Read bassa UGONDU WA ATUMWA 27 Bible Online

UGONDU WA ATUMWA 27 - bassa bible

UGONDU WA ATUMWA 27

¹Ama aka na te e heŋshi maa tɛ shɛ to tono ụhaŋtụ maa ta zha Itali, ee shepi Poul keeni ajama anya ee utegeni uhiu wa asaza dipi-yebi na ɛɛ hiɛŋ, go Julius. Bụtụ bụ ụpadụ cɛnjɛ ta Agustos baa shɛ.

²Aka na eti teni ụhaŋtụ na banɛ Adramaitium na wa jala maa u zhe no ofwo ofwo na namɛ nụ ụpalanụ ukpeleshi cɛnjɛ ti Esia, eti berishiji shilema. Ga Aristakus na shɛ bụtụ bu Masɛdonia, na banɛ Tɛsɛlonika namɛ no tu.

³Ti iyi heri, eti ci Saidụn. Go Julius njɛ Poul tebiye, bee peni bu ohwolu maa bu na zha pe eyejilo ubwa maa a na ima bu u'ala.

⁴Eti beni apata, eti teni ụhaŋtụ, atu palanganɛ tuta tu Saipros, iwɛnɛ tu uvwugo utu sukakanɛ.

⁵Aka na eti keshi itekwu ɛtɛ namɛ geri ba cɛnjɛ ti Silikia keeni Pamfilia, ti yaa namɛ ijitɛ umpwa, nazhɛ eti ci Mura na shɛ ụshɛpwụ na namɛ na cɛnjɛ ti Likia.

⁶Nazhɛ uhiu wa asaza dipi-yebi kwụbɛ ụhaŋtụ Alɛkizandiria na zhɛ Itali, bee tu zweni nu bwa.

⁷Atu sanɛ yɛrɛrɛ, tu namɛ ijitɛ ifwugwo nazhɛ eti ci Kinidus ɛdicɛ. Aka na tu uvwugo ti leneni shi maa ta ta tuhwulo zalụ be eshe, eti zhe atu palanganɛ tuta ti Kirete, na namɛ geri bu Salumon.

⁸Atu palanganɛ ukwoswo, ɛdicɛ nazhɛ eti ci ofwo oko na ɛɛ hiɛŋ, Akpata ebiye, a na dongonu ụshɛpwụ uko ɛɛ hiɛŋ, Lusia.

⁹Ti ilegeji apata tebiye, iwɛnɛ po yaa shɛ otu to tuhwulo tu tahaŋnụ tu tu, asha ebe zhɛ ma tu mana, iwɛnɛ po ụjita we ezumi tɛnda kaa koshikwo[88] ya cebe, go Poul tɛtaganɛ aŋ unu bɛɛ hiɛŋ,

¹⁰Ahiɛba eyejilo mi, N kwụbɛ maa ebe zhɛ ma tu mana, ufwu kaa du zhɛ ma tu nda na tahaŋnụ tu ga tu tu, shɛ i'wɛŋnɛ keeni ụhaŋtụ kiri o, ama ti iwɛ ohiuhiu tu du.

¹¹Ama uhiu ata wa asaza dipi-yebi shɛlajɛ n-ndumwa me bishikecenji bụ ụhaŋtụ keeni agwuma ụhaŋtụ uhwuri mu na Poul.

¹²Ama gana na ta akpata ata zhɛshɛ maa a nama nu ushwo, ibɛ po atwa ofwugwo ụ'wụtụ heŋshi maa ga a ishɛjɛ apata, nekeshi a 'yaga gana na ee eri a nda maa e ci Fonikis, na shɛ akpata Kirete, a na ngbaracɛ tuta tu uwaŋna-twonuo keeni tuzuba tu uwaŋna-twonuo, maa a nama apata na aka bu ushwo.

¹³Aka na tu mpiala mi tipece mu na mu banɛ tuta mɛ njɛ, ee heŋshi maa okwo iyi nɛ aa ga jala zhɛ yo tomo aŋ, ee keri ụshɛmbɛrɛ ata ụ'wụtụ wo shikicingo ụhaŋtụ ne meni, aa palanganɛ ukwoswo Kirete, iwɛnɛ ta a dụlụmɛ shɛ ya nu ukwoswo.

¹⁴Ama i ilegeji shi tu uvwugo uko ụ'wụtụ 'wụtụ na ɛɛ hiɛŋ, Ubwadawara banɛ nụ ụdakwụ itekwu ɛtɛ wee vwunji tebiye tebiye.

