Read bassa GALATIA 6 Bible Online

GALATIA 6 - bassa bible

GALATIA 6

¹A-miaụŋ-mo-bino mi na amɛ Krast, yaa shɛ bụtụ be elele njɛ iwɛwɛ, ahiɛba na hiɛ shɛ atwa mpiala gwuricinje ma bụtụ gana ata na ahaŋsa tusaiiŋ. No momo shiyono ma du eshe iwɛ aka na tumanga ti zhɛ tu mo hi jitono.

²Ụrɛcɛnga ma Undwa Krast tedure ni i'wɛŋnɛ tumama 'waŋnanụ.

³Yaa shɛ bụtụ be elele ba haŋsa maa bɛ shɛ iyi ike, na aka na tu baa shɛ shɛ kaa iyi elele, asha bu mama halakaka.

⁴Ama ga bụtụ bụtụ na yalaga ugondu ubwa, nazhɛ ecilo tubusa tu bwa zhɛ a sha iwɛ ikɛnyi ibwɛ kiri, shɛ ni iyi nɛ binya bụtụ njɛ o.

⁵Bụtụ bụtụ tu shɛ ba 'waŋna i'wɛŋnɛ ibwɛ ikɛnyi ibwɛ.

⁶Ama ga bụtụ na oo mbisogono iwɛ, no gbodongonu iyi ibiye ye elele na bụtụ ata bo mbisogono bu.

⁷Ta mama halakaka ma o, i zasa bụtụ eri ba nda Agwatana asada o, iyi elele nɛ kaa bụtụ bɛrɛ, ibɛ du bɛɛ zhɛ bo gwubo hwuŋ.

⁸Bụtụ be elele na ba bila iyi na masha mi iwɛwɛ, bụtụ ata zhɛ bo gwubo hwuŋ tufwoso tu na tu banɛ du na masha mi iwɛwɛ. Ama bụtụ na ba bila iyi nɛ yo lomicingo Mpiala amɛ, bụtụ ata zhɛ bo gwubo hwuŋ uraiŋ unyizo-nom na banɛ du na Mpiala.

⁹Ama kede tu lukwumi ma ni iyi ibiye tɛnda o, yaa shɛ ugiriri ti keri shi, ti zhɛ to gwubo hwuŋ ta aka ata ci.

¹⁰Ibɛ po gana na ati 'yajɛ ohwolu, asha tɛ shɛ tu na ndana atwa elele iyi ibiye, ama gɛ inɛ ya atwa ihwɛ rishe-tɛtɛtana no hwulo inɛ ya atwa vwɛ.

¹¹Hioko ma, nu u'ala mu Ngaa hi 'nyatanɛ utakada ni i'nyɛtɛ gɛ gembenji!

¹²Atwa elele na a jala maa a njɛ izhɛwɛni nɛ ya kwulana eshe na masha ma butugwumwa, aba ihi tɛtajɛ maa hi jeji teleyi, iwɛ maa kede a shɛka aŋ iwɛ ubatanɛ tu'wo tu Krast kiri o.

¹³Okwo ta atwa ata jeji teleyi ta aba, a untanganɛ shɛ kaa Undwa ni ikɛnyi aba o, ama a jala maa e hi jeji teleyi iwɛ maa a na busa iwɛ masha mi hiŋ ma butugwumwa.

¹⁴Ama shɛ gana ata Ama busa o, semi ga shɛ iwɛ ụ'wụ'wụ-ubatanɛ wa Agwangwama tu Jisus Krast, iwɛnɛ po tedure nu bwa ee n teni unyizo nrɛ nụ ụ'wụ'wụ-ubatanɛ, Ngee teni du kaa unyizo nrɛ nụ ụ'wụ'wụ-ubatanɛ.

¹⁵Iwɛnɛ po te teleyi tijaja, te teleyi jejishi, tɛ shɛ shɛ iyi elele na amɛ Krast Jisus o; semi tikarɛ tu ufwo kiri.

¹⁶Ga amɛ-olom keeni inyɛmɛnyɛmɛ nama na atwa elele na zhɛ a 'wa timbisogono tu ga, keeni atwa Isrɛl a na shɛ atwa Agwatana.

¹⁷Iyi nɛ vwɛ na, kede bụtụ be elele na ma zuga ya o, iwɛnɛ po N 'yagawa i'nyɛtɛ Jisus na tu'waba ti mi.

¹⁸A-miaụŋ-mo-bino mi na amɛ Krast, go tulubo-ti-biye ta Agwangwama tu Jisus Krast tu nama na mpiala mi hiŋ. Ami.