Read bassa UGONDU WA ATUMWA 6 Bible Online

UGONDU WA ATUMWA 6 - bassa bible

UGONDU WA ATUMWA 6

¹Aka na tu ufwugwo we eseshi-iyi wa kaana ugombo, ibɛ po Eju na a duma Rigrik o ngwulongongono Ehibru, iwɛnɛ te e jineci olulo aba ni iyi nɛ ga shɛ maa a na ndana aŋ iyi-heri iyi-heri.

²Ibɛ po atumwa ata umpwa-na-ba-eyebi suyanɛ atɛtanɛ-rishe kpaaŋ, ɛɛ hiɛŋ aŋ, I zhɛshɛ maa ta ganga n-ndumwa ma Agwatana tu'ananga maa tu no hwoŋso iyimɛyɛ o.[20]

³Iwɛbɛ po ahiɛba miaụŋ-mo-bino tu na amɛ Krast, yalaga ma atwa ecenje na ashashɛ hŋ, anaa na shihaŋsa sha aba shɛ zhɛmɛ, a na kaa Mpiala mi Tijilo mi shini na shɛmɛ sha aba keeni ti'inta, maa to utogono aŋ ugondu ata.

⁴Ama ti zhɛ tuba tu mama pana na adua tɛnda, tu na ta tuhwulo nu n-ndumwa ma Agwatana tu'ananga tutu.

⁵Ahaŋsa ata kaa atumwa shileni ufwugwo wa atwa ata kwụlanɛ aŋ hwɛɛ aba, ibɛ po ee teri Stivin, na rishe-tɛtɛtana ri shini amɛ ubwa keeni Mpiala mi Tijilo, ne Filip, no Prokoros, na Naikano, na Taimon, na Pamɛnas, ne Nikolaos, na shɛ Biju na banɛ na Antiok.

⁶Ee suje atwa ata, ee shikicinji aŋ na agba atumwa, nazhɛ atumwa njɛ adua, ee petengeni aŋ i'ɛlɛ ya aba.

⁷Nazhɛ n-ndumwa ma Agwatana ma kaana tumburusonu, ibɛ po ufwugwo we eseshi-iyi wa kaana ugombo nu Jɛrusalɛm. Onongbo ofwugwo ụ'wụtụ leni iwɛ rishe-tɛtɛtana.

⁸Gana na to tulubo-ti-biye keeni ukpahiŋ shini amɛ Stivin, baa njɛ iyi ya arụhwajɛ keeni iyi tudama na ashashɛ atwa ata.

⁹Ama atwa oko umwono tu'ụlwatagwụ (na ɛɛ hiɛŋ umwono tu'ụlwatagwụ wa atwa na ɛɛ jwɛ na tijama)[21] keeni atwa Sareni, na atwa Alɛkizandiria, na atwa na banɛ ni Silikia keeni atwa Esia, kepengeni Stivin na ashamanjɛ.

¹⁰Ama a twa sụ kaa iwɛ ti'inta keeni Mpiala mu na ge Stivin ba duma iwɛ o.

¹¹Ibɛ po aa njɛ atwa oko ụgwụ, ee mbisegeni aŋ maa ga a jɛmɛ maa, Tụ hwụjɛ ta bụtụ ga ba dumangana Moses keeni Agwatana n-ndumwa mụ wɛ.

¹²Ibɛ po ee vwunji shihaŋsa sha atwa ata keeni n-nyarɛ, keeni embisegeni Undwa, nazhɛ aa zhajɛ aa 'imɛ Stivin, ee shepi bu no ofwo atwa-ụshɛrɛya.

¹³Ee shikicinji eseyida tukata a na hiɛŋ, Bụtụ ga genji shi n-ndumwa mụ wɛ tudumangana ofwo ga tijilo keeni Undwa Moses o.

¹⁴Tụ hwụjɛ tu baa jɛmɛ maa, ge Jisus bụtụ ata bu Nazarɛt zhɛ bo hwuŋzo Umwono ga wa Agwatana, maa sheyingo ihɛli nɛ go Moses iti peni la.

¹⁵Aka na ta atwa elele na jɛjɛ na atwa ata ụshɛrɛya, ngbaracɛ eshe Stivin, aa shɛ gana eshe butumwa-ba-azuba.