Read bassa JOSHUA 3 Bible Online

JOSHUA 3 - bassa bible

JOSHUA 3

¹Go Joshua keeni atwa Isrɛl hwɛɛ gbatụ ti'ishijɛ nu uvwungwa dididi, te e beni ni Shitim ee ci Jodan, oo zokwu apata nazhɛ maa e keshi.

²Ti yaa namɛ ijitɛ itɛtu, ibɛ atwa shihwolu duleji tu'ulwa ta ata hwɛɛ,

³ee mbishi atwa ata, ɛɛ hiɛŋ, Aka na ahiɛ kwụbɛ to onongbo na shɛ Alivai 'waŋnɛ Ikpɛtɛ Unu-tutwa ya AGWANGWAMA na shɛ Agwatana hiŋ, nazhɛ ishijɛ ma nu ugba hiŋ maa hi 'wa iŋ.

⁴Nazhɛ ɛhi zhɛ hia mapa uhwaŋna na maa hi duri, gana na ehi te duri shi la uhwaŋna ata kwukwuŋ. Ama kaa ga ahanga nama na ashashɛ hiŋ ni ibɛ i ci gana ivwunɛ igbɛɛ-iyebi (20,000) to gwumwonu ma ni ibɛ o.

⁵Ibɛ po go Joshua mbishi atwa ata, bɛɛ hiɛŋ, Mama njɛ ma tijilo;[6] beyi ga ibɛ AGWANGWAMA zhɛ a nda arụhwajɛ na ashashɛ hiŋ.

⁶Nazhɛ go Joshua hiɛŋ onongbo ata, Shapa ma Ikpɛtɛ Unu-tutwa, maa hi keshici nu umbe atwa vwɛ. Ee shepi ga Ikpɛtɛ ɛtɛ Unu-tutwa, ee hwuleni atwa vwɛ.

⁷Ibɛ po AGWANGWAMA mbishi Joshua, bɛɛ hiɛŋ, Hwayɛ ga Ngɛɛ zhɛ mo bu kwuno tugombicingo ne eshe atwa Isrɛl hwɛɛ, iwɛ maa e mepi maa gana na Ngaa namɛ la no Moses, gobwonu du Ngɛɛ zhɛ ma nama na bụ.

⁸Pana onongbo na 'waŋnɛ Ikpɛtɛ ɛtɛ Unu-tutwa unu maa, Aka na ehi ci ụpalanụ meni mu Jodan, zhaga shikono ma na amɛ Urefu ata.

⁹Nazhɛ go Joshua hiɛŋ atwa Isrɛl, Zhajɛ ma epe maa hiɛ hwụjɛ iwɛ nɛ AGWANGWAMA na shɛ Agwatana hiŋ jɛmɛ.

¹⁰Go Joshua hiɛŋ aŋ, Ni inɛ gɛ ibɛ ɛhi zhɛ hia mapa maa Agwatana na shɛ buumwa namɛ na ashashɛ hiŋ, bɛɛ zhɛ kaa mo hi unzongo Ekenan, nɛ Ɛhit, ne Ɛhiv, nɛ Ɛpɛrɛz, na Agigash, na A'amo, keeni Ɛjɛbus tilɛɛ.

¹¹Hioko ma, Ikpɛtɛ Unu-tutwa ya Agwangwama na 'yajɛ unyizo hwɛɛ zhɛ mo hi hwulono umbe na amɛ Jodan.

¹²Tala ma atwa umpwa-na-ba-eyebi na alamụ Isrɛl hwuwayɛ go, atwa oko oko nụ ụlamụ we elele.

¹³Aka na tɛ shivwɛvwɛjɛ sho onongbo na 'waŋnɛ Ikpɛtɛ ya AGWANGWAMA na 'yajɛ cɛnjɛ tu unyizo hwɛɛ timengeni meni mu Jodan, nazhɛ meni mu Jodan mi zhɛ ma jajụ, ibɛ meni na mɛ fwunjɛ tuzuba mi zhɛ mo shikono mungwuu gana ụdakwụ.

¹⁴Aka na ta atwa ata ishijɛ no shidulo sha aba maa e keshi Jodan, nazhɛ onongbo ata 'waŋnɛ Ikpɛtɛ ɛtɛ Unu-tutwa hwuri umbe na atwa vwɛ.

¹⁵Urefu Jodan kaa fwukanɛ, waa yɛ okwoswo ubwa tutu i ci aka iyimɛyɛ tugwubo. Aka na to onongbo na 'waŋnɛ Ikpɛtɛ ɛtɛ ci Jodan, tɛ shivwɛvwɛjɛ sha aba shɛ fwụnjɛ ipɛlu meni ma ata,

¹⁶nazhɛ meni mu na mi gɛ fwunjɛ tuzuba mi ishijɛ mee shikeni mungwuu taa dụlụ, na Adam, na shɛ ụshɛpwụ ụ'wụtụ na dongonu Zaretan, mu naa na ma fwunga tuta mụ fwụnjɛ me zwi ni Itekwu Araba, nɛ shɛ Itekwu Manɛ, mu na ata mu jajụ hwɛɛ; nazhɛ atwa ata keshi ne eririri Jɛriko.

¹⁷Ibɛ onongbo ata 'waŋnɛ Ikpɛtɛ Unu-tutwa ya AGWANGWAMA shikeni na cɛnjɛ tuhwoo na ashashɛ Jodan ata dimi, na aka na ta atwa Isrɛl a kashɛka uuwa i ci aka na udenji wa atwa ata keshi na cɛnjɛ tuhwoo hwɛɛ aba.