Read bassa ROM 10 Bible Online

ROM 10 - bassa bible

ROM 10

¹A-miaụŋ-mo-bino mi na amɛ Krast, iyi nɛ n kwụlanɛ na amɛ mi, keeni tutabwa tu na Ama tabwa Agwatana i shɛ iwɛ maa e biciŋji aŋ.

²Iwɛnɛ po Ma la aŋ tiseyida maa a zhɛgɛdanɛ iwɛ ya Agwatana, ama e mepi shi ijiji tebiye o.

³Gana na te e mepi shi tiririri ta Agwatana, ibɛ po aa jalakaka maa e shikicinji tiririri ta aba dimi, iwɛnɛ te e leni shi maa Agwatana 'yaga ụhwada wa aba ne tiririri tu bwa.

⁴Ga Krast ubwa shɛ ukwunanga Undwa, iwɛ maa tiririri tu namana bụtụ be elele na tɛtanɛ-rishe.

⁵Go Moses 'nyeci, bɛɛ hiɛŋ, Bụtụ na ba nda tiririri tu na tu banɛ nu Undwa, bi zhɛ ba ya uraiŋ na tuba.

⁶Ama tiririri tu na tu banɛ ne rishe-tɛtɛtana ta duma, tɛɛ hiɛŋ, Ta duma na ahaŋsa bu maa, Gaaba zhɛ bo mungo na azubaa? (Ibɛ po ee zucinje Krast);

⁷kwo kaa maa hiɛŋ, Gaaba zhɛ bo zwo ne e'uyee? (Ibɛ po ɛɛ vwɛ Krast no olugwo atwa na uwo).

⁸Asha imbe yɛɛ hiɛŋ yaa? I hiɛŋ, n-ndumwa ma ata mu gwumwongonu nu unu bu, keeni amɛ bụ, (ibɛ shɛ n-ndumwa me rishe-tɛtɛtana mu na ata ananga);

⁹maa yaa shɛ ebi leni nu unu bu maa ge Jisus ubwa shɛ Agwangwama, abu tɛtanɛ kaa rishe na amɛ bụ maa Agwatana hicinji bụ no tu'wo, asha ɛ zhɛ mo bu bicingo.

¹⁰Iwɛnɛ po na amɛ, bụtụ ba tɛtana-rishe nazhɛ aa pana bu n-ndumwa-zhɛ, nu unu kaa, bụtụ bo lono nazhɛ boo bino.

¹¹Utakada Iwɛ ya Agwatana hiɛŋ, Bụtụ be elele na tɛtanɛ bu rishe, ezuye zha shɛ a sha bu o.

¹²Biju na bụtụ na shɛ shɛ Biju zasa swoswoswo; iwɛnɛ ti yaa shɛ Agwangwama ata oko gba ubwa shɛ Agwangwama aba hwɛɛ, ubwa kaa shɛ bɛzhɛgba na ba pana atwa na a suyana bụ uwebiye.

¹³Bụtụ be elele na ba suyana Agwangwama, ɛ zhɛ o bicingo bu.

¹⁴Ama gana naa ɛɛ zhɛ a suyana bụtụ na aa ta tɛtanɛ shɛ rishe maa mbiyono aaŋ? Gana naa ɛɛ zhɛ a tɛtana bụtụ na aa ta hwụjɛ shɛ iwɛ ubwa rishee? Gana naa ɛɛ zhɛ a hwuga uzawa bi'enenjii?

¹⁵Gana naa ɛɛ zhɛ a ananga ta a ta tumwanɛ shɛ aaŋ? Gana na te e 'nyeci, ɛɛ hiɛŋ, Hioko ma gana na tizhajɛ ta atwa na a anangana atwa anabarɛ ebiye tu pilanụ.

¹⁶Ama shɛ hwɛ hwɛɛ aba shɛlajɛ anabarɛ ata ebiye o. Ga Ayizaya hiɛŋ, Agwangwama, gaaba tɛtanɛ unabarɛ na ata ananga rishee?

¹⁷Iwɛ-tɛkana, rishe-tɛtɛtana ra banɛ na anabarɛ tuhwuga, anabarɛ tuhwuga kaa a banɛ nu n-ndumwa mu Krast tu'ananga.

¹⁸Ama N hiɛŋ, A hwụjɛ shɛ suu? Iiŋ, a hwụjɛ gom, iwɛnɛ tu utakada Iwɛ ya Agwatana hiɛŋ. Rụhwụ ra aba ri beni ree teni nu unyizo kpaaŋ, n-ndumwa ma aba kaa mu beni mee teni tutu uce ofwo na atwa namɛ.

¹⁹Ama N hiɛŋ, Atwa Isrɛl mepi shi maa? Hiiŋ, go Moses ni ikɛnyi ibwɛ hiɛŋ, N zhɛ mo sugo atwa na shɛ shɛ udenji maa Mo hi vwundo shɛmɛ maa hi 'yaga isɛbwɛ. Udenji na eshiciji shi iyi, ubwa kaa Ngɛɛ zhɛ ma nda maa atwa mi 'yaga isɛbwɛ.

²⁰Ama ga Ayizaya jɛmɛ n-ndumwa ne eshe-hwoo a'wụtụ, bɛɛ hiɛŋ, Atwa na n jelekeci shi, aba n towo ugbe, Ngaa bananɛ kaa atwa na heŋteni shi iwe mi upeje.

²¹Ama bɛ jɛmɛ iwɛ atwa Isrɛl, bɛɛ hiɛŋ, Taa ti iyi ge heri hwayɛ, Ngee nderishiŋgeni atwa na hwụjɛ shɛ unu keeni anjɛ-ashamanjɛ i'ɛlɛ mi maa ma ruwanɛ aŋ.