Read bassa KORINT YEBI 9 Bible Online

KORINT YEBI 9 - bassa bible

KORINT YEBI 9

¹I shɛ shɛ tilɛɛ maa Ma hi 'nyatanɛ ya utakada iwɛ iyi tɛndana atwa tijilo Agwatana o.

²Tumama imanga tu na ahi mama imwangwa, iwɛbɛ po Ama busana atwa Masɛdonia iwe hiŋ, gana na atwa Akaya mama imwangwa taa nu uywebe. Tɛzhɛgɛdana ti hiŋ kaa tɛ hiɛcɛnjɛ atwa ofwugwo u'waba na ashashɛ aba.

³Iwɛ ecilo ata Ngaa tumwanɛ miaụŋ-mo-bino ata na amɛ Krast, iwɛ maa kede inɛ gɛ ngwuricinji tubusa tu na ata busa iwe hiŋ o. Iwɛ maa hi mama imanjɛ kpaaŋ hiŋ gana na tu Ngoo mbiswo aŋ la gana na ahiɛ shɛ.

⁴Iwɛ aka na atwa Masɛdonia oko zhɛ a zhagajɛ ne mi, ɛɛ zhɛ a kwụba maa hi ta mama imanjɛ shɛ o; asha atuba ezuye tubusa tu ga tu tugom zhɛ a sha ya, ama shɛ ahiɛba o.

⁵Ibɛ po Ngee heŋshi maa i shɛ tilɛɛ maa ma lụpa miaụŋ-mo-bino ata na amɛ Krast maa e n hwuleni umbe no ofwo hiŋ, iwɛ maa a kwụbɛ maa hi imwangwa upwaŋ ata ehi shiri la unu iwɛ ubwa, iwɛ maa a imanjɛ uŋ iwɛnɛ tu waa shɛ upwaŋ u tukwulangana, ama shɛ na tɛnda ti iji o.

⁶Ama teyinje ma inɛ gɛ, maa: bụtụ na ba bila iyi dice dice, dice dice du bɛɛ zhɛ bo gwubo hwuŋ, bụtụ na kaa ba bila iyi te gembi, te gembi du bɛɛ zhɛ bo gwubo hwuŋ.

⁷Bụtụ bụtụ ga bu na nda gana na banɛ na amɛ ubwa oko; maa kede i shɛ na amɛ-tụhaŋtụ kwo kaa ni itilɛɛ o. Iwɛnɛ po Agwatana o lubo bụtụ na ba pana iyi nu unyasa.

⁸Nazhɛ Agwatana eri a nda maa go tulubo-ti-biye ti hi hialanụ duwa duwa, iwɛ maa gana na ta ahia 'yaga ta hi gwumwa ɛgbɛɛ, maa hi na 'yaga iyi nɛ ukekeshi ibɛ ma hi nda duwa iwɛ ugondu ubiye we elele kpaaŋ.

⁹Gana na te e 'nyeci ni Iwɛ ya Agwatana, ɛɛ hiɛŋ, Agwatana peni okofwo apwaŋ duwa, tiririri tu bwa kaa ta nama unyizo-nom.

¹⁰Agwatana na a pana bɛbɛrɛ izɛgwu iwɛ tibila, keeni iyimɛyɛ, ubwa du zhɛ ma hi pana izɛgwu maa kaana iŋ ugombo iwɛ tibila. Bi zhɛ kaa ba kaana du tụ'walụ ti hiŋ ti tiririri ugombo.

¹¹Inɛ gɛ zhɛ ma hi nda maa hiɛ shɛ azhɛgba ni iyi elele, iwɛ maa hi na ala tụpana duwa, yɛɛ zhɛ kaa ya nda maa atwa ofwugwo njɛ ugwoje wa Agwatana iwɛ apwaŋ na ee leshiji tedure no tu.

¹²Iwɛnɛ po shɛ bimenji bi iyi nɛ 'nyananɛ atwa tijilo Agwatana kiri timbiyono tu ga ti iyi tɛndana to shidingo, ama tu to tuhwulo taa fwunga nu ugwoje ufwugwo na atwa a nda na Agwatana.

¹³Gana na tu ugondu ga mbiseni tumanga ti hiŋ maa hi teni cɛŋ, ɛ zhɛ a pana kaa Agwatana ụjɛrụma,[13] iwɛnɛ ta ahi hwụjɛ-unu wa Anabarɛ Ebiye Krast na ehi leni nu unu hiŋ, iwɛ ugondu ikpɛngwu-tutwa nɛ ahia twa na aba keeni atwa elele iwɛ tụpana tu na tu hwuleji.

¹⁴Gana na tu ukwedeyi hiŋ wa nda aŋ, ibɛ po aa nda adua iwe hiŋ, iwɛ tulubo-ti-biye ta Agwatana tụ 'wụtụ tu na bee hi peni.

¹⁵Ama ta nda ugwoje wa Agwatana iwɛ upwaŋ ubwa na hwuleji tụdụma!