Read bassa ROM 3 Bible Online

ROM 3 - bassa bible

ROM 3

¹Asha imbe kwuŋ shɛ ule na Biju 'yajɛɛ? Imbe kwuŋ i shɛ ule teleyi tijajaa?

²Ule ibɛ gembi nu uhwaŋna we elele. Hiiŋ, aba Agwatana utegeni n-ndumwa mu bwa maa a untangana mụ.

³Okwo yaa shɛ atwa oko lacɛ rishe-tɛtɛtana, rishe ru na aa lacɛ tɛtɛtana ri zhɛ ra nda suu rishe-ɛtɛtana ra Agwatana maa ru lweji?

⁴Awo. I zha shɛ ya sha gana ata kwukwuŋ! Ga Agwatana shɛ bụtụ bu tɛkana, ama ga atwa kpaaŋ tuba a shɛ atwa ụzagwụ, gana na te e 'nyeci, ɛɛ hiɛŋ, Ge e mbiseni caakwụ maa n-ndumwa mụ bụ mi teni cɛŋ, gabụ kaa bi zhɛ ba lasụ aŋ na aka na ta a duma ụshɛrɛya bụ.

⁵Yaa shɛ no tugworozwo tu tu oto mbisono maa Agwatana teni cɛŋ, asha imbe ɛti zhɛ tɛ hiɛn yaa? Agwatana na ba tụpana atwa iyi nɛ aa njɛ, bɛ shɛ suu bụtụ bo orugwusu? Ma duma iwɛ gana na ta bụtụ ba duma.

⁶Awo. I zha shɛ ya sha gana ata kwukwuŋ! Shibwonu asha gana na tuba Agwatana zhɛ a duma ya ụshɛrɛya wa atwa unyizoo?

⁷Ama yaa shɛ ụzagwụ mu njɛ maa iwɛ-tɛkana ya Agwatana keeni ugombo iwɛ ụjɛrụma ubwa, asha iwɛ imbe po aa ta duma ụshɛrɛya mu gana maa N shɛ bụtụ bi iwɛwɛɛ?

⁸Imbe kwuŋ zhɛ ma tu lakanaa? Gana na ta atwa oko a tu dumangana n-ndumwa mụ wɛ, ɛɛ hiɛŋ, atuba ti hiɛŋ, Mizha tɛ njɛ ma iyi iwɛ iwɛ maa nekeshi iyi ibiye ya zhajɛ. Tụwụma tu na ɛɛ zhɛ a pana aŋ ti teni cɛŋ.

⁹Asha imbe kwuŋ yaa? Atuba na tɛ shɛ Eju tu hwuri suu[5] atwa na shɛ shɛ Eju? Awo! Tu hwuri shi aŋ kwukwuŋ. Iwɛnɛ to o tu mbiswonuo iŋ[6] cebe maa Eju keeni atwa na shɛ shɛ Eju namɛ ni iwɛwɛ hwɛɛ aba.

¹⁰Gana na te e 'nyeci, ɛɛ hiɛŋ,

¹¹Bụtụ bi tiririri zasaba okwo bu ko; bụtụ na eshiciji iyi zasaba, bụtụ na ba jala Agwatana zasaba.

¹²Hwɛ hwɛɛ aba vwulwagwa ee genji uhwaŋna wa Agwatana, hwɛ hwɛɛ aba 'wa ya iyi nɛ teni shi cɛŋ; bụtụ na ba nda iyi ibiye zasaba okwo bu ko.

¹³No orworwo aba n-ndumwa mu na ma kwụna bụtụ ma banɛ, ni irɛtu ya aba aa halakaka atwa, n-ndumwa mu na ma banɛ nu unu wa aba mɛ shɛ gana mangayɛ me egbezhi.

¹⁴N-ndumwa ma aba mɛ shɛ ga tutwa keeni ụgagwụ.

