Read bassa GALATIA 3 Bible Online

GALATIA 3 - bassa bible

GALATIA 3

¹Oo ahiɛba atwa Galatia, na hiɛ lagwụmanjɛ! Ahiɛba na ee mbiseni Jisus Krast na ee tegeni nrɛ nụ ụ'wụ'wụ-ubatanɛ caakwụ iwɛ maa hiɛ kwụbɛ. Gaaba ihiɛ inzhɛnjɛ nu unu-ụlatụ iwɛ maa kede hiɛ hwụjɛ ya unu iwɛ-tɛkana ataa?

²Inɛ gɛ kiri Ama jala maa mo soso no olugwo hiŋ. Nu ugondu Undwa na ahiɛ njɛ suu ehi leshiji la Mpiala mi Tijilo, okwo yibwa na tuhwuga tu na ahiɛ hwụjɛ iwɛ rishe-tɛtɛtana?

³Hiɛ lagwụmanjɛ suu i ci gana ata? Hi kwuni la na amɛ Mpiala; ahia ụrɛcɛnga ya hwuwayɛ nu ukpahiŋ butugwumwa suu?

⁴Asha hiɛ njɛ ụbaụta iyi ifwugwo gana ga gbi suu? Iyi tigbi ga hiŋ yaa shɛ gom?

⁵Agwatana na ma hi pana Mpiala mu na ma nda ugondu ukpahiŋ na ashashɛ hiŋ, nu ugondu Undwa suu baa nda uŋ, okwo yibwa na tuhwuga tu na ahiɛ hwụjɛ iwɛ rishe-tɛtɛtana?

⁶I 'nyeci ni Iwɛ ya Agwatana, yɛɛ hiɛŋ, Ga Abraham tɛtanɛ Agwatana rishe, aa rɛcɛ rụ no ofwo ubwa maa tiririri raa shɛ.

⁷Ibɛ po mapa ma maa atwa na shɛ atwa rishe-tɛtɛtana, aba du shɛ miaụŋ ma Abraham.

⁸Gana na ti Iwɛ ya Agwatana dumwa iŋ cebe, maa Agwatana zhɛ a pana atwa na shɛ shɛ Eju n-ndumwa-zhɛ tedure ne rishe-tɛtɛtana. Ibɛ po ee enengeni Abraham Anabarɛ Ebiye, ɛɛ hiɛŋ, Tedure na bụ, Agwatana zhɛ a pana atwa elele na namɛ nu unyizo uwebiye.

⁹Ibɛ po ɛɛ zhɛ a pana atwa na tɛtanɛ-rishe uwebiye na Abraham na tɛtanɛ-rishe.

¹⁰Iwɛnɛ po unu-tukalana 'imɛ atwa elele na namɛ nu Undwa; iwɛnɛ ti yee 'nyeci ni Iwɛ ya Agwatana, yɛɛ hiɛŋ, Agwatana keleni atwa elele na ụranjɛ shɛ iyi elele nɛ ee 'nyeci nu utakada Undwa maa a na nda iŋ unu.

¹¹Ama i banɛ upeje kpataa maa Undwa peni shi bụtụ be elele n-ndumwa-zhɛ na agba Agwatana o, iwɛnɛ ta atwa tiririri zhɛ a 'yaga uraiŋ tedure ne rishe-tɛtɛtana.[7]

¹²Ama shɛ ne rishe-tɛtɛtana Undwa banɛ o, ama bụtụ na ba nda iyi nɛ Undwa jɛmɛ, bi zhɛ ba 'yaga uraiŋ tedure nu Undwa.

¹³Ga Krast utu gwube maa ta banɛ nu unu-tukalana Undwa, gana na tu baa shɛwa unu-tukalana iwe tu. I 'nyeci ni Iwɛ ya Agwatana, yɛɛ hiɛŋ, E keleni bụtụ be elele na swacɛ nụ ụ'wụ'wụ ata unu.

¹⁴Ga Krast utu gwubwo iwɛ maa uwebiye Abraham zhaganɛ atwa na shɛ shɛ Eju tedure na Krast Jisus, maa ta lashɛga unu-tishilo Mpiala tedure ne rishe-tɛtɛtana.

