Read bassa KORINT HIIŊ 10 Bible Online

KORINT HIIŊ 10 - bassa bible

KORINT HIIŊ 10

¹A-miaụŋ-mo-bino mi na amɛ Krast, i n kwụlanɛ maa hi mepi maa udomu ubwa 'yagajɛ la ogwunukwoshi tu ee duri itekwu kpaaŋ aba.

²Aa njɛ aŋ ubaptizim kpaaŋ aba iwɛ maa a twa-ikpɛngwu no Moses nu udomu ata keeni itekwu ɛtɛ du.

³Kpaaŋ aba kaa yɛ la iyimɛyɛ ɛtɛ mpiala ike,

⁴kpaaŋ aba kaa swe la iyi tuswa mpiala ike. Iwɛnɛ po e swe meni mu na mu banɛ nu Utayɛ ata ụ'wụtụ mpiala na 'wa aŋ. Ga Krast ubwa kaa shɛ Utayɛ ata ụ'wụtụ.

⁵Ama okwo ti yaa shɛ gana ata pa'ụtụ aba kwụlanɛ shɛ Agwatana o, ibɛ po bee gereteji aŋ nu ụshɛka ata.

⁶Ijɛ ɛtɛ kaa teni maa iti tɛtaganɛ-unu[27] iwɛ maa kede ta 'yaga ya ukwedeyi iyi iwɛ gana na ta a njɛ la o.

⁷Ta na zhɛba ma ya tuwa gana na ta atwa oko na ashashɛ aba zhɛbɛ la tuwa o. Gana na te e 'nyeci ni Iwɛ ya Agwatana, ɛɛ hiɛŋ, Atwamwa jɛjɛ maa a yɛ iyimɛyɛ, maa e swe iyi tuswa, nazhɛ ɛɛ ishijɛ maa a nanjɛ tụlagwụ.

⁸Kede tɛ njɛ ma ya tuwɛle gana na ta atwa oko na ashashɛ aba njɛ la harɛ atwa igbɛɛ-umpwa-nu-boo-ko-na-akpakwụ-a-ta (23,000) 'waŋ ee 'wi nu uwaŋna ụjita uko gba o.

⁹Kede ti menji ma ya Agwangwama[28] gana na atwa oko na ashasshɛ aba menji bu la, harɛ ahwa lụmanjɛ aŋ ee 'wi o.

¹⁰To ngwulongongo ma ya gana na ta atwa oko na ashashɛ aba ngwulengenji la, nazhɛ butumwa bo tu'wo kwụnɛ aŋ o.

¹¹Ijɛ ɛtɛ kpaaŋ vwutengeni atwa ata gana tusakana; ee 'nyeci iŋ kaa iwɛ maa iti tɛtaganɛ-unu. Iwɛnɛ ti yaa shɛ atuba ukwunanga wa aka ga zhɛ wa zhaganɛ.

¹²Ibɛ po bụtụ na heŋshi maa bi shikeni dimi, ga bu na nda pece shibwonu bi zhɛ ba laya.

¹³I zasa tumanga te elele ti hi vwuteni, ma tu na bụtụ eri shi ba ima-isɛbwɛ tuba o. Ama Agwatana ubwa shɛ bụtụ bi tɛcara, bi zha shɛ bo lono maa e hi menji ni iyi nɛ hwuri ukpahiŋ hiŋ o, ama aka na ta tumanga ti zhajɛ, na aka ata nazhɛ bɛɛ zhɛ ba nda uhwaŋna u tubanangana iwɛ maa hi eri isɛbwɛ tuba ti'ima.

¹⁴Iwɛ ecilo ata, ahiɛba atwa mi tulubo, ishɛga ma hi genji tuwa tɛnda.

¹⁵Ma duma iwɛ ne hiŋ gana atwa na ahaŋsa tuwo; na yalaga ma iwɛ nɛ Ama duma.

¹⁶Ukwopi na ata lụpa Agwatana maa pana uŋ uwebiye, shɛ ubwa suu ụ shɛ ikpɛngwu nɛ ata twa ne mehieŋ mu Krast? Ibrɛd ɛtɛ oto dwonu, shɛ ibɛ suu i shɛ ikpɛngwu nɛ ata twa na tu'waba tu Krast?

¹⁷Iwɛnɛ po ibrɛd ike yaa shɛ, gabata du atuba na tɛ shɛ atwa ofwugwo, tɛ shɛ tu'waba tu ko. Hwɛ hwɛɛ tu kaa ta lashɛga urobwo ibrɛd ɛtɛ.

