Read bassa UGONDU WA ATUMWA 5 Bible Online

UGONDU WA ATUMWA 5 - bassa bible

UGONDU WA ATUMWA 5

¹Ama bụtụ bu ko namba ɛɛ hiɛŋ izeci ibwɛ, ga Ananias keeni biyikwo bwa ga Safaira, e senji i'wɛŋnɛ ike nɛ aa 'yajɛ.

²Baa twa-unu ne biyikwo bwa, ee teri una uko aa intanɛ iwɛ ikɛnyi aba, nazhɛ bee suje una vwɛ bee utegeni atumwa.

³Ama ga Pita hiɛŋ bụ, Ananias, iwembe po ebi leneni Setan maa shino amɛ bụ maa na dwatwagana Mpiala mi Tijilo ụzagwụ maa intanɛ umeseyi ukwuribi i'wɛŋnɛ nɛ ebi senjii?

⁴Shɛ gabụ suu bi 'yajɛ la i'wɛŋnɛ ɛtɛ nazhɛ ebi senji iŋ? Aka na ebi senji iŋ, shɛ gabụ suu bi 'yajɛ du ukwuribi ibɛ? Iwembe po ebi heŋshi iyi gɛnɛ gɛ na ahaŋsa bụụ? Shɛ atwa ebi dwetwegeni ụzagwụ ga o, ama Agwatana.

⁵Aka na tu ga Ananias hwụjɛ iwɛ ɛtɛ, be leyi bee 'wi. Nazhɛ inyɛsɛ i'wɛtwɛ 'imɛ atwa elele na hwụjɛ iwɛ ɛtɛ.

⁶Nazhɛ esemberi teni, ee pipi ru'wo ru bwa, ɛɛ vwɛ rụ no tupohondo, ee shepi ee ne.

⁷Ti yaa namɛ fwalaa, biyikwo bwa zhajɛ, bi mepi shi kaa iyi nɛ nduwa o.

⁸Ga Pita heŋteni bu. Bɛɛ hiɛŋ, M mbishi de, ukwuribi ganana hŋ ehi senji cɛnjɛ ta ata? Ibɛ biyikwo ata jishijɛ bụ, bɛɛ hiɛŋ, Iiŋ, gana waa namɛ ta.

⁹Ga Pita hiɛŋ bụ, Iwembe po ahi twa-unu maa hi menji Mpiala ma Agwangwama hwɛɛ hiiŋ? Hioko ta avwuna atwa na shepi bwolo bu te tileni no odubo, ɛ zhɛ du kaa ma bụ bacɛnga sasana.

¹⁰Gunu ata bee leyi ni ivwunɛ Pita, bee 'wi. Nazhɛ esemberi ata teni, aa kwụbɛ to ru'wo ru bwa ri shiri, ee becinji ru, ee shepi ee ne todongonu bwolo bwa.

¹¹Nazhɛ inyɛsɛ i'wɛtwɛ 'imɛ tụ'ụlwa-tụ-ụhiɛŋshɛ-Agwangwama hwɛɛ, keeni atwa elele na hwụjɛ iwɛ ɛtɛ.

¹²Atumwa njɛ arụhwajɛ keeni iyi tudama na ashashɛ atwamwa. Atɛtanɛ-rishe a ụlwatagwụ na angba Sụlụmụn hwɛɛ aba.

¹³Ama i zasa anya atwa a na eri a kara maa o togwu na atumwa o, ama atwa mụnɛ aŋ ụjɛrụma tebiye.

¹⁴Ama ufwugwo wa atwa na tɛtanɛ Agwangwama rishe wa kaana ugombo, te etwenyi te eyikwo.

¹⁵Iwɛbɛ po atwamwa suje atwa na a gwumanga, ee tileni aŋ nu uhwaŋna, ee wececenji aŋ no shigodo keeni shɛkpa, iwɛ maa okwo gana elele ti yaa shɛ, maa ga uzhizhi Pita ubi aŋ.

¹⁶Ibɛ po ufwugwo ụ'wụtụ bananjɛ na ashɛpwụ na rungwutwonu Jɛrusalɛm, ee suje agwumashɛ aba, ta atwa na mpiala mụ wɛ[19] ma pana ụbaụta, aa nɛnjɛ aŋ hwɛɛ.

¹⁷Nazhɛ isɛbwɛngwɛ shini amɛ Bunongbo bụ 'wụtụ keeni atwa elele na namɛ nu bwa, a na shɛ ụpadụ wa Asadusi, ɛɛ ishijɛ,

¹⁸aa 'imɛ atumwa, ee zweni aŋ nu umwono-tishi na oo zwono atwa elele.

¹⁹Ama butumwa ba Agwangwama ba azuba kepeshenji akpa umwono ata tishi, bɛɛ vwɛ aŋ, bɛɛ hiɛŋ aŋ,

²⁰Zhaga shikono ma nazhɛ nu Umwono wa Agwatana, maa hi mbishi atwa n-ndumwa mu ga mu uraiŋ hwɛɛ.

²¹Aka na ta a hwụjɛ iwɛ ɛtɛ, ee teni nu Umwono wa Agwatana na aasavwungwa, ee mbisegeni atwamwa iyi. Ama aka na to Bunongbo bụ 'wụtụ zhajɛ, na atwa na namɛ nu bwa, aa suyanɛ ajɛmɛ-ụshɛrɛya, keeni atwa a'wụtụ aba keeni ehiu miaụŋ mi Isrɛl kpaaŋ, nazhɛ aa tumwanɛ edegeri maa gɛ vwɛ atumwa ata nu umwono-tishi.

