Read bassa KORINT YEBI 8 Bible Online

KORINT YEBI 8 - bassa bible

KORINT YEBI 8

¹A-miaụŋ-mo-bino mi na amɛ Krast, ta jala maa hi mepi tulubo-ti-biye ta Agwatana tu na bee peni tụ'ụlwa-tụ-ụhiɛŋshɛ-Agwangwama tu na tu namɛ nu Masɛdonia.

²Okwo tu ụbaụta ufwugwo namanɛ aŋ keeni tukofwo ta aba tụ 'wụtụ 'wụtụ, ama unyasa wa aba ụ'wụtụ na aa 'yajɛ u njɛ aŋ maa e peni apwaŋ na hwuleji.

³Ma la aŋ tiseyida maa e peni apwaŋ gana na tu ukpahiŋ wa aba namɛ hwɛɛ, kwo kaa te hwuri gana na tu ukpahiŋ wa aba namɛ.

⁴A ma tu tabwa duwa iwɛ tulubo tu ga ti biye maa to lonono aŋ maa a twa-ikpɛngwu nu ugondu wa apalajɛ ga tɛnda, iwɛ atwa tijilo Agwatana.

⁵A njɛ shɛ gana na eti ge heŋshi o, ama e meme peni tugwo Agwangwama hiiŋ, nazhɛ ee meme peni no ofwo tu du tedure nu ukwulana wa Agwatana.

⁶Iwɛbɛ po eti keeni Taitos ikɛnyi, maa gana na ti bee kwuni la, ga shɛ gana ata du baa kwunanjɛ tulubo tu ga ti biye na ashashɛ hiŋ.

⁷Ama gana na ta ahia hialatagwụ ni iyi elele, te rishe-tɛtɛtana, tu n-ndumwa tụdụma, ti iyi-tumapa, ta tɛzhɛgɛdana ni iyi elele, no tulubo tu na ehi tu lubi,[11] asha hialatagwụ ma du no tulubo tu ga ti biye.

⁸Shɛ unu Ama hi pana, ta ma duma iwɛ gɛ o, ama tɛzhɛgɛdana ta anya atwa Ama shapa Ama manga maa tulubo ti hiŋ ti biye tɛ shɛ iyi tugom.

⁹Hi mepi tulubo-ti-biye ta Agwangwama tu Jisus Krast, maa okwo tu baa shɛ la bɛzhɛgba, ama iwɛ hiŋ baa shɛ ya bukofwo, iwɛ maa tuba hiɛ shɛ azhɛgba tedure no tukofwo tu bwa.

¹⁰Ahaŋsa na namɛ na amɛ mi, aba Ama hi pana ni inɛ gɛ: inɛ gɛ ihi zhɛmanɛ, iwɛnɛ ti yaa shɛ ahiɛba hi kwuni iŋ la tɛnda taa nu uywebe, tu ugondu na ahiɛ njɛ la hwɛɛ keeni tukwulana tu na yaa hiɛ kwụlanɛ maa hi na nda uŋ.

¹¹Ama hwaŋzhɛnga ma ugondu ata tɛnda; maa tɛzhɛgɛdana tu na ehi mbiseni la te ehi zhiji ugondu ata, mbisono ma tɛzhɛgɛdana ta ata tutu uce gana na ti iyi nɛ ahiɛ 'yajɛ namɛ.

¹²Yaa shɛ ahiɛ 'yajɛ tukwulangana maa hi peni, asha i zhɛ du ya kwulana Agwatana maa lashɛga gana na ta bụtụ gwushiji, shɛ iwɛnɛ tu baa zasa o.

¹³Inɛ gɛ i shɛ shɛ maa Ma jala maa ga anya atwa na ta ụhinjanụ, maa hi na nda tuba ụbaụta o.

¹⁴Ama iwɛ maa ga i nangwụ. Iyi nɛ ihi hwuleji hwuwayɛ na aka ga, i shanɛ aŋ tuba iyi nɛ 'nyananɛ aŋ, iwɛ maa tuba iyi nɛ hwuleji aŋ, ihi shanɛ iyi nɛ ihi 'nyananɛ, iwɛ maa i nangwụ.

¹⁵Gana na ti yee 'nyeci ni Iwɛ ya Agwatana, yɛɛ hiɛŋ, Bụtụ na tenji kam, i hwuleji shi bu o, bụtụ na kaa tenji cwɛŋ, i 'nyananɛ shɛ bụ o.

¹⁶Tɛ njɛ ma ugwoje wa Agwatana na peni Taitos maa ge iwɛ hiŋ na ta bụ duwa gana na yaa ma n ta du.

¹⁷Iwɛ-tɛkana, bi leni ikɛnyi nɛ eti keeni bu, ama gana na tu baa 'yajɛ tɛzhɛgɛdana tụ 'wụtụ iwe hiŋ, ibɛ po bee ci pi hiŋ ni ikɛnyi ibwɛ.

¹⁸Tu tumwanɛ yɛu-bino ɛtɛ na amɛ Krast nɛ aa dumanga nu ugondu wa Anabarɛ Ebiye tu'ananga na tụ'ụlwatagwụ-tụ-ụhiɛŋshɛ-AGWANGWAMA kpaaŋ maa ga zhagajɛ nu bwa maa a zhajɛ pi hiŋ.

¹⁹Ama shɛ inɛ ɛtɛ kiri o, ama ubwa shɛ bụtụ na tụ'ụlwatagwụ-tụ-ụhiɛŋshɛ-Agwangwama ti teri maa zha tahaŋnụ ta ata no tu nu ugondu tulubo tu ga ti biye na ata nda iwɛ ụjɛrụma wa Agwangwama ni ikɛnyi ibwɛ, maa to mbisono ti'imanga tu tu.

²⁰Ta jala maa ta kalana aŋ inɛ gɛ, maa kede bụtụ be elele iti sepi-unu iwɛ apalajɛma ga a'wụtụ ata ndana atwa o.

²¹Iwɛnɛ po to shiyono ahaŋsa tu ni iyi ibiye tɛnda, shɛ ne eshe Agwangwama kiri o, ama ne eshe atwa du.

²²Tu tumwanɛ yɛu-bino tu na amɛ Krast nɛ eti menji tɛzhɛgɛdana tu bwa ni iyi ifwugwo na aka ofwugwo, atu kwụbɛ maa bi teni cɛŋ, maa zhagaga na aba, ama bi keeni tɛzhɛgɛdana ti'yaga hwuwayɛ, iwɛnɛ to ohwulu ubwa namɛ oko iwe hiŋ tebiye.

²³Ga Taitos ubwa shɛ bụtụ na Ngaa twa-ikpɛngwu nu bwa, keeni uyebi mu na wa nda ugondu ne mi iwɛ hiŋ, kwo kaa iwɛ miaụŋ-mo-bino tu na amɛ Krast, aba shɛ atumwa ụ tụ'ụlwa-tụ-ụhiɛŋshɛ-Agwangwama;[12] a shɛ kaa ụjɛrụma Krast.

²⁴Iwɛ ecilo ata mbisono ma atwa ga maa tulubo ti hiŋ ti teni cɛŋ keeni ecilo tubusa tu tu ne eshe tụ'ụlwatagwụ-tụ-ụhiɛŋshɛ-Agwangwama.