¹⁸Kwụba ma miaụŋ mi Isrɛl nu uhwaŋna tu'waba,[29] shɛ atwa na suu a twa-ikpɛngwu nu utukwu-ụrụpɛ, o dwotwogonu du iyi ụrụpɛ?

¹⁹Asha imbe Ɛmɛ hiɛŋ yaa? Iyi nɛ oo to ụrụpɛ na tuwa i shɛ shɛ iyi elele o, tuwa kaa tɛ shɛ shɛ du iyi elele o.

²⁰Ama Mo hi mbiso maa ụrụpɛ na atwa na shɛ shɛ Eju a ta, atumwa-ibiri aa taga ụrụpɛ ata, shɛ Agwatana o, ibɛ po Ngee jeri shi maa hi na twa-ikpɛngwu na atumwa-ibiri.

²¹Hi eri shi hia swa ukwopi wa Agwangwama maa hi na swaanana ukwopi wa atumwa-ibiri o, hi eri shi kaa hia ya iyimɛyɛ ya Agwangwama, maa hi na yaanana iyimɛyɛ ya atumwa-ibiri o.

²²Okwo to vwundo suu amɛ Agwangwama maa 'yaga isɛbwɛngwɛ? Tu hwuri bu suu ikɛnyi?

²³Ti ga 'yajɛ ohwolu maa ta nda iyi elele, ama shɛ kpaaŋ ibɛ i shɛ iyi ibiye o. Ti ga 'yajɛ ohwolu maa ta nda iyi elele, ama shɛ kpaaŋ ibɛ i zhɛ ma hi ma o.

²⁴Kede bụtụ be elele na jalakaka ule iwɛ ukanyi ubwa o, semi ga bu na jalakaka iyi nɛ zhɛ ya ndana uyebi ubwa iyi ibiye.

²⁵Na ya ma iyi elele nɛ aa sanga nu udukwo, to no hoŋtono ma iheŋtene ye elele o, iwɛ bimbisegeni-ba-shɛmɛ shi hiŋ.

²⁶Iwɛ ya Agwatana hiɛŋ, Agwangwama ubwa 'yajɛ unyizo keeni iyi elele nɛ zweni nu bwa.

²⁷Yaa shɛ bụtụ na tɛtanɛ shɛ rishe ihi suyanɛ maa hiɛ yɛ iyi, yaa shɛ yaa hi kwụlanɛ maa hi zhe, asha zhaga ma maa hiɛ yɛ iyi elele nɛ bee hi peni, to hoŋtono ma iheŋtene o, iwɛ bimbisegeni-ba-shɛmɛ shi hiŋ.

²⁸Ama yaa shɛ bụtụ bu ko ihi hiɛŋ, Iyi nɛ oo to ụrụpɛ na, ta ya ma ya o, iwɛ bụtụ ata ihi mbishi iŋ, keeni iwɛ bimbisegeni-ba-shɛmɛ shi hiŋ.[30]

²⁹Bimbisegeni ata ba amɛ Ama njɛ iwɛ ubwa, shɛ shɛ iwɛ bimbisegeni-ba-shɛmɛ shi hiŋ o, ama iwɛ bu na binya bụtụ. Iwembe po bimbisegeni-ba-amɛ ba binya bụtụ zhɛ na duma ụshɛrɛya tumama 'yaga tu na Ngaa mama 'yajɛɛ?

³⁰Yaa shɛ Ngaa njɛ ugwoje iwɛ iyimɛyɛ nɛ Ngɛɛ zhɛ ma ya, asha iwembe po aa ma dumangana n-ndumwa mụ wɛ iwɛ iyi nɛ Ngaa nduwa ugwoje wa Agwatana iwɛ ibɛɛ?

³¹Iwɛ ecilo ata, okwo ahia ya, okwo ahia swa, okwo ahia nda iyi elele, na nda ma iyi elele iwɛ ụjɛrụma wa Agwatana.

³²To no shilono ma Eju, kwo kaa atwa na shɛ shɛ Eju, kwo kaa tụ'ụlwa-tụ-ụhiɛŋshɛ-Agwangwama iyi ukwurishi o.

³³Okwo tu Ngaa kwụlanɛ atwa kpaaŋ ni iyi elele, N jelekeci shi ule ukanyi mu o, ama Ma jala maa ma ndana atwa ofwugwo iyi ibiye, iwɛ maa e bicinji aŋ.