Read bassa GALATIA 4 Bible Online

GALATIA 4 - bassa bible

GALATIA 4

¹Ama N hiɛŋ, Aka na ta bɛyɛ-bo-ogwu ta shɛ yɛu tidice, okwo tu baa shɛ agwangwama iyi elele, bu zasa kaa swooŋ na bujama o.

²Ama bu namɛ ni i'ɛlɛ ya angbaracɛ keeni ehiu-ihwɛ uuwa i ci aka ata Bishi bwa shilwo la cala.

³Gobwonu du atɛ shɛ la, aka na ati ta shɛ la miaụŋ mi shenje, a tu untanganɛ gana ajama ni i'ɛlɛ iyi tusoso ihiiŋ unyizo ga.

⁴Ama aka na ta aka ulwa kpaaŋ, nazhɛ Agwatana tumwanɛ Yɛu ibwɛ utumwa maa biyikwo meci iŋ, e meci iŋ kaa na aka na tu Undwa untanganɛ atwa,

⁵iwɛ maa u gwube atwa na Undwa ata untanganɛ, iwɛ maa to tono miaụŋ ma Agwatana tisha.

⁶Ama iwɛnɛ ahiɛ shɛ miaụŋ, ibɛ po Agwatana tumwanɛ Mpiala mi Yɛu ibwɛ na shɛmɛ shi tu, maa uganɛ mɛɛ hiɛŋ, Ada! Ada![9]

⁷Iwɛ ecilo ata abɛ shɛ shɛ ya bujama, ama bɛ shɛ ya yɛu-umamata. Yaa shɛ abɛ shɛ ya yɛu, asha gabụ du bɛ shɛ bɛyɛ-bo-ogwu nu ukpahiŋ wa Agwatana.

⁸Ama aka na ehi te mepi shi la Agwatana cala, hiɛ shɛ la ajama azhɛba a na shɛ shɛ iyi tugom gana na ta butugwumwa shɛ.

⁹Ama gana na te ehi mepi ya Agwatana hwuwayɛ, ahiɛba du Agwatana mepi, asha gana naa ehi te eri hia jɛshɛrɛgana maa hi gwuri no ofwo iyi tusoso ɛlɛ ihiiŋ nɛ lwegeji, nɛ kaa te shi eshe, inɛɛ nɛ ahia jala maa hi shaananɛ ajama ibɛɛ?

¹⁰Hia untangana ijitɛ, ni ipiɛnɛ, nu ushwo, nu uvwaza, keeni shiywa.

¹¹Inyɛsɛ hiŋ i n shɛ, maa ụbaụta na Ngaa njɛ iwe hiŋ zhɛ wa sha iyi tigbi.

¹²A-miaụŋ-mo-bino mi na amɛ Krast, Ma hi lụpa, maa hiɛ shɛ gana na tu Ngaa shɛ, iwɛnɛ tu Ngaa shɛ du gana na ahiɛ shɛ; hi n njɛ shɛ iyi iwɛ ye elele o.

¹³Hi mepi tebiye maa aka na tu u'waba n hwuwi shi la, Ngee hi enengeni Anabarɛ Ebiye na aka ihiiŋ,

¹⁴okwo ta tu'waba ti mi ti hi menji la, hi ngbaracɛ shɛ tụ kaa cwɛŋ o, hiɛ lacɛ shɛ tụ maa hi jineci tu o. Ama hi n leshiji gana maa N shɛ butumwa ba Agwatana ba azuba, gana maa Gamba N shɛ ga Krast Jisus.

¹⁵Asha imbe teneni unyasa hiŋ yaa? N hi le tiseyida maa yaa shɛ yee ge cimi la, hi gɛ zhɛ hi me hwucekeni la shishe shi hiŋ maa hi m peni.

¹⁶Iwɛnɛ Omo hi mbiso iwɛ-tɛkana, ibɛ suu po Ngaa shɛ ya bụtụ-bi-i'ime hiŋ?

