Read bassa 1 TƐSƐLONIKA HIIŊ 5 Bible Online

1 TƐSƐLONIKA HIIŊ 5 - bassa bible

1 TƐSƐLONIKA HIIŊ 5

¹A-miaụŋ-mo-bino mi na amɛ Krast, ihi shanɛ shɛ ya iyi ukekeshi maa bụtụ be elele ihi 'nyatanɛ iwɛ aka keeni ijitɛ nɛ ijɛ kpaaŋ zhɛ ya ndangana o.

²Ahiɛba ni ikɛnyi hiŋ hi mepi gom maa Ụjita tugwure ta Agwangwama zhɛ wa sha gana na[9] to buzundo ba zhajɛ nụ ụjita.

³Aka na atwa hiɛŋ, Amɛ-olom na, iyi elele kaa namɛ ya suu, eshigiri nazhɛ ufwu tɛnda zhɛ wo jitono aŋ gana ụngwụ-tumata na to biyikwo na ga 'yajɛ ofubo. A zha shɛ kaa a banangana kwukwuŋ.

⁴Ama a-miaụŋ-mo-bino mi na amɛ Krast, hi zasa ne tishi maa ụjita ata u hi jiteni orugbugbu gana na buzundo ba zhajɛ o.

⁵Iwɛnɛ po kpaaŋ hiŋ hiɛ shɛ miaụŋ mu uhioko-uhwaŋna keeni miaụŋ mu uwaŋna; tɛ shɛ shɛ mu na mu ụjita kwo kaa mu na me tishi o.

⁶Ibɛ po kede tu no woto ma malabụ gana atwa vwɛ o, ama tu no shiyono ma eshe, ge shishe shi tu shi nama ngbɛrɛ.

⁷Atwa na o woto malabụ, nụ ụjita oo woto malabụ, atwa na kaa a swa iyi nɛ ya ngba bụtụ, nụ ụjita du aa swa iyi nɛ ya ngba bụtụ.

⁸Ama atuba na tɛ shɛ atwa uwaŋna, tɛ shɛ shɛ tu na swa iyi nɛ ya ngba bụtụ o, ama tɛ shɛ ta 'yaga rishe-tɛtɛtana ru na rɛ shɛ gana ụshɛmbɛrɛ-wa-agba keeni tulubo. Ga ashɛlatụ ubino na ata nda a shɛ gana ukata-ụshɛmbɛrɛ tu.

⁹Agwatana iti tileni shi iwɛ isɛbwɛ o, ama iwɛ maa ta lashɛga ubino ata dure Agwangwama tu Jisus Krast,

¹⁰na 'wi iwe tu, iwɛ maa okwo oto shiyono-eshe, kwo kaa oto woto malabụ, iwɛ maa ta nama nu bwa.

¹¹Iwɛbɛ po no momo koononu ma ikɛnyi ahiɛba hiɛba, maa hi no momo mbiyongonu, gana na ahi ga na nda du.

¹²A-miaụŋ-mo-bino mi na amɛ Krast, ta hi tabwa maa hi mepi atwa na a nda ugondu duwa na ashashɛ hiŋ, aba shɛ atwa na ma hi 'yagaga, a na kaa mo hi mbisogono shihaŋsa na amɛ Agwangwama.

¹³Na pana aŋ ma ụjɛrụma maa hi no lubo aŋ iwɛ ugondu wa aba na aa nda. Nama ma na amɛ-olom ahiɛba hiɛba.

¹⁴Ama a-miaụŋ-mo-bino mi na amɛ Krast, ta hi kaana ikɛnyi, maa hi na tɛtagana atwa na a nda iyi saka saka unu, na ingatanga ma atwa na shihaŋsa sha aba sha zhɛgɛda, nɛ cɛ ma atwa na lwegeji i'ɛlɛ, na ima ma isɛbwɛ na atwa gana ga kpaaŋ.

¹⁵Na nda ma pece maa kede bụtụ na aa njɛ iyi iwɛ tụpanɛ iyi iwɛ nɛ aa njɛ bu o, ama na 'wa ma inɛɛ nɛ zhɛmɛ na ashashɛ hiŋ aka elele keeni no ofwo atwa kpaaŋ.

¹⁶Na nda ma unyasa aka elele.

¹⁷Na uranga ma adua tɛnda zawa tɛganga.

¹⁸Na nda ma ugwoje iwɛ iyi elele iwɛ Krast Jisus. Inɛ ɛtɛ ibɛ i shɛ ukwulana wa Agwatana na amɛ Krast Jisus iwɛ hiŋ.

¹⁹To 'woricingo ma ulwa Mpiala mi Tijilo.

²⁰Ta ngbaraka ma tigesere cwɛŋ o.

²¹Ama na yalaga ma iyi elele; maa hi na untangana inɛɛ nɛ zhɛmɛ dimi.

²²Na mama dashɛgana ma maa hi na ganga iyi iwɛ ye elele.

²³Ga Agwatana amɛ-olom ni ikɛnyi ibwɛ ihiɛ njɛ atwa tijilo gom. Ga untangana mpiala mi hiŋ, to shihwulu shi hiŋ keeni tu'waba ti hiŋ hwɛɛ maa hi nama fwaaŋ, iwɛ maa kede hi 'yaga hwuŋ unu-tusapa na aka tugwure ta Agwangwama tu Jisus Krast o.

²⁴Bụtụ ata na ma hi suyana bɛ shɛ bụtụ bɛ tɛcara; ubwa kaa zhɛ ba nda iŋ du.

²⁵A-miaụŋ-mo-bino mi na amɛ Krast, na tu ndana ma adua.

²⁶'Walụ ma miaụŋ-mo-bino kpaaŋ na turuwanɛ ti tijilo.

²⁷N hi tɛtaganɛ-unu ni izeci ya Agwangwama, maa ga a rɛtanjɛ miaụŋ-mo-bino me elele na amɛ Krast utakada ga.

²⁸Go tulubo-ti-biye ta Agwangwama tu Jisus Krast tu nama ne hiŋ.