¹⁵Aka na tu uvwugo ata 'imɛ ụhaŋtụ, ụhaŋtụ eri shi iwɛ ubwa o, ibɛ po eti gengeni uŋ uvwugo ata, wee tu suji ya.

¹⁶Eti zhe eti ci uhwuŋnu cɛnjɛ tụ ụdakwụ itekwu uko na ɛɛ hiɛŋ, Kauda,[89] ɛdicɛ nazhɛ atu untanganɛ ụhaŋtụ ticwɛŋ maa u shikono dimi.

¹⁷Aka na te e shepi ụhaŋtụ na azuba, ee tecinji ihwehwe tuta tụ ụhaŋtụ, ee umpi uŋ dimi. Iwɛnɛ ta a nda inyɛsɛ iwɛ aka na uvwugo ata zhɛ wo sugo aŋ hwayɛ wa ta nu uhwayɛ ukwoswo na ɛɛ hiɛŋ, Suris, nazhɛ ee zucinji iyi nɛ aa haŋtana ụhaŋtụ maa uvwugo ata suji aŋ.

¹⁸Aka na ti iyi heri, uvwugo ata ụ'wụtụ to waa tuhwulo tebiye, ibɛ po ee kwuni i'wɛŋnɛ ụhaŋtụ tu'waŋ ni itekwu.

¹⁹Ti yaa namɛ ijitɛ itɛtu, ee suji i'wɛŋnɛ nɛ aa ga haŋtana ụhaŋtụ aa 'wɛŋ ni itekwu ni i'ɛlɛ ya aba.

²⁰Ijitɛ nɛ atụ kwụbɛ shɛ uwaŋna keeni mkpasu gembi ofwugwo. Mpiala me eshilo na mu tu vwuteni kaa mɛ shɛ shɛ mpiala mi ticwɛŋ o. I zasa bụtụ be elele na amɛ tu ta 'yajɛ ya ashɛlatụ maa ti tɛ zhɛ to bino.

²¹Aka na ti iyimɛyɛ teni unu bụtụ be elele dụlụmɛ ya. Na aka ata go Poul ishijɛ bee shikeni na ashashɛ aba, bɛɛ hiɛŋ. Ahiɛba eyejilo mi, yaa shɛ ahi ga hwụjɛ-unu mu yebe, ebe ga ga zha shɛ ma tu mana keeni ufwu ga tɛnda o.

²²Ama ma hi kaana ikɛnyi hwuwayɛ go, maa ga shɛmɛ shi hiŋ shi lemi, i zasa uraiŋ bụtụ be elele zhɛ wa ina na ashashɛ hiŋ o, semi ụhaŋtụ ga kiri zhɛ wa nda ufwu.

²³Iwɛnɛ po Agwatana na Ngaa shɛ bu na bwa na kaa Ama ndana iyi tumwanɛ butumwa bwa ba azuba hwayɛ nụ ụjita, bee shikeni pi mi.

²⁴Bɛɛ hiɛŋ, O-Poul, ta nda inyɛsɛ o, bi zhɛ bo shikono na agba Sisa tilɛɛ. Agwatana kaa du ubu utwogwonuo atwa elele na zweni nụ ụhaŋtụ ga na bụ, iwɛ tulubo tu bwa ti biye.

²⁵Iwɛ ecilo ata, ahiɛba eyejilo mi, ga shɛmɛ shi hiŋ shi lemi, N tɛtanɛ Agwatana rishe maa gana ata ti bee m mbishi, gabata yɛɛ zhɛ ya sha.

²⁶Ama ti zhɛ tu mo to cɛnjɛ tu ko nụ ụdakwụ itekwu gɛ tilɛɛ.

²⁷Ama aka na ti ijitɛ umpwa-ni-bɛ-neshi keshici, tu uvwugo mo tu sugo zalụ zalụ bi Itekwu Adria, gana tụ ụjita tudwonu, eheŋteni-ụhaŋtụ heŋshi maa o gwumwonu na cɛnjɛ tu ko.

²⁸Ibɛ po ee menji me'ilwo mi meni ma ata, aa kwụbɛ maa mɛ shɛ ivwunɛ dipi-yebi-nu-woshi, eti keeni izhɛ zalụ be eshe, ee menji mu sasana, maa shɛ ya ivwunɛ dupu-na-buhanda.

²⁹Gana na ta a nda inyɛsɛ iwɛ maa ụhaŋtụ mo tu sugo wa swana nu utayɛ uko ụ'wụtụ, ibɛ po aa 'wɛŋ ashɛmbɛrɛ ata o shikicingo ụhaŋtụ eneshi ne meni, aa nda ya adua maa ge iyi heri.