¹⁷Atwa ata a na 'yajɛ tɛzhɛgɛdana iwe hiŋ, ama shɛ nu uhwaŋna na teni cɛŋ o, ama a jala maa e hi kepeni odubo iwe mi, iwɛ maa tuba hi 'yaga tɛzhɛgɛdana iwɛ aba.

¹⁸Ama i zhɛmɛ maa atwa na 'yaga tɛzhɛgɛdana ni iyi nɛ teni cɛŋ aka elele, shɛ na aka na tu Ngaa namɛ ne hiŋ kiri o.

¹⁹Amiaụŋ mi mi, ahiɛba na Ngaa 'yajɛ tulumongwu ta tumata ti hiŋ uuwa i ci aka na aa njɛ masha mu Krast na shɛmɛ shi hiŋ.

²⁰Ama i ga ma n kwụlanɛ maa Ma nama ne hiŋ hwuwayɛ, maa Mo sheyingo rụhwụŋ ri mi; iwɛnɛ ta ahaŋsa mi ma n zuga iwe hiŋ.

²¹Ahiɛba na hia jala maa hi nama nu Undwa, m mbishi ma de, hiɛ hwụjɛ shɛ suu iwɛnɛ Undwa jɛmɛ?

²²I 'nyeci ni Iwɛ ya Agwatana, yɛɛ hiɛŋ, Ga Abraham 'yajɛ miaụŋ-me-eyi mi yebi, yɛu towo nɛ shɛ bujama meci yɛu-ye-eyi ike, nazhɛ biyikwo bu umamata meci du yɛu-ye-eyi ike.

²³Yɛu ɛtɛ towo i shɛ bujama meci inɛ ibwɛ nu uhwaŋna na aa mata bụtụ be elele, ama biyikwo bu umamata meci inɛ ibwɛ nu uhwaŋna unu-tishilo.

²⁴Inɛ gɛ i shɛ ụsụbwa n-ndumwa. Eyikwo ga eyebi a shɛ gana unu-tutwa uyebi. Uko banɛ ni Ishɛmɛ Sainai, na meci miaụŋ na tijama, ubwa shɛ ga Haga.

²⁵Ga Haga i shɛ ụsụbwa Ishɛmɛ Sainai nɛ namɛ na Arabia, nɛ shɛ ụsụbwa Jɛrusalɛm na namɛ hwuwayɛ, iwɛnɛ tu baa ta namɛ na tijama keeni miaụŋ mu bwa hwɛɛ.

²⁶Ama Jɛrusalɛm na namɛ na azuba, ubwa shɛ umamata na shɛ bino tu.

²⁷Iwɛnɛ te e 'nyeci, ɛɛ hiɛŋ, O-bu'ulo na te meci shi yɛu, nda unyasa; gabụ na bu ta hwụjɛ shɛ la ụngwụ-tumata, kapɛshɛnga unu bu maa uganɛ iwɛnɛ ta miaụŋ mo biyikwo na ee jineci mi gembi ofwugwo mee hwuri miaụŋ mo biyikwo na 'yajɛ bwolo.

²⁸A-miaụŋ-mo-bino mi na amɛ Krast, atuba[10] tɛ shɛ miaụŋ mu unu-tishilo gana Azik.

²⁹Ama gana na ta bụtụ na ee meci nu uhwaŋna na aa mata bụtụ be elele ba shɛka la bụtụ na ee meci nu uhwaŋna Mpiala, gobwonu du yaa shɛ hwuwayɛ.

³⁰Ama imbe Iwɛ ya Agwatana hiɛɛŋ? I hiɛŋ, Bacɛnga Yɛu ɛtɛ towo i shɛ bujama, ti yɛu ibwɛ ye eyi, iwɛnɛ ti yɛu ɛtɛ ibwɛ i shɛ shɛ ya ya ogwu abana ni yɛu ɛtɛ biyikwo bu umamata meci.

³¹A-miaụŋ-mo-bino mi na amɛ Krast, tɛ shɛ shɛ miaụŋ mi yɛu ɛtɛ towo i shɛ bujama o, semi miaụŋ mo biyikwo bu umamata.