Read bassa JOSHUA 13 Bible Online

JOSHUA 13 - bassa bible

JOSHUA 13

¹Go Joshua injɛ tebiye; ibɛ po AGWANGWAMA hiɛŋ bụ, Bɛ injɛ ya tebiye, cɛnjɛ tu na tu ta shɛ aa lashɛga kaa ti te gembi.

²Cɛnjɛ ta ata tu ta vwɛ na: ofwo elele na Afilistia keeni Ɛgɛshu namɛ hwɛɛ,

³te kwune nu Urefu Shiho geri bu uwaŋna-banụ bi Ijipti uuwa i ci tugwungwu te Ekron tuzuba, a rɛcɛ tụ hwɛɛ maa tɛ shɛ Ekenan. Ehiu Afilistia a ta namba apata: aba shɛ atwa Gaza, na atwa Ashdod, na atwa Ashkelon, na atwa Gat, ta atwa Ekron keeni atwa Avim.

⁴Apata ta shɛ cɛnjɛ ta atwa Kenan hwɛɛ, keeni atwa Miara tu na atwa Saidụn 'yajɛ, tutu i ci Ɛfɛk tutu tugwungwu ta A'amo;

⁵na shɛ cɛnjɛ ta atwa Gɛbal keeni Lebanon geri na uwaŋna wa banɛ hwɛɛ, te kwune nu Bal-gad tuta ti Ishɛmɛ Hɛmon tutu i ci ofwo tutono ta cɛnjɛ tu Hamat.

⁶Gamba ni ikɛnyi mi N zhɛ mo unzongo atwa Isrɛl atwa elele na jɛjɛ na cɛnjɛ ti ishɛmɛ, te kwuni ni Lebanon i ci Misrefot-maim, ta atwa Saidụn hwɛɛ. Ga shɛ ni icɛcɛ tu'waŋ ɛbi zhɛ bo dwotwogonu atwa Isrɛl cɛnjɛ ta ata maa tɛ shɛ iyi-yo-ogwu aba gana na ti Ngee bi peni la unu.

⁷Dwotwogonu alamụ ecinjishi cɛnjɛ ta ata keeni ashashɛ ụlamụ Manasɛ maa tɛ shɛ iyi-yo-ogwu aba.

⁸Ụlamụ Rubɛn, nụ ụlamụ Gad keeni ashashɛ ụlamụ Manasɛ o loshigwo cɛnjɛ ta aba, tu na go Moses yɛu ɛtɛ ugondu ya AGWANGWAMA peni aŋ. Tuba tɛ shɛ ma tu na tu namɛ geri bu uwaŋna-banụ Jodan.

⁹Tugwungwu ta aba tu to tuhwulo te e zhe Aroe na namɛ nu ukwunanga Ulomu Anon keeni ụshɛpwụ ata namɛ na ashashɛ ulomu, medenji cɛnjɛ cɛnjɛ ta ata ti zeci hwɛɛ, te kwune ni Mɛdeba tutu i ci Dibon.

¹⁰Ti zhe tutu uce A'amo, medenji ashɛpwụ elele na ge Sihon agwuma A'amo na yɛ tugwama ni Hɛshbon 'yajɛ ụhwada tuba.

¹¹Giliad na shɛ tugwungwu tɛ Ɛgɛshu na atwa Mɛka tu namɛ na tuba hwɛɛ, ti Ishɛmɛ Hɛmon, keeni Bashan tutu i ci Salika hwɛɛ.

¹²Tuba tɛ shɛ cɛnjɛ-ta-tugwama tu Og na namɛ nu Bashan hwɛɛ, ubwa kaa yɛ tugwama ta Ashtarot keeni Ɛdrɛi na kaa vwɛ kiri na atwa ɛmɛwɛɛ a na shɛ Arefaim. Go Moses lasụ aŋ, bee leshiji cɛnjɛ ta aba.

¹³Okwo ti yaa shɛ gana ata wa atwa Isrɛl unzhi shi Ɛgɛshu keeni Meaka, iwɛbɛ po aa ta namɛ na ashashɛ atwa Isrɛl taa hwayɛ.

¹⁴Ama bi peni shi ụlamụ Livai ogwu o, iwɛnɛ ti iyi ya arụpɛ tuhwoŋzhingo nɛ aa pana AGWANGWAMA na shɛ Agwatana Isrɛl i shɛ ogwu aba, gana na ta AGWANGWAMA peni la Moses unu.

¹⁵Go Moses peni ụlamụ Rubɛn cɛnjɛ ta aba umwamwa umwamwa maa a 'yaga.

