu bwa, bɛɛ hiɛŋ bụ, Zarɛga usemberi ga no ofwo uberezhe wa asaza, bi 'yajɛ iwɛ nɛ baa jala maa mbiso bu.

¹⁸Ibɛ po bee zeriji bu ga no ofwo uberezhe wa asaza, bɛɛ hiɛŋ bụ, Bujama ata go Poul ubwa n suyanɛ pu bwa, baa n lụpɛ maa mɛ zɛrijɛ usemberi ga no ofwo bu, asha bi 'yajɛ iwɛ ike baa jala maa mo bu mbiso.

¹⁹Nazhɛ uberezhe ata wa asaza untanganɛ yɛu ɛtɛ u'ala, boo mbo bu geri bu ko, bee heŋteni bu bɛɛ hiɛŋ, Imbe shɛ n-ndumwa mu na aba jala maa m mbishii?

²⁰Yɛu ɛtɛ jishijɛ bụ, bɛɛ hiɛŋ, Eju twawa-unu maa a bụ lụpɛ maa zucinje Poul beyi no ofwo atwa-ụshɛrɛya gana maa ɛ zhɛ a kaana n-ndumwa mu bwa tụdụma.

²¹Iwɛ ecilo ata, to lono maa hwụjɛ-unu wa aba o. Etwenyi na gwubeji bu ba hwuri atwa buhanda, a na shiri-unu ụ'wụtụ maa, aba zha shɛ a ya, a zha shɛ kaa du a swa o, semi aka na aa kwụnɛ Poul. A mama imwa hwuwayɛ go, aa 'yacɛ unu bu tụpana.

²²Ibɛ po uberezhe ata wa asaza hiɛŋ usemberi ata, go hwulo ya, baa tɛtaganɛ bụ unu duwa, bɛɛ hiɛŋ bụ, To mbiso bụtụ be elele maa bu m powo unabarɛ ga o.

²³Nazhɛ uberezhe wa asaza suyanɛ ehiu asaza dipi-yebi ebe yebi, bɛɛ hiɛŋ aŋ, Imanga ma hwayɛ asaza kpakwụ, na asaza na a nda ujasa nu nsanu kpakwụ, na asụcɛ idɛkwɛ dupu-nu-woshi, maa e zhe hwayɛ Sɛsɛria na aka na ta atwa swe meni mụ ụrụmɛ hwɛɛ.

²⁴Imanganga ma iyimabiga nɛ ɛhi zhɛ hia patana Poul, maa hi shepi bu pece, maa hi zhe no ofwo Filikis na shɛ ugwomina.

²⁵Nazhɛ uberezhe ata wa asaza 'nyeci utakada gana ga, bɛɛ hiɛŋ,

²⁶Kilaudius Lusias, No ofwo ugwomina ge Filikis, na shɛ bụtụ bu tukpororo, Okwu yoo.

²⁷Eju imɛ bụtụ ga, i vwɛ cwɛŋ maa a kwụnɛ bụ, aka na ti Ngee Zhe apata na asaza mi, Ngee vwuteni aŋ, Ngee leshiji bu Na aba, iwɛnɛ tu Ngaa hwụjɛ maa bɛ shɛ yɛu-cɛnjɛ tu Rom.

²⁸Aka na Ama jala maa ma mapa ecilo tikpeke no po aa Suyanɛ bụ ụshɛrɛya, Ngee zucinji bu no ofwo atwa-ụshɛrɛya aba.

²⁹Ngoo to ugbe maa iwɛ iheŋtene Undwa wa aba, aa Suyanɛ bụ ụshɛrɛya, ama i zasa iyi nɛ aa Suyanɛ bụ ụshɛrɛya nɛ Waŋnɛ tu'wo kwo kaa tishiyono nu umwono-tishi o.

³⁰Ama aka na te e m mbishi maa ɛ zhɛ a twagwụ bụ unu uko. Ụwɛ, gunu ata Ngaa tumwanɛ bu no ofwo bu. M panɛ du atwa na. Suyanɛ bụ ụshɛrɛya unu maa ge sweji unu wa aba na agba bụ.

³¹Iwɛbɛ po asaza ata shepi Poul nụ ụjita tutu Antipatris, nu gana na te e peni aŋ unu.

³²Aka na ti iyi heri asaza na vwɛ genji asaza na shɛ asụcɛ idɛkwɛ maa a zhagaga no Poul, nazhɛ ee gwure tuba nu nhwaŋ ma aba ma asaza.

³³Aka na te e ci Sɛsɛria, ee peni Ugwomina utakada ata, nazhɛ ee peni bu du Poul.

³⁴Aka na ti bee hwuwi utakada ata tɛrɛta, bee heŋteni iwɛ ukpeleshi cɛnjɛ tu na go Poul banɛ. Aka na te e mbishi bu maa bu banɛ ni Silikia,

³⁵bɛɛ hiɛŋ Poul, N zhɛ ma hwuga n-ndumwa mụ bụ na aka na ta atwa na ubu suyanɛ ụshɛrɛya ci epe. Bee peni aŋ unu maa ga a na ngbaraka Poul nu umwamwa ugwomina gɛ Hɛrod.