Read bassa KORINT YEBI 3 Bible Online

KORINT YEBI 3 - bassa bible

KORINT YEBI 3

¹Ti tɛ zhɛ suu tu momo kwuno tiseyida-tula sasana no ofwo hiŋ maa ti teni cɛŋ? Atakada tiseyida suu iti shanɛ iyi ukekeshi maa ta hi pana kwo kaa maa ta lashɛga no olugwo hiŋ maa ti teni cɛŋ gana na ti yaa shanɛ atwa oko?

²Ahiɛba ni ikɛnyi hiŋ hiɛ shɛ utakada na ee 'nyeci na shɛmɛ shi tu,[4] inɛɛ nɛ atwa kpaaŋ eri a mapa, ee eri a rɛta du.

³Iwɛnɛ po hi mbiswonuo maa ahiɛba hiɛ shɛ utakada Krast na ata ndana iyi, inɛɛ nɛ ee 'nyeci shi nu nlulo, semi na Mpiala ma Agwatana na shɛ buumwa, inɛɛ nɛ ee 'nyeci shi nu ugbogolo ti'nyeci, semi na shɛmɛ sha atwagwumwa.

⁴Inɛ gɛ ibɛ njɛ maa ohwulu tu nama oko no ofwo Agwatana, tedure Krast.

⁵I shɛ shɛ kaa maa ti teni cɛŋ ni ikɛnyi tu o, maa ta rɛta iyi elele gana maa ni i'ɛlɛ tu yaa banɛ o. Ama tutono tu tu cɛŋ tu banɛ no olugwo Agwatana.

⁶Ubwa ɛtɛ njɛ maa to tono cɛŋ, maa ta sha anjɛ-iyi Unu Ufwo Tutwa, shɛ inɛ ti'nyeci tu Undwa o, semi inɛ Mpiala. Iwɛnɛ ti inɛ ti'nyeci tu Undwa ya kwụna atwa, ama inɛ Mpiala yo hwoŋso uraiŋ.

⁷Ama yaa shɛ iyi nɛ aa ndana la undwa na ee 'nyeci nu utayɛ na ee shebi kwuni nụ ụjɛrụma, harɛ miaụŋ mi Isrɛl mi eri shi ma ngbaaraka la ụpɛshɛka Moses zenjizenji iwɛ ụjɛrụma ata wa ta.

⁸Asha shi iyi nɛ aa ndana Mpiala suu zhɛ ya kaana ụjɛrụma ti'yaga uhwuri inɛ ɛtɛ?

⁹Yaa shɛ ugondu na njɛ la na aka Undwa, na kaa peni la atwa n-ndumwa-tụwụma 'yajɛ ụjɛrụma, asha ụjɛrụma ugondu na wa pana atwa n-ndumwa-zhɛ, zhɛ wa kaana ugombo duwa.

¹⁰Iwɛnɛ po iyi nɛ 'yajɛ la ụjɛrụma, i zasa ya ụjɛrụma hwuwayɛ o, iwɛ inɛɛ nɛ ụjɛrụma ibɛ keeni ya ugombo duwa.

¹¹Yaa shɛ inɛɛ nɛ ya kashɛka 'yajɛ la ụjɛrụma, asha ụjɛrụma inɛɛ nɛ ya nama tutu zhɛ wa kaana ugombo duwa uhwuri inɛ ɛtɛ.

¹²Ibɛ po ata duma iwɛ ne eshe-hwoo a'wụtụ, iwɛnɛ ta ati 'yajɛ ashɛlatụ gana ga.

¹³Tɛ shɛ shɛ gana Moses na urigeni la ụpɛshɛka ubwa owowo iwɛ maa kede miaụŋ mi Isrɛl mu ngbaraka ukwunanga iyi nɛ ya kashɛka zenjizenji o.

¹⁴Ama shihaŋsa sha aba shɛ shɛshɛpanɛ; okwo uuwa i ci aka ga, aka elele na aa rɛta Unu Ụngwụshɛ Tutwa, owowo ata to ushigwo su o, ama ga Krast ubwa ushiji ya owowo ata.

¹⁵Ama okwo taa hwayɛ aka elele na aa rɛta Undwa Moses, owowo ata te urigeni ba shihaŋsa sha aba.

¹⁶Ama aka na ta bụtụ jɛshɛrɛjɛ, bee zhe pa Agwangwama, nazhɛ owowo ata o ushigwo ya.

¹⁷Agwangwama shɛ Mpiala, ofwo elele na kaa Mpiala ma Agwangwama mu namɛ, apata du tumama 'yaga tu namɛ.

¹⁸Ama kpaaŋ tu na owowo ata urigeni shi apɛshɛka tu, ta kwụba ụjɛrụma wa Agwangwama, gana maa u shiyeni na amɛ irɛtɛ,[5] ibɛ po woo mo tu sheyingo maa ta sha ụsụbwa ụjɛrụma ubwa na wa kaana ugombo ɛgbɛɛ. Gana ugondu wa Agwangwama na shɛ Mpiala ụ shɛ ta.