Read bassa JOSHUA 8 Bible Online

JOSHUA 8 - bassa bible

JOSHUA 8

¹Nazhɛ AGWANGWAMA hiɛŋ Joshua, Ta nda inyɛsɛ o, kede ohwulu ubu horukono kaa o. Sugo ejeshi hwɛɛ maa e zhe na bụ, maa sukakanɛ Ai. N nduwa maa lasụ agwuma Ai, ta atwa ubwa, tu ụshɛpwụ ubwa, keeni cɛnjɛ tu bwa.

²Hwala ma ụshɛpwụ ata na aba ubwa. Nda Ai, ta agwuma ubwa gana na abɛ njɛ la Jɛriko keeni agwuma ubwa, ama tuba sugo i'wɛŋnɛ ɛtɛ ujasa yɛ keeni iyimabiga maa i shɛ ufwa bụ.

³Go Joshua ishijɛ ga keeni ejeshi ubwa hwɛɛ, ee zhe maa a sukakanɛ Ai. Bee teri ejeshi na 'yajɛ ikɛnyi igbɛɛ-umpwa-ni-bɛ-itɛ (30,000), baa tumwanɛ aŋ nụ ụjita.

⁴Bee peni aŋ unu, bɛɛ hiɛŋ, Hwala ma ụshɛpwụ ata na aba ubwa. Ta dụlụma ma nu bwa o, ama mama 'imɛ ma hwɛɛ hiŋ maa hi sukakanɛ uŋ.

⁵Gamba na atwa na namɛ pi mi, ti zhɛ tuba to gwumwongonu nu ụshɛpwụ ata. Aka na aa banɛ maa a tụ sukakanɛ gana ala ihiiŋ, ti zhɛ te gezhigeni aŋ.

⁶Ɛ zhɛ tuba me tu urigeni nu usumwa uuwa i ci aka na ɛti gɛnjɛ ụshɛpwụ ata hwɛɛ; iwɛnɛ po ɛ zhɛ hiɛŋ, E ti gezhigeni hwayɛ ga sasana gana ala ihiiŋ. Gana ɛti zhɛ to gozhigono aŋ ta.

⁷Ahiɛba tuba ishijɛ ma no olugwo ata ahi ga swakacɛ, maa hi leshiji ụshɛpwụ ata. Iwɛnɛ po AGWANGWAMA na shɛ Agwatana tu zhɛ mo hi utogono uŋ.

⁸Aka na ehi leshiji ụshɛpwụ ata, sapa uŋ ma ulwa. Nda uŋ ma gana na ta AGWANGWAMA ihi peni-unu. Kwụba ma, N hi pwonuo ya unu.

⁹Nazhɛ go Joshua tumwanɛ aŋ, ee hwuri; ee zhe ee hweri uŋ ga, ee ubegeni na ashashɛ Bɛtɛl nu Ai, geri bu uwaŋna-twonuo bu Ai; ama go Joshua tuba zokwu na atwa vwɛ nu ugba nụ ụrụmɛ ata tutu iyi heri.

¹⁰Ti iyi heri, go Joshua gbatụ ti'ishijɛ nu uvwungwa, baa suyanɛ ejeshi urubwo uko. Nazhɛ ubwa nu n-nyarɛ ma atwa Isrɛl hwuleni aŋ umbe, ee munji nụ ụshɛpwụ ata.

¹¹Nazhɛ etwenyi ujasa a na namɛ nu bwa hwɛɛ zhe oo gwumwonu nu umbe tutono tụ ụshɛpwụ ata. Ee jwe ugba wa aba tuzuba tu Ai, ulomu tuba namɛ na ashashɛ aba nu Ai.

¹²Go Joshua teri atwa gana igbɛɛ-iyebi-na-akpakwụ-a-ta (5,000), bee tileni aŋ maa ga a swaka maa o gubogogo na ashashɛ Bɛtɛl nu Ai, geri bu uwaŋna-twonuo bụ ụshɛpwụ ata.

¹³Ibɛ po ee jelekeni ejeshi elele na namɛ nu ugba, tuzuba tụ ụshɛpwụ ata ohwolu aba, atwa ebe ge gwubegeji tuba namɛ geri bu uwaŋna-twonuo bụ ụshɛpwụ ata. Go Joshua tuba zhe baa namɛ nu ulomu ata uuwa iyi heri.

¹⁴Aka na ta agwuma Ai kwụbɛ ijɛ, tu bwa ta atwa elele na namɛ nu ụshɛpwụ ata, aa gbatụ ti'ishijɛ nu uvwungwa, ee beni maa a sukakanɛ atwa Isrɛl nu ujasa geri ba Araba. Ama bi mepi shi maa atwa oko swakwawa ba e gwubeji bu na aba ụshɛpwụ ata o.

¹⁵Nazhɛ go Joshua, na atwa ujasa Isrɛl hwɛɛ, njɛ gana maa aba oo gozhigono, ee gezhiji oo to geri bụ ụshɛka.

¹⁶Ibɛ po atwa na namɛ nụ ụshɛpwụ ata mama suyaganụ hwɛɛ aba maa e urigeni aŋ. Ee urigeni Joshua ɛɛ mɛmɛ bɛcinjɛ ɛɛ gɛnjɛ ụshɛpwụ hwɛɛ.

¹⁷I zasa ya bụtụ be elele ta vwɛ nu Ai kwo kaa ni Bɛtɛl, na beni shi maa e urigeni atwa Isrɛl o. E kepishinji du ụshɛpwụ, ee genji uŋ ee urigeni atwa Isrɛl.