³⁰Ama aka na te eheŋteni-ụhaŋtụ a jala maa e benengeni nu ụhaŋtụ, ibɛ po ee zucinji ụhaŋtụ ata tidice ni itekwu, gana maa ɛ zhɛ a 'waŋ ashɛmbɛrɛ ata a'wụtụ nu umbe ụhaŋtụ.

³¹Go Poul hiɛŋ uhiu wa asaza dipi-yebi keeni asaza ubwa, Yaa shɛ shɛ aka na te eheŋteni-ụhaŋtụ namɛ nụ ụhaŋtụ, hi eri shi hio bino.

³²Nazhɛ asaza jeji ihwehwe ebe ee umpi ụhaŋtụ tidice, ee genji uŋ maa u hwuri.

³³Gana na ti iyi ya jala tuholo, go Poul tabwa aŋ hwɛɛ aba maa ga a yɛ iyimɛyɛ. Bɛɛ hiɛŋ aŋ, I ulwa ya hwayɛ ijitɛ umpwa-ni-bɛ-neshi ta ahia 'yaka, ahia nda ezumi, ahiɛ yɛ shɛ iyi elele.

³⁴Iwɛbɛ po Ngaa hi tabwa maa hiɛ yɛ iyimɛyɛ iwɛ maa hi nama hwungbɛ. Iwɛnɛ po i zasa bihiŋzhe okwo bu ko zhɛ ba ina nu uhiuhiu bụtụ be elele na ashashɛ hiŋ o.

³⁵Aka na ti bee mbishi aŋ iwɛ ɛtɛ, bee shepi ibrɛd, baa njɛ ugwoje na Agwatana ne eshe aba hwɛɛ, nazhɛ boo dwonu iŋ, bee kwuni tiya.

³⁶Nazhɛ shɛmɛ sha aba shi lemi hwɛɛ, ee leshiji iyimɛyɛ ɛtɛ ni ikɛnyi aba aa yɛ.

³⁷Atuba na tu zweni nụ ụhaŋtụ ata hwɛɛ tu, tu namɛ atwa kpakwụ-nu-dupu-nu-woshi-na-ba-e-cihiŋ.[90] (276)

³⁸Aka na ta a yɛ iyimɛyɛ uuwa ee shigeji, nazhɛ aa bwajɛ shihiu nụ ụhaŋtụ aa 'wɛŋ ni itekwu iwɛ maa ụhaŋtụ nama hɛkɛlɛ.

³⁹Ama aka na ti iyi heri kpataa, eheŋteni-ụhaŋtụ mepi shi ya ukwoswo ofwo ata aa namɛ o, ama a kwụbɛ akpata oko na 'yajɛ ugbongboro, aa jala maa yaa shɛ ee ge eri ma e shepi ụhaŋtụ apata.

⁴⁰Nazhɛ ee jeji ihwehwe nɛ ge umpi ashɛmbɛrɛ ata a'wụtụ, ee genji aŋ maa e zwi ni itekwu. Na aka ata oko oko ee tufwurunji ihwehwe nɛ ge umpi iyi nɛ yo shikocongo ụhaŋtụ, ee berishiji elema na namɛ nu umbe ụhaŋtụ iwɛ maa mpiala mu suji aŋ maa e zhe nu ugbongboro ata.

⁴¹Ama aka na te e ci ofwo na itekwu iyebi twatwagwụ,[91] ee heŋteni ụhaŋtụ uuwa i ci aka na umbe ụhaŋtụ to dimi, waa lacɛ ya bulama tɛnda, nazhɛ ukpahiŋ wa adanga kwuni ya aba ụhaŋtụ tubwada.

⁴²Ibɛ po asaza heŋshi maa ga a kwụnɛ ajama ata, iwɛ aka na bu na be elele na ashashɛ aba zhɛ ba taga hwayɛ ataga ba banangana.

⁴³Ama gana na ti yaa kwụlanɛ uhiu wa asaza dipi-yebi maa bicingo Poul, ibɛ po baa lakanɛ aŋ iyi nɛ aa jala tɛnda. Ama bi peni aŋ unu maa ga atwa na 'yebi ataga mama 'wɛŋ ne meni hiiŋ, maa e ci cɛnjɛ.

⁴⁴Ga atwa vwɛ oko 'wa aŋ maa a untangana ogbogolo ụhaŋtụ, maa atwa oko zelenji na tubwaratagwụ tụ ụhaŋtụ. Gabata aa njɛ nazhɛ ee benengeni ee ci cɛnjɛ lapiya hwɛɛ aba.