¹⁶Tugwungwu ta aba tu kwune na Aroe ni ipɛlu Ulomu Anon keeni ụshɛpwụ ata ụ'wụtụ namɛ na ashashɛ ulomu ata, tɛ ɛ imɛ cɛnjɛ ta ata ti zeci tu na tu rungwutwonu Mɛdeba hwɛɛ.

¹⁷Tutu i ce Hɛshbon keeni ashɛpwụ ubwa a'wụtụ elele, a na namɛ na cɛnjɛ ta ata ti zeci, aba shɛ Dɛbon, nu Bamot-beal, keeni Bɛt-balmion,

¹⁸keeni Jahaz, ni Kɛdɛmot, keeni Mɛfeat,

¹⁹keeni Kiriataim, ni Sibma, ni Zɛrɛt-shaha na patanɛ ne bikpekwu na shiyeni nu ulomu,

²⁰keeni Bɛt-pio, keeni tuzwo ti Ishɛmɛ Pisga, keeni Bɛt-jɛshimot,

²¹a na ata hwɛɛ aba a shɛ ashɛpwụ na namanjɛ na cɛnjɛ tu na ti zeci, aba kaa a shɛ cɛnjɛ-ta-tugwama ti Sihon agwuma A'amo, na yɛ tugwama ti Hɛshbon. Go Moses lasụ bụ la hwɛɛ te ehwurembe Midian. Aba shɛ ge Evi, nɛ Rɛkɛm, no Zu, no Hu keeni Riba, a na shɛ miaụŋ ma agwuma Sihon, a na namɛ na cɛnjɛ ta ata.

²²Ga Balam yɛu-ye-eyi Bio na shɛ Bɛshɛjɛ, namɛ du na atwa na atwa Isrɛl kwụnɛ nu utokwobi.

²³Ukwoswo Jodan geri bu uwaŋna-twono, ubwa shɛ tugwungwu tụ ụlamụ Rubɛn. Ashɛpwụ keeni shɛngwuwa shɛ na ee peni amwamwa amwamwa ụlamụ Rubɛn maa a 'yaga ta.

²⁴Go Moses peni du amwamwa ụlamụ Gad cɛnjɛ ta aba maa a 'yaga.

²⁵Tugwungwu ta aba tɛ shɛ nu Jazɛ, keeni ashɛpwụ a'wụtụ Giliad hwɛɛ keeni ashashɛ cɛnjɛ ta A'amon tutu i ci Aroe na namɛ geri bu uwaŋna-banụ ba Araba,

²⁶ibɛ shɛ te kwuni ni Hɛshbon i ci Ramat-mizpɛ, ti Bɛtonim, keeni te kwune nu Mahanaim i ci tugwungwu ti Dɛbi,

²⁷keeni amɛ Ulomu Bɛt-haram, ni Bɛt-nimra, nu Sukot, keeni Zafon, ibɛ shɛ tuvwa ta cɛnjɛ-ta-tugwama ti Sihon agwuma Hɛshbon. Urefu Jodan ubwa shɛ ogwungwu ubwa tutu i ci ukwunanga Itekwu ɛtɛ ɛɛ hiɛŋ izeci ibɛ, Kinɛrɛt, geri bu uwaŋna-banụ bu Jodan.

²⁸Ana ata aba shɛ ashɛpwụ keeni shɛngwuwa shɛ na ee peni amwamwa ụlamụ Gad maa a 'yaga.

²⁹Go Moses peni amwamwa ashashɛ ụlamụ Manasɛ cɛnjɛ ta aba maa a 'yaga.

³⁰Tugwungwu ta aba ti zhe tutu Mahanaim, tɛɛ imɛ Bashan na shɛ cɛnjɛ-ta-tugwama tu Og agwuma Bashan, keeni ashɛpwụ dupu-ne-eshe-umpwa a na ga Jai 'yajɛ hwɛɛ nu Bashan.

³¹Ti imɛ du ashashɛ Giliad keeni Ashtarot keeni Ɛdrɛi, a na shɛ ashɛpwụ na shɛ uhiuhiu cɛnjɛ-ta-tugwama tu Og agwuma Bashan. E suji a na ata hwɛɛ ee peni ashashɛ amwamwa Maki yɛu-ye-eyi Manasɛ.

³²Gana go Moses dwotwogonu cɛnjɛ tu na tu namɛ geri bu uwaŋna-banụ bu Jɛriko keeni Jodan na aka na tu baa namɛ nu udadarɛ Moab ta.

³³Ama go Moses peni shi ụlamụ Livai cɛnjɛ te elele o. Ama bi mbishi aŋ maa aba zhɛ na ya apwaŋ elele na e peni AGWANGWAMA na shɛ Agwatana Isrɛl.