Read bassa JOSHUA 14 Bible Online

JOSHUA 14 - bassa bible

JOSHUA 14

¹Inɛ gɛ ibɛ shɛ ogwu cɛnjɛ tu na atwa Isrɛl leshiji na cɛnjɛ ti Kenan, ibɛ shɛ ma tu na ge Ɛleaza bunongbo, no Joshua yɛu Nụn keeni ehiu nhwaŋ me eshi alamụ atwa Isrɛl hwoŋshi aŋ.

²AGWANGWAMA peni Moses unu maa ga shɛ ni icɛcɛ tu'waŋ ɛɛ zhɛ o dwotwogonu alamụ ata ecinjishi na ashashɛ ụlamụ cɛnjɛ ta aba.

³Iwɛnɛ po go Moses pwonuo alamụ eyebi na ashashɛ ụlamụ cɛnjɛ ta aba geri bu uwaŋna-banụ bu Jodan, ama bi peni shi Alivai cɛnjɛ na ashashɛ atwa vwɛ o.

⁴Miaụŋ-me-eyi mu Josɛf mɛ shɛ alamụ eyebi, aba shɛ ga Manasɛ keeni Ifrem. Alivai leshiji shi cɛnjɛ te elele o, semi ashɛpwụ na maa a nama kiri keeni cɛnjɛ tu na ti 'yajɛ ambɛ iwɛ iyimabiga ya aba keeni inɛ ya aba.

⁵Ibɛ po atwa Isrɛl hwoŋshi cɛnjɛ ta ata, gana na AGWANGWAMA peni Moses unu gom gom.

⁶Nazhɛ atwa na banɛ nụ ụlamụ Juda zhajɛ pu Joshua ni Gilgal, bụtụ bu ko na amɛ aba i shɛ ga Kalɛb yɛu-ye-eyi Jefune na shɛ Bikinɛz, bɛɛ hiɛŋ bụ, Bi mepi iyi nɛ AGWANGWAMA mbishi la Moses bụtụ ata ba Agwatana ni Kadɛsh-bania iwɛ bụ ne mi.

⁷N zhɛrɛ shiywa buhanda te e m meci na aka na tu go Moses yɛu-ugondu ya AGWANGWAMA n tumwanɛ ti Ngee beni ni Kadɛsh-bania maa Ma yalajɛ cɛnjɛ tu ga. Ibɛ po Ngee gwuricingeni bu ajɛshɛgwa sasana gana na ti Ngɛɛ kwubɛ tụ.

⁸Ama miaụŋ-mo-bino mi mu na mi zhe ne mi mu bweji atwa tu shihwulu, ama okwo ti yaa shɛ bwonu N 'wa AGWANGWAMA na shɛ Agwatana mi na amɛ oko hwɛɛ.

⁹Ibɛ po go Moses n shileni-unu jita ata, bɛɛ hiɛŋ, Cɛnjɛ ta ata ɛvwɛvwɛjɛ bụ fwụndacɛ la ti zhɛ ta sha ma tụ bụ, na miaụŋ mụ bụ tilɛɛ unyizo-nom, iwɛnɛ ta abụ 'wa AGWANGWAMA na shɛ Agwatana mi na amɛ oko hwɛɛ.

¹⁰Ama kwụba, AGWANGWAMA kaa ta ma untanganɛ Ngaa ta ya uraiŋ gana na ti bee shiri la unu na shiywa buhanda-na-shɛ-ba-shɛ-ta na aka na ta AGWANGWAMA jɛmɛ n-ndumwa mu ga no Moses, ibɛ shɛ aka na ta miaụŋ mi Isrɛl mo rungo la nụ ụshɛka. Hwuwayɛ go, hioko, tɛzhɛla ti mi tu ulwa ya hwayɛ shiywa dupu-nu-talacɛ-na-shɛ-ba-shɛ-ta (85) te e m meci.

¹¹N ta 'yajɛ kaa ikɛnyi taa hwayɛ i ci gana na tu Ngaa namɛ la na aka ata go Moses n tumwanɛ utumwa ata. Ikɛnyi mi ta namba gana na ti yaa namɛ la, ti iwɛ ujasa tizha, ti iwɛ inyɛwɛŋ tɛnda.

¹²M peni ya hwuwayɛ go cɛnjɛ ta ata ti ishɛmɛ, tu gata AGWANGWAMA n shileni la unu iwɛ tuba nụ ụjita ata. Bụ hwụjɛ la du jita ata, maa ufwugwo wa atwa Anak namba apata, anaa na ashɛpwụ aba a'wụtụ 'yagajɛ uba. Nekeshi AGWANGWAMA zhɛ a nama ne mi, maa Mo unzo aŋ gana na tu baa dumwa la.

¹³Ibɛ po go Joshua peni Kalɛb yɛu Jefune uwebiye, bee peni bu ga ụshɛpwụ ata Hibron maa ụ shɛ una ubwa.

¹⁴Te kwuni na aka ata ibɛ Hibron ụ shɛ ya una wa ajalalo Kalɛb yɛu Jefune na shɛ Bikinɛz ata tutu taa hwayɛ, iwɛnɛ tu baa 'wa AGWANGWAMA na shɛ Agwatana Isrɛl na amɛ ubwa oko hwɛɛ.

¹⁵Ɛ hiɛŋ la izeci Hibron ga, maa Ụshɛpwụ Kiriat-aba cala. Ga Aba ga, ubwa shɛ la bụtụ bụ 'wụtụ na hwuri atwa Anak hwɛɛ. Nazhɛ cɛnjɛ tu to ụhinjanụ nu ujasa.