Read bassa KORINT YEBI 10 Bible Online

KORINT YEBI 10 - bassa bible

KORINT YEBI 10

¹Ama Gamba go Poul ni ikɛnyi mi, Ma hi lụpa ne timeme zucinje keeni masha mi biye mu Krast keeni isɛbwɛ ibwɛ ti'ima. Aka na Ngaa ta namɛ la na ashashɛ hiŋ, M meme zucije, ama aka na tu Ngaa zasaba ya, ibɛ po Ngaa 'yajɛ ya eshe-hwoo ne hiŋ.

²Ma hi lụpa maa aka na Ngɛɛ zhɛ ma nama na ashashɛ hiŋ maa kede Mo mbisono eshe-hwoo ata Ama haŋsa maa mo mbisono atwa hiŋ oko, aba shɛ atwa ata a haŋsa maa ta zha tahaŋnụ na masha mu unyizo.

³Okwo yaa shɛ ata zha tahaŋnụ na masha mu unyizo, ama ti jeshi shi tuba ujasa gana na tu unyizo wa jasa ujasa o.

⁴I'wɛŋnɛ ujasa nɛ ata jasa ujasa ni ibɛ, shɛ shɛ inɛ unyizo, ama Agwatana ubwa peni iŋ ukpahiŋ maa to hwuŋzo tuma ta atayɛ tu na ti 'yajɛ ikɛnyi.

⁵Ni ibɛ oto hwuŋzo shɛshamanjɛ sha atwa keeni iyi elele nɛ meme mungicinji maa i sukakanɛ iyi-tumapa ya Agwatana, ibɛ po ata 'yagaga tuhaŋsa tu na atwa a haŋsa kpaaŋ maa tɛ shɛ iyi nɛ ujasa yɛ, iwɛ maa tuba a hwụjɛ-unu Krast.

⁶Aka na unu hiŋ tuhwuga ulwa hwuŋ, tu mama 'imɛ maa ta pana atwa elele na hwụjɛ shɛ unu ulwapɛ.

⁷Na ngbaraka ma gana na ti iyi shɛ. Yaa shɛ bụtụ be elele ba haŋsa ni ikɛnyi ibwɛ maa bɛ shɛ bụtụ Krast, asha go gwulo maa haŋsanana ni ikɛnyi ibwɛ, maa gana na tu baa shɛ bụtụ Krast, asha gobwonu du atɛ shɛ.

⁸Okwo Ama busa gana elele iwɛ ụhwada na Agwangwama iti peni maa ta hi ma, shɛ iwɛ maa to hi hwuŋzo, ezuye zha shɛ ma n sha o.

⁹N jeri shi maa hi na haŋsa maa Ma jala maa mo hi zwono inyɛsɛ tedure na atakada mi ti'nyacɛ o.

¹⁰Iwɛnɛ ta atwa hiŋ oko hiɛŋ, Ba duma n-ndumwa mu na mi zhinengeni mu na kaa mi 'yajɛ ikɛnyi na atakada ubwa, ama aka na kaa baa twa eshe no tu, bɛ shɛ shɛ kaa bụtụ bụ tandụ ta abu kwụbɛ bu o, n-ndumwa mu bwa kaa mi zha shɛ ma sụba ya iyi elele o.

¹¹Ga bụtụ gana ata na haŋsa maa, gana na ata duma n-ndumwa na atakada ta atu zasaba, gobwonu du atɛ shɛ na tɛnda aka na atu namba apata.

¹²Tu zasa eshe-hwoo maa tu mama rɛta kwo kaa maa tu mama manga na atwa oko na ashashɛ atwa na mama dumanga o. Ama atwa na mama rɛta abaaba, a na kaa mama manga abaaba, atwa gana ata eshiciji shi iyi elele o.

¹³Ama ti zha shɛ ta busa maa ta kashɛka bimenji tu o, semi gana na tu ulugbe na Agwatana iti mengeni namɛ, na kaa wa nama tutu i ci ofwo hiŋ.

¹⁴Ti meme mbe shi maa ta kashɛka bimenji tu, gana maa ti zha shɛ to hi to ya o, tu ta namɛ no ogwungwu bimenji tu, iwɛnɛ ati zhajɛ tutu geri hiŋ na Anabarɛ Ebiye Krast.

¹⁵Tụ bụshɛ shɛ kaa maa ta kashɛka ogwungwu tu nu ugondu wa anya atwa o, semi ashɛlatụ ata nda gana na te rishe ri hiŋ tɛtɛtana ra waŋna, maa go ukpogwu ugondu na ata nda na ashashɛ hiŋ na kaana uholo,

¹⁶iwɛ maa ta ananga Anabarɛ Ebiye na cɛnjɛ tu na tu namɛ geri-be-eshe hiŋ, maa kede ta busa iwɛ ugondu na aa nduwa la no ofwo na binya bụtụ nduwa ugondu o.

¹⁷Iwɛ ya Agwatana hiɛŋ, Bụtụ be elele na ba busa, ga bu na busa iwɛ Agwangwama.

¹⁸Iwɛnɛ po shɛ bụtụ na mama la tiseyida ee menji maa bi teni cɛŋ o, semi bụtụ na Agwangwama a la tiseyida.