Read bassa JOSHUA 23 Bible Online

JOSHUA 23 - bassa bible

JOSHUA 23

¹Na aba na ti yee ilegeji duwa, AGWANGWAMA kaa peni atwa Isrɛl amɛ-olom na atwa i'ime ya aba na rungwutwonu aŋ. Go Joshua kaa injɛ, shiywa shɛ bwa kaa shi gembi ufwugwo tebiye.

²Ibɛ po baa suyanɛ atwa Isrɛl hwɛɛ, tu n-nyarɛ ma aba, te ehiu aba, ta ajɛmɛ-ụshɛrɛya keeni atwa shihwolu. Bɛɛ hiɛŋ aŋ, N injɛ ya, Shiywa shi mi kaa shi gembi ya ufwugwo tebiye.

³Hi kwụbwa kaa iyi elele nɛ AGWANGWAMA na shɛ Agwatana hiŋ nduwa edenji ga hwɛɛ iwɛ hiŋ. Iwɛnɛ po AGWANGWAMA na shɛ Agwatana hiŋ, ubwa kaa ihi twagwụ ifelu ɛtɛ.

⁴M pwonuo alamụ hiŋ cɛnjɛ ta anya edenji a na ta vwɛ, medenji edenji elele na Ngaa lasawa te kwune nu Urefu ata Jodan i ci Itekwu ɛtɛ I'wɛtwɛ namɛ geri bu uwaŋna-twonuo.

⁵AGWANGWAMA na shɛ Agwatana hiŋ ni ikɛnyi ibwɛ zhɛ bo unzo aŋ maa e beni nu umbe hiŋ. Ubwa kaa zhɛ bo shishingono aŋ maa e beni ne eshe hiŋ, nazhɛ ɛhi zhɛ hia lashɛga cɛnjɛ ta aba, gana na ta AGWANGWAMA hiŋ ihi shileni la unu.

⁶Iwɛbɛ po sha ma atwa tɛcara maa hi na nda iyi elele nɛ 'nyeci nu Utakada ata Undwa Moses kpaaŋ. Ta vwụla ma maa hi genji uŋ okwo iyi elele teni o.

⁷To hiŋtotongwu ma ne edenji ga vwɛ na ashashɛ hiŋ epe o. Ta na suyana ma okwo nzeci ma tuwa ta aba o, ta ta tu ma, ta zhɛba tu ma, to kwuzono tu ma o.

⁸Ama mogwu ma na AGWANGWAMA na shɛ Agwatana hiŋ gana na ahiɛ njɛ tutu i ci aka ga.

⁹Iwɛnɛ po AGWANGWAMA ihi unzwongwo edenji na gembi, a na kaa 'yajɛ ikɛnyi. I ta zasa bụtụ be elele okwo bu ko na olwo bo shikono maa ma hi ala tusukakana tutu i ci hwayɛ ga o.

¹⁰Bụtụ hiŋ bu ko gba zhɛ bo unzo atwa akpakwụ-a-ta (1,000), iwɛnɛ ti yaa shɛ maa AGWANGWAMA na shɛ Agwatana hiŋ, ubwa ma hi twagwụ ifelu, gana na ti bee hi shileni la unu gom.

¹¹Iwɛbɛ po mama 'imɛ ma tebiye maa hi no lubo AGWANGWAMA na shɛ Agwatana hiŋ.

¹²Yaa shɛ ehi gwuri ne ekwunyi maa hi togwu ne edenji ga vwɛ na ashashɛ hiŋ, maa hi na nda tụmbụla ne eyikwo aba maa a na nda du ne enee hiŋ,

¹³asha mapa ma gom maa AGWANGWAMA hiŋ zha shɛ na ta ya tuhwulo maa bu no hi unzongo edenji ga o. Ama aba zhɛ ma hi shana gana modugwulo, no ogwuru keeni odugwu na zhɛ na hi gwucanga kwo kaa gana esepi na zhɛ na hi sapaga ne eshe hiŋ; uuwa i ci aka na ehi ileni maa hi beni na cɛnjɛ tu ga ti biye AGWANGWAMA na shɛ Agwatana hiŋ ihi peni.

¹⁴Hwuwayɛ go, N zhɛ mo 'wo ya gana na atwa elele na namɛ nu unyizo ga o 'wo. Hi mepi kaa du gom na shɛmɛ shi hiŋ keeni shihwulu shi hiŋ hwɛɛ, maa i zasa iyi elele nɛ i kwu na amɛ iyi ibiye ye elele nɛ AGWANGWAMA na shɛ Agwatana hiŋ ihi shileni la unu ibɛ o. Bɛ njɛ iyi elele, okwo ike kwu su o.

¹⁵Ama gana na ta AGWANGWAMA ụrɛcɛnjɛ iyi ibiye nɛ bee hi shileni la unu ibɛ tɛnda hwɛɛ, gabata du AGWANGWAMA zhɛ ma hiɛ shapɛrɛganɛ iyi iwɛ ye elele uuwa i ci aka na bee hi iricinji hwɛɛ maa hi beni na cɛnjɛ tu ga ti biye bee hi peni,

¹⁶ti yaa shɛ ehi pindeni unu na AGWANGWAMA na shɛ Agwatana hiŋ ihi peni, maa hi zhe hi na zhɛba tuwa maa hi no kwuzono tu. Nazhɛ isɛbwɛ ya AGWANGWAMA zhɛ ya aŋpɛ maa ihi sukakanɛ; nazhɛ ɛhi zhɛ hia nda ufwu kakayɛ maa hi beni na cɛnjɛ tu ga ti biye bee hi peni.