¹⁵A-miaụŋ-mo-bino mi na amɛ Krast, Ma duma iwɛ gana na ta bụtụ ba duma, okwo yaa shɛ unu-tutwa na atwa twawa, aka na oo shikicingwo uŋ, i zasa bụtụ te eri ba bwada uŋ, kwo kaa maa kaana iyi elele nu bwa ya o.

¹⁶Ama ga Abraham keeni bujalalo bu bwa ubwa Agwatana shileni unu ata. Bɛ jɛmɛ shɛ maa, Keeni ajalalo bu, gana maa ajalalo ofwugwo; ama gana bu na bu ko, bɛɛ hiɛŋ, Keeni bujalalo bu na shɛ ga Krast.

¹⁷Ama Ma duma inɛ gɛ maa, Unu-tutwa na Agwatana shikicingwonuo Abraham cebe, Undwa na zhajɛ ya shiywa akpakwụ-eyebi-nu-talacɛ (430) na aba ubwa, eri shi wa bwada uŋ, iwɛ maa u njɛ unu ata tishilo iyi tɛgadaga o.

¹⁸Yaa shɛ ogwu na aa yɛ banɛ nu Undwa, asha e beni shi nu unu-tishilo; ama Agwatana shepi ogwu ata bee peni Abraham arahaŋ tedure nu unu ata tishilo.

¹⁹Asha imbe kwuŋ i shɛ ya ecilo Undwaa? E keeni uŋ iwɛ maa undwa tubwada nama uuwa i ci aka na ta bujalalo ata ee shileni la unu ata zhajɛ. E shileni bu uŋ tedure ni i'ɛlɛ ya atumwa-azuba, tedure nu u'ala bụtụ ata ba ashashɛ.

²⁰Ama bụtụ-ba-ashashɛ shɛ shɛ iwɛ bụtụ bu ko, ama Agwatana shɛ oko.

²¹Asha Undwa wa sukakana suu unu-tishilo wa Agwatana? Awo, i shɛ shɛ gana ata kwukwuŋ! Yaa shɛ ee ge peni Undwa ukpahiŋ maa una pana atwa uraiŋ, iwɛ-tɛkana asha tiririri ti gɛ zhɛ ta banɛ tedure nu Undwa.

²²Ama Utakada Iwɛ ya Agwatana jɛmɛ kpataa maa unyizo hwɛ hwɛɛ u shɛ ajama iwɛwɛ, iwɛ maa e peni tuba atwa na tɛtanɛ-rishe unu-tishilo na dure Jisus Krast.

²³Ama aka na te rishe-tɛtɛtana ri te ci shi la, ibɛ po Undwa iti kepi nu umwono-tishi gana ajama uuwa i ci aka na ee kepishinji rishe-tɛtɛtana ru ga.

²⁴Ama Undwa ubwa iti zɛrijɛ no ofwo Krast, gana na ta bi'yagajɛ-bi-yɛu ba zarɛga yɛu no ofwo umwono-bimbisegeni, iwɛ maa e ti peni n-ndumwa-zhɛ tedure ne rishe-tɛtɛtana.

²⁵Ama aka na te rishe-tɛtɛtana ri zhajɛ, tu zasa ya nu ụhwada bi'yagajɛ-bi-yɛu tutu o.

²⁶Iwɛnɛ po kpaaŋ hiŋ hiɛ shɛ ya miaụŋ ma Agwatana na amɛ Krast Jisus tedure ne rishe-tɛtɛtana.

²⁷Atwa elele na aa njɛ ubaptizim na ashashɛ hiŋ maa e teni Krast, asha hi urigeni ya Krast.

²⁸Biju ne Bigrik zha shɛ ba nama ya o, bujama nu umamata zha shɛ ba nama ya o, butubwenyi ne biyikwo zha shɛ ba nama ya o, iwɛnɛ po kpaaŋ hiŋ hiɛ shɛ ya iyi ike na amɛ Krast Jisus.

²⁹Yaa shɛ kaa ahiɛ shɛ atwa Krast, asha ahiɛba hiɛ shɛ ya ajalalo Abraham,[8] asha ahiɛba hiɛ shɛ ya ayɛ-ogwu unu ata tishilo.