¹⁵Ivwunɛ ya aba vwengenji maa a shɛrɛ bụtụ maa mehieŋ mu 'waŋ;

¹⁶ofwo elele na ee teni semi iyi kiri aa nda ufwu keeni amɛ-tụhaŋtụ,

¹⁷e te mepi shi kaa iyi nɛ ɛɛ hiɛŋ amɛ-olom.

¹⁸A sụmɛ shɛ kaa Agwatana inyɛsɛ o.

¹⁹Ama ti mepi maa iyi elele nɛ Undwa wa duma, asha wa njɛ na atwa na namɛ nu Undwa ata, iwɛ maa go unu elele 'imɛ ilɛmɛ, maa ga atwa kpaaŋ zhajɛ na agba ụshɛrɛya na Agwatana zhɛ a duma hwuŋ.

²⁰I zasa masha ma butugwumwa me elele na n-ndumwa zhɛ ma zhɛma hwuŋ na agba Agwatana iwɛ ugondu Undwa na bụtụ ata njɛ o; ama Undwa ubwa tuba wo mbisono atwa maa e mepi iyi nɛ i shɛ iwɛwɛ.

²¹Ama hwuwayɛ e mbiseni atwa caakwụ maa tiririri ta Agwatana ti beni shi nu Undwa o. Okwo Undwa na go Moses 'nyeci keeni iyi nɛ egesere jɛmɛ'[7] ya la tụ du tiseyida.

²²Tuba tɛ shɛ tiririri ta Agwatana tu na tu dure rishe ru na atwa kpaaŋ tɛtanɛ Jisus Krast. Iwɛnɛ to tuswoswoswo tu zasaba.

²³Atwa kpaaŋ njɛ iwɛwɛ, ibɛ po ee teni shi cɛŋ nụ ụjɛrụma wa Agwatana.

²⁴No tulubo tu bwa ti biye bee peni aŋ n-ndumwa-zhɛ tedure no tugwube tu na tu banɛ no olugwo Krast Jisus.

²⁵Ubwa Agwatana shikicinji maa sha iyi ụrụpɛ nɛ yo lomicingo bu amɛ,[8] unaa na ma ti lashɛga tedure ne rishe-tɛtɛtana mehieŋ mu bwa maa mbisono tiririri tu bwa caakwụ. Iwɛnɛ ti yaa shɛ maa ni isɛbwɛ nɛ baa 'imɛ ibɛ po Agwatana gengeni atwa iwɛwɛ nɛ aa njɛ la cala,

²⁶maa mbisono tishiriri tu bwa na aka ga hwuwayɛ, maa ubwa shɛ bụtụ bi tiririri ni ikɛnyi ibwɛ, maa kaa pana du atwa elele na tɛtanɛ Jisus rishe n-ndumwa-zhɛ.

²⁷Asha imbe kwuŋ atu ta busa iwɛ ibɛɛ? O kopwonuo tu uhwaŋna. Ni imbe kwuŋ ee kepeni tu uhwaŋnaa? Nu uhwaŋna ugondu Undwa suu? Awo! Semi nu uhwaŋna rishe-tɛtɛtana.

²⁸Ti heŋshi maa n-ndumwa ma zhɛma bụtụ na agba Agwatana tedure ne rishe-tɛtɛtana, shɛ nu ugondu Undwa tɛnda o.

²⁹Agwatana Eju kiri suu Agwatana shɛ? Bɛ shɛ shɛ suu du Agwatana atwa na shɛ shɛ Eju? Iiŋ! Bɛ shɛ du Agwatana atwa na shɛ shɛ Eju.

³⁰Gana na ta Agwatana namɛ oko, bi zhɛ ba pana atwa na jeji teleyi n-ndumwa-zhɛ tedure ne rishe-tɛtɛtana, bɛɛ zhɛ du ba pana atwa na jeji shi teleyi n-ndumwa-zhɛ tedure ne rishe-tɛtɛtana.

³¹Asha tedure ne rishe-tɛtɛtana suu ata nda Undwa maa kede u 'yaga ya ukpahiŋ? Awo! Shɛ gana ata kwukwuŋ. Ama tishikicingo oto shikicingo Undwa dimi.