Read bassa KORINT HIIŊ 16 Bible Online

KORINT HIIŊ 16 - bassa bible

KORINT HIIŊ 16

¹Iwɛ apalajɛma a na shɛ iwɛ atwa tijilo Agwatana, ahiɛba, nda ma du gana na ti Ngee peni tụ'ụlwatagwụ-tụ-ụhiɛŋshɛ-Agwangwama tu na tu namɛ nu Galatia unu.

²Bụtụ bụtụ na ashashɛ hiŋ ga bu na intana iyi no ofwo ubwa gana na ti bee gwushiji nụ ụjita ulade, iwɛ maa kede apalajɛma nama ya aka na Ngaa zhajɛ o.

³Aka na ti Ngee ci apata, N zhɛ ma pana atwa elele na ehi menji maa e teni cɛŋ atakada maa Ma tumwana aŋ maa a 'waŋna apwaŋ hiŋ tulubo maa e zhe Jɛrusalɛm.

⁴Yaa shɛ kaa yee teni cɛŋ maa Ma zha du, asha ɛ zhɛ a zhagaga ne mi.

⁵Ama N zhɛ Ma zhajɛ pi hiŋ na aba na ti Ngee dure Masɛdonia; iwɛnɛ po N zhɛ me dure Masɛdonia tugwo.

⁶Nekeshi N zhɛ Ma gɛga no ofwo hiŋ na aka bu ushwo, iwɛ maa hi m mbiyeni na tahaiŋnụ ti mi no ofwo elele na Ngɛɛ zhɛ ma zhagaga.

⁷N te jeri shi maa Ma hi kwụba ti Ngɛɛ tɛ zhɛ tɛkashɛka o. Yaa shɛ Agwangwama leni, Ma haŋsa maa Mo ilogogo no ofwo hiŋ aka fwalaa.

⁸Ama N zhɛ Ma gɛga nɛ Ɛfɛsɛs te ilegeji uuwa i ci aka Pɛntɛkost.

⁹Iwɛnɛ po odubo a'wụtụ na ugondu zhɛ ma n 'yagana eshe, a n kapɛshɛngwanụ, ama atwa na a sukakana uŋ gembi ufwugwo.

¹⁰Ama yaa shɛ go Timoti zhajɛ pi hiŋ, nda bu ma tebiye; iwɛnɛ tu baa nda ugondu wa Agwangwama gana na Ama nda du.

¹¹Kede bụtụ be elele ngbaraka bụ cwɛŋ o. Ama mbiyeni bu ma na tahaŋnụ tu bwa na amɛ-olom, ti bee ci ugwulwo pi mi. Iwɛnɛ po M ngbaracɛ uhwaŋna maa bi zhɛ ba zhagajɛ na miaụŋ-mo-bino na amɛ Krast.

¹²Ama iwɛ Apụlụs yɛu-bino ɛtɛ tu na amɛ Krast, N tabwa bụ tebiye maa zhajɛ pi hiŋ na miaụŋ-mo-bino mi nya, ama i ta kwụlanɛ shɛ bụ maa zhajɛ hwuwayɛ o, ama bi zhɛ ba zhajɛ hwuŋ na aka na bee gwushije ohwolu.

¹³No shiyono ma iyi elele eshe, shikono ma dimi ne rishe-tɛtɛtana, 'yaga ma eshe-hwoo, 'yaga ma ikɛnyi.

¹⁴Iyi elele nɛ ahia nda, na nda iŋ ma no tulubo.

¹⁵A-miaụŋ-mo-bino mi na amɛ Krast, hi mepi atwa ihwɛ Stɛfanas tebiye, maa aba shɛ atwa Krast ehiiŋ na Akaya, ee meme peni kaa nu ugondu iyi tɛndana atwa tijilo Agwatana.

¹⁶Ahiɛba du no momo tulonono ma ụhwada wa atwa gana ata, keeni atwa elele na o mbiyono ugondu ga wa Agwatana no tu, a na kaa a nda ụbaụta.

¹⁷Ama Ma nda unyasa iwɛ tizhajɛ ti Stɛfanas keeni Fotunatos keeni Akaikos; iwɛnɛ po aba shidinji iyi nɛ ga hi 'nyananɛ.

¹⁸Aba njɛ maa ahaŋsa mi kezhe hwungbɛ keeni shihaŋsa shi hiŋ du; iwɛ ecilo ata no shiyono ma atwa gana ata eshe.

¹⁹Tu'ulwatagwụ-tụ-ụhiɛŋshɛ-Agwangwama tu na tu namɛ ne Esia ta hi 'walụ. Ga Akwila keeni Prisila a hi 'walụ a'walụ na ce amɛ Agwangwama, ta tụ'ụlwa-tụ-ụhiɛŋshɛ-Agwangwama tu na tu namɛ ni ihwɛ ya aba.

²⁰Atɛtanɛ-rishe elele na namɛ epe a hi 'walụ. Mama 'walanụ ma na turuwanɛ te tijilo.

²¹A'walụ mi Gamba go Poul a na Ngee 'nyeci nu u'ala mu na.

²²Go unu-tukalana 'imɛ bụtụ be elele na lubi shi Agwangwama tu. Agwangwama tu, zhajɛ![53]

²³Go tulubo-ti-biye ta Agwangwama tu Jisus Krast tu nama ne hiŋ.

²⁴Go tulubo ti mi tu nama ne hiŋ kpaaŋ na amɛ Krast Jisus.