Read bassa KORINT HIIŊ 6 Bible Online

KORINT HIIŊ 6 - bassa bible

KORINT HIIŊ 6

¹Yaa shɛ bụtụ be elele 'yajɛ n-ndumwa na binya bwa, hi zhɛ suu hia kara maa hi suyanɛ bụ ụshɛrɛya na agba atwa na shɛ shɛ atwa tiririri? Shɛ na agba atwa tijilo Agwatana suu?

²Okwo hi mepi shi suu maa ahiɛba hi zhɛ hia duma hwuŋ ụshɛrɛya wa atwa unyizo ga? Yaa shɛ ahiɛba hi zhɛ hia duma hwuŋ ụshɛrɛya wa atwa unyizo ga, asha hi waŋnɛ shɛ suu maa hiɛ jɛmɛ ashɛrɛya ga tidice dice?

³Hi mepi shi suu maa atuba ti zhɛ ta duma hwuŋ ụshɛrɛya wa atumwa-azuba? Ashɛrɛya iyi nɛ namɛ na aka ga suu atɛ zha shɛ ta ala ya tụdụma?

⁴Yaa shɛ ahia duma ashɛrɛya iyi nɛ namɛ na aka ga, asha no sugo ma de atwa na te shi eshe na tụ'ụlwa-tụ-ụhiɛŋshɛ-Agwangwama maa ga shɛ aba a duma ashɛrɛya iyi nɛ teni na amɛ tu'ulwa!

⁵N jɛmɛ inɛ ɛtɛ maa Ma hi nda ezuye. Gobwonu ga hŋ yaa shɛ, maa i zasa bụtụ be elele na incɛ na ashashɛ hiŋ na waŋnɛ maa duma ashɛrɛya na ashashɛ miaụŋ-mo-bino na amɛ Krast?

⁶Ama yɛu-bino ya suyana yɛu-bino bwa na amɛ Krast ụshɛrɛya na agba atwa na tɛtanɛ shɛ rishe!

⁷Iwɛ-tɛkana, okwo cebe, hwɛ hwɛɛ ibɛ i shɛ ti'ina na ashashɛ hiŋ, maa hi na mama suyaganụ ashɛrɛya. Iwembe po ehi leni shi maa a hiɛ njɛ iyi iwɛɛ? Kwo kaa maa a hiɛ yɛ imweree?

⁸Ama ahiɛba ni ikɛnyi hiŋ, hia nda iyi iwɛ, ahia ya kaa atwa imwere, ahia nda du miaụŋ-mo-bino hiŋ na amɛ Krast gana ata!

⁹Okwo hi mepi shi suu maa atwa na shɛ shɛ atwa tiririri zha shɛ a ya hwuŋ ogwu na Cɛnjɛ-ta-tugwama ta Agwatana? Ta mama halakaka ma o, mapa ma maa anjɛ-tuwɛle, na anjɛ-tuwa, na anjɛ-shɛbara, ne etwenyi na o woto ne etwenyi,

¹⁰no ozundo, na anjɛ-isɛbwɛngwɛ, ne eswegeni iyi nɛ ya ngba bụtụ, na atwajɛ-tutwa keeni atwa tuhwulo, a zha shɛ a ya hwuŋ ogwu na Cɛnjɛ-ta-tugwama ta Agwatana o.

¹¹Ama atwa oko kaa nduwa la ijenu na ashashɛ hiŋ. Ama Mpiala ma Agwatana tu mi hi nyashɛngwa, maa hi nduwa atwa tijilo Agwatana keeni atwa tiririri ni izeci ya Agwangwama tu Jisus Krast.

¹²Undwa n leneni maa Ma nda iyi elele, ama shɛ iyi kpaaŋ kaa i n zhɛmanɛ o. Undwa n leneni maa Ma nda iyi elele, ama N zha shɛ mo lonono iyi elele maa i 'yaga ụhwada mu o.

¹³Iyimɛyɛ i shɛ iwɛ ugbokwo, ugbokwo du ụ shɛ iwɛ iyimɛyɛ, ama Agwatana zhɛ a nda ijɛ ɛtɛ hwɛ bɛ iyebi ufwu. Ama tu'waba tɛ shɛ shɛ iwɛ tuwɛle o, semi iwɛ Agwangwama, Agwangwama kaa du i shɛ iwɛ tu'waba.

¹⁴Agwatana hiɛcɛngwa Agwangwama no tu'wo, bɛɛ zhɛ kaa du mɛ ti hicinjɛ tedure nu ukpahiŋ ubwa.

¹⁵Hi mepi shi suu maa itwɛ tu'waba ti hiŋ i shɛ itwɛ tu'waba tu Krast? N zhɛ suu ma shapa itwɛ tu'waba tu Krast ma nda iŋ itwɛ tu'waba tɛ buwɛle? Awo. Shɛ gana ata kwukwuŋ!

¹⁶Hi mepi shi suu maa bụtụ na togwu nɛ buwɛle, asha bɛ shɛ tu'waba tu ko nu bwa? Ibɛ po yee 'nyeci ni Iwɛ ya Agwatana, yɛɛ hiɛŋ, Ebeyebi ata zhɛ a sha tu'waba tu ko.

¹⁷Ama bụtụ na togwu na Agwangwama, bɛ shɛ Mpiala mu ko nu bwa.

¹⁸No gozhigono ma tuwɛle. Iwɛwɛ ye elele nɛ bụtụ ba nda, i namɛ no tupohondo ta tu'waba tu bwa, ama bụtụ na ba nda tuwɛle, asha tu'waba ti ikɛnyi ibwɛ baa nda iwɛwɛ.

¹⁹Okwo hi mepi shi suu maa tu'waba ti hiŋ, tuba tɛ shɛ umwono wa Agwatana na bee hi peni, unaa na Mpiala mi Tijilo ma nama? Shɛ ahiɛba hi mama 'yajɛ o,

²⁰iwɛnɛ ti yaa 'yajɛ ulumo na boo hi sowo. Iwɛ ecilo ata, na muna ma Agwatana ụjɛrụma tedure na tu'waba ti hiŋ.