²²Ama aka na te edegeri zhe, a kwụbɛ shɛ aŋ nu umwono-tishi o, ee gwure, aa jɛmɛ, ɛɛ hiɛŋ,

²³Aka na eti ci, umwono-tishi te kepi dimi, a'iywa kaa du te shikekeni no shidubo, ama aka na eti kepishinji odubo, tụ kwụbɛ shɛ ya bụtụ be elele na amɛ umwono!

²⁴Ama aka na tu uhiu wa a'iywa umwono wa Agwatana keeni ehiu onongbo hwụjɛ iwɛ ɛtɛ, yaa dama aŋ, ecilo no po yaa shɛ gana ata.

²⁵Nazhɛ bụtụ bu ko zhajɛ bee mbishi aŋ, bɛɛ hiɛŋ, Kwụba ma, atwa ebe ehi kepi nu umwono-tishi, e mbeye shikekeni nu Umwono wa Agwatana o mbisogono atwa iyi.

²⁶Nazhɛ uhiu wa a'iywa umwono wa Agwatana, keeni edegeri zhe, ee suje aŋ pece pece, iwɛnɛ ta a nda inyɛsɛ iwɛ maa atwamwa a tagana aŋ hwayɛ atayɛ.

²⁷Aka na te e suje aŋ, ee shikicinji na agba atwa-ụshɛrɛya. Nazhɛ Bunongbo bụ 'wụtụ heŋteni aŋ, bɛɛ hiɛŋ,

²⁸Ti ga hiɛ tɛtaganɛ shɛ suu unu tebiye maa, To mbisogono ma ya bụtụ be elele iyi ni izeci bụtụ ga? Ama kwụba ma, te ehi shidinji Jɛrusalɛm ni imbisegeni hiŋ, ahia jala maa hi ti peteni tijama te mehieŋ mu bwa.

²⁹Ama ga Pita keeni atumwa vwɛ jishijɛ aŋ, ɛɛ hiɛŋ, I shɛ tilɛɛ maa ta hwuga-unu wa Agwatana uhwuri una wa atwa.

³⁰Agwatana eshi tu hicinjɛ Jisus ata ehi tegeni la nrɛ nu ụ'wụ'wụ-ubatanɛ, ahiɛ kwụnɛ.

³¹Ama Agwatana gembicinji bu nu u'ala ubiye ubwa, baa njɛ bụ uhiu keeni Bibicinji, maa pana atwa Isrɛl ahaŋsa-tɛjɛshɛrɛga maa gangana aŋ iwɛwɛ ya aba.

³²Atuba kaa tɛ shɛ eseyida iwɛ ɛtɛ keeni Mpiala mi Tijilo mu na Agwatana peni atwa na hwụjɛ-unu ubwa.

³³Ama aka na ta atwa-ụshɛrɛya hwụjɛ iwɛ ɛtɛ, isɛbwɛ munje aŋ duwa. Aa jala maa a kwụnɛ atumwa ata.

³⁴Ama Bufarisi bu ko na ɛɛ hiɛŋ izeci ibwɛ, ga Gamaliɛl, na shɛ bimbisegeni bu Undwa, atwa kpaaŋ kaa a muna bụ ụjɛrụma, bɛɛ ishijɛ na ashashɛ atwa ata ụshɛrɛya. Bee peni aŋ unu maa ge becinji tugwo atumwa na aka fwalaa.

³⁵Aka na ta atumwa beni, bɛɛ hiɛŋ aŋ, Ahiɛba atwa Isrɛl, nda ma pece ni iyi nɛ ahia jala maa hiɛ njɛ atwa ga.

³⁶Aka oko namba la, ga Tɛudas mɛmɛ ishicinjɛ gana bụtụ bụ 'wụtụ, medenji atwa oko gana atwa akpakwụ-eyebi a na modongwu bu. Ama a kwụnɛ bụ, ee gereteji ta atwa ata hwụjɛ la unu ubwa, aa shɛ ya gbom.

³⁷Nazhɛ go Judas bụtụ ata bu Galili, ishijɛ na aba ubwa, na aka na ee 'nyeci la nzeci ma atwa nu utakada, bɛɛ mbɛ atwa oko, aa 'wa bụ. A kwụnɛ bụ du, ee gereteji atwa na hwụjɛ la unu ubwa.

³⁸Mo hi mbiso hwuwayɛ go, maa, Worungo aŋ ma o! Ganga aŋ ma o! Yaa shɛ iyi ya atwa aa haŋsa kwo kaa a nda, asha i zhɛ yo kwu.

³⁹Ama yaa shɛ no olugwo Agwatana yaa banɛ, asha hi eri shi hio ngwuricingo aŋ o. Shibwonu asha hi zhɛ hi mama ta hwuŋ ugbe maa Agwatana ahia sukakana ni ifelu! Ibɛ po shɛmɛ sha atwa-ụshɛrɛya shi leni ahaŋsa na ga Gamaliɛl peni aŋ.

⁴⁰Aka na ta a suyanɛ atumwa, ee jibi aŋ, ee peni aŋ unu maa kede a jɛmɛ ya iwɛ ni izeci Jisus o, nazhɛ ee genji aŋ ee hwuri.

⁴¹Aka na ta atumwa beni na agba atwa-ụshɛrɛya, aa bwada unyasa, iwɛnɛ ta a rɛcɛ aŋ maa a lanɛ maa e peni aŋ ụpụrụsa iwɛ izeci Jisus.

⁴²Ama e genji shi ya tuba atwa iyi timbisogono keeni Jisus tu'anangana atwa iyi-heri iyi-heri o, tu Umwono wa Agwatana, tu nhwaŋ o.