Read bassa ƐFƐSƐS 1 Bible Online

ƐFƐSƐS 1 - bassa bible

ƐFƐSƐS 1

¹Go Poul na shɛ butumwa Jisus Krast tedure nu ukwulana wa Agwatana. No ofwo atwa tijilo Agwatana a na namɛ nɛ Ɛfɛsɛs,[1] keeni atwa tɛcara du na amɛ Krast Jisus.

²Go tulubo-ti-biye keeni amɛ-olom a na banɛ no olugwo Agwatana na shɛ Bishi tu, keeni Agwangwama tu Jisus Krast, tu nama ne hiŋ.

³Ti zhemonjino ma Agwatana na shɛ Bishi ba Agwangwama tu Jisus Krast, na iti peni uwebiye mpiala kpaaŋ no ohwolu azuba tedure na Krast.

⁴Gana na ti bee ti teri na amɛ ubwa, nazhɛ aa njɛ unyizo, iwɛ maa ta sha atwa tijilo Agwatana uzawa unu-tusapa, na agba ubwa tedure no tulubo.

⁵Ubwa hoŋswo iwɛ ohwolu tu cebe atuba na tɛ shɛ miaụŋ mu bwa tedure Jisus Krast iwɛ ikɛnyi ibwɛ, gana na ti yaa kwụlanɛ bụ,

⁶iwɛ maa ta ala shɛtana ụjɛrụma tulubo tu bwa ti biye, tu na bee ti peni arahaŋ na amɛ Yɛu ibwɛ nɛ boo lubo tebiye.

⁷E tu gwube tedure ne mehieŋ mu Krast,[2] ee ti gengeni alwapɛ tu, gana na tu ugombo tulubo tu bwa ti biye tu namɛ,

⁸tu na bee ti peni maa ti hialụ no ofwo tu, na ti'inta kpaaŋ keeni ti'eshicigo.

⁹Bu nduwa maa ta mapa iyi tusweci ukwulana ubwa, gana na ta ti'imanganga tu bwa tu na bee meme shileni na amɛ ubwa tu namɛ,

¹⁰iwɛ ugondu tɛnda na aka na ta aka ibɛ ulwa, maa sutongono iyi elele na amɛ Krast na shɛ uhiuhiu, ti iyi nɛ namɛ na zuba, ti iyi nɛ namɛ nu unyizo.

¹¹Na amɛ ubwa du aa tɛ njɛ ayɛ-ogwu ubwa, iwɛnɛ tu boo hoŋswo iwe tu cala, gana na ta ti'imanga tu ukwulana ubwa tu na baa nda iyi elele tu namɛ,

¹²iwɛ maa ta sha iyi ya ashɛtwa ụjɛrụma ubwa, atuba na ta nda ashɛlatụ na amɛ Krast cebe.

¹³Ahiɛba du hiɛ tɛtanɛ bu rishe na aka na ta ahiɛ hwụjɛ iwɛ-tɛkana ata na shɛ Anabarɛ Ebiye ubino hiŋ. Gana na ahiɛ tɛtanɛ-rishe, na amɛ ubwa du aa hiɛ njɛ useyida na shɛ Mpiala mi Tijilo mu na ee shiri la unu iwɛ ubwa.

¹⁴Mpiala ma ata ubwa ba la iyi-yo-ogwu tu i'ɛlɛ, uuwa i ci tugwube ta atwa na shɛ atwa Agwatana, iwɛ tɛshɛtana tụ ụjɛrụma ubwa.

¹⁵Iwɛ inɛ gɛ Gamba ni ikɛnyi mi du, aka na tu Ngaa hwụjɛ iwɛ rishe ri hiŋ tɛtɛtana na amɛ Agwangwama tu Jisus, keeni tulubo tu na ehi lubi[3] atwa tijilo Agwatana kpaaŋ.

¹⁶N genji shi ugwoje tɛnda iwe hiŋ o, Me hi teyinje kaa na shidua shi mi,

¹⁷iwɛ maa ga Agwatana Agwangwama tu Jisus Krast na shɛ Bishi bu ụjɛrụma, na hi pana mpiala mi ti'inta keeni mu na mu tɛkapɛshɛnga ni iyi-tumapa iwɛ ubwa.

¹⁸Ma nda adua maa go uhioko-uhwaŋna shini ne eshe shihaŋsa shi hiŋ, iwɛ maa hi mepi ashɛlatụ ụhiɛŋshɛ na Agwatana a suyana bụtụ, keeni ugombo ụjɛrụma iyi-yo-ogwu ubwa na amɛ atwa tijilo Agwatana,

¹⁹maa hi mepi tugombo tụ 'wụtụ tu ukpahiŋ ikɛnyi ibwɛ no ofwo tu na tɛtanɛ-rishe, gana na tu ukpahiŋ ikɛnyi ibwɛ nɛ ya nda ugondu namɛ.

²⁰Ubwa shɛ unaa na baa njɛ ugondu na amɛ Krast, aka na bɛɛ hicinjɛ bụ no tu'wo, baa gɛgɛcɛnjɛ bụ kaa nu u'ala ubiye ubwa no ohwolu azuba.

²¹Uhwuri shɛgwuma shi unyizo, keeni ụhwada, keeni ukpahiŋ, keeni tugwama, keeni izeci tɛzhɛgba ye elele nɛ oo po atwa, shɛ na aka ga kiri o, ama na aka na tee ci du.

²²Agwatana tileni iyi elele tuta tu ụhwada Krast, baa njɛ bụ uhiuhiu iyi elele iwɛ tụ'ụlwa-tụ-ụhiɛŋshɛ-Agwangwama,

²³tu na tɛ shɛ tu'waba tu bwa. Tishidingo ta bụtụ na bo shidingo iyi elele.