Read bassa 1 TƐSƐLONIKA HIIŊ 1 Bible Online

1 TƐSƐLONIKA HIIŊ 1 - bassa bible

1 TƐSƐLONIKA HIIŊ 1

¹Go Poul, na Silvanos,[1] keeni Timoti, no ofwo tụ'ụlwa-tụ-ụhiɛŋshɛ-Agwangwama tu na tu namɛ ni Tɛsɛlonika, tu na tɛ shɛ ma tu ta Agwatana na shɛ Bishi keeni Agwangwama tu Jisus Krast. Go tulubo-ti-biye keeni amɛ-olom nama ne hiŋ.

²Ta nda ugwoje na Agwatana aka elele iwɛ hiŋ hwɛɛ. Te hi teyinje kaa na shidua shi tu ɛgbɛɛ.

³Te teyingenji ugondu hiŋ u rishe-tɛtɛtana na agba Agwatana tu na shɛ Bishi tu, te tire ti hiŋ, to tulubo ti hiŋ, ti isɛbwɛ hiŋ ti'ima keeni ashɛlatụ hiŋ na ahia shɛlana Agwangwama tu Jisus Krast.

⁴A-miaụŋ-mo-bino tu na amɛ Krast, ti mepi maa Agwatana ihi lubi, bee hi teri du.

⁵Anabarɛ Ebiye tu zhe shi pi hiŋ nu n-ndumwa mo ohondo, ama a zhajɛ du nu ukpahiŋ na dure Mpiala mi Tijilo, keeni tumapa ti tikpeke. Gana na te ehi mepi du atwa gana na atɛ shɛ na ashashɛ hiŋ iwɛ hiŋ.

⁶Ahiɛba hiɛ shɛ ya atwa na ma ti shata keeni atwa na a shata du Agwangwama, ibɛ shɛ aka na ehi leshiji n-ndumwa ma ata nụ ụbaụta ụ'wụtụ keeni unyasa na Mpiala mi Tijilo mi hi peni.

⁷Ahiɛba hiɛ shɛ ya bimenji ba atwa elele na tɛtanɛ-rishe nu Masɛdonia keeni Akaya.

⁸Shɛ nu Masɛdonia keeni Akaya kiri urishi iwɛ hiŋ na amɛ Agwangwama zhe wee teje o, ama rishe ru na ahiɛ tɛtanɛ Agwatana ri zhe no ofwo elele. Iwɛ ecilo ata ukekeshi u ti te shi ya maa ta dumana iwɛ ye elele o.

⁹Aba ni ikɛnyi aba a duma ya iwɛ tutono tu na eti teni na ashashɛ hiŋ, keeni iwɛ tɛjɛshɛrɛga tu na ahiɛ jɛshɛrɛjɛ ehi genji tuwa, ahi zhajɛ pa Agwatana na shɛ buumwa, na kaa shɛ bu na bu tɛkana maa hiɛ ndanɛ bụ iyi.

¹⁰A jɛmɛ du kaa gana na ahia 'yaka Yɛu ibwɛ nɛ bɛɛ hicinjɛ no tu'wo. Ubwa shɛ ge Jisus Krast na zhɛ ba banɛ na azuba maa ma tu la ni isɛbwɛ nɛ ye ci.