¹⁸Nazhɛ AGWANGWAMA hiɛŋ Joshua, Sakana isɛnu[12] ɛtɛ abu 'waŋnɛ nu u'ala bụ geri bu Ai, iwɛnɛ po N zhɛ mo bu utogono uŋ. Go Joshua sekeni ga isɛnu ɛtɛ baa 'waŋnɛ nu u'ala ubwa geri bụ ụshɛpwụ ata.

¹⁹Nazhɛ atwa ebe ga swakacɛ bananjɛ kakayɛ gunu na tu u'ala ubwa te sekeni, ee gezhiji ee teni nụ ụshɛpwụ, ee leshiji uŋ; ee sepi uŋ ulwa kakayɛ.

²⁰Aka na te etwenyi Ai mbiyanɛ ekwunyi, aa kwụbɛ tu nshikwo mụ ụshɛpwụ ata mu munji na azuba; a zasa ya kaa geri elele maa e gezhiji o. Iwɛnɛ po atwa ebe ge gezhigeni aŋ geri bụ ụshɛka bitirije, ee urigeni ya atwa ata ge urigeni aŋ.

²¹Aka na tu go Joshua na atwa Isrɛl hwɛɛ kwụbɛ maa atwa na ga swakacɛ loshigwo ụshɛpwụ ata, nshikwo mu bwa kaa mu munji na azuba, nazhɛ ɛɛ yinjɛ ya, ee kwuni etwenyi Ai tụkwụna.

²²Nazhɛ atwa ebe ge gwubeji banɛ nụ ụshɛpwụ, aa twa na aba. Gabata atwa Ai zweni ya na ashashɛ atwa Isrɛl, atwa Isrɛl oko namɛ geri ye atwa oko namɛ geri na. Ibɛ po atwa Isrɛl kebi aŋ, i zasa bụtụ ba aba okwo bu ko na vwɛ kwo kaa na benengeni o.

²³Ama ɛ imɛ agwuma Ai buumwa buumwa, aa shapɛ bụ no ofwo Joshua.

²⁴Aka na ta atwa Isrɛl hwuwi atwa Ai a na ge urigeni aŋ nụ ụshɛka tụkwụna hwɛɛ nu utokwobi, nazhɛ atwa Isrɛl hwɛɛ gwuri nu Ai, aa kwụnɛ atwa elele na ga ta namba apata.

²⁵Etwenyi keeni eyikwo Ai a na aa kwụnɛ jita ata hwɛɛ, namɛ igbɛɛ-icihiŋ (12,000).

²⁶Iwɛnɛ po go Joshua gwuricinji shi u'ala ubwa na bee ge sekeni isɛnu ibwɛ uuwa i ci aka na bee iricinji atwa na jɛjɛ nu Ai hwɛɛ o.

²⁷Semi iyimabiga keeni i'wɛŋnɛ ụshɛpwụ ata nɛ ujasa yɛ kiri atwa Isrɛl suji aa njɛ ufwa wa aba, gana na ta AGWANGWAMA go pwonuo Joshua unu.

²⁸Gana go Joshua hwoŋzhinji Ai, baa njɛ uŋ ubizo na hwuŋzwotongwu unyizo-nom keeni osombo tutu taa hwayɛ ta.

²⁹Nazhɛ bee sweci agwuma Ai nụ ụ'wụ'wụ tutu ụrụmɛ. Aka na tu uwaŋna zhɛ utwonuo, go Joshua peni aŋ unu maa ge kezhicinje ru'wo ru bwa nụ ụ'wụ'wụ ata. Nazhɛ ee keri ru no tutono tụ ụshɛpwụ ata. Ee suteni apata atayɛ a na shɛ gana ụdakwụ ụ'wụtụ na azuba ubwa, e te shikeni ba kaa taa hwayɛ.

³⁰Nazhɛ go Joshua meni AGWANGWAMA na shɛ Agwatana Isrɛl utukwu-ụrụpɛ ni Ishɛmɛ Ebal,

³¹gana na tu go Moses yɛu ɛtɛ ugondu ya AGWANGWAMA sekekeni la atwa Isrɛl. Bu mo uŋ nu gana na ti yee 'nyeci nu Utakada Undwa Moses, utukwu ata ụ shɛ utayɛ umudu, shɛ nụ ụshɛmbɛrɛ ee shebi uŋ o. Nu bwa aa pana AGWANGWAMA arụpɛ tuhwoŋzhingo keeni arụpɛ amɛ-olom.

³²Nu utayɛ ata bee 'nyeci tuzwogo tu Undwa Moses ne eshe atwa Isrɛl, ibɛ shɛ undwa ata 'nyotwo la.

³³Ibɛ po atwa Isrɛl hwɛɛ, tu n-nyarɛ ma aba, te e'nyeci aba keeni ajɛmɛ aba ụshɛrɛya, shikekeni zalụ hweehwe bi Ikpɛtɛ ɛtɛ Unu-tutwa ya AGWANGWAMA, aa ngbaracɛ geri bo onongbo a na shɛ Alivai a na 'waŋnɛ iŋ. Ta miaụŋ mɛ cɛnjɛ, ta agaiŋ na namɛ na ashashɛ aba. Ashashɛ aba oko shikekeni nu umbe Ishɛmɛ Gerizim, ashashɛ aba uyebi shikekeni nu umbe Ishɛmɛ Ebal, gana na tu go Moses yɛu ɛtɛ ugondu ya AGWANGWAMA sekekeni aŋ la, gana na maa a na pana atwa Isrɛl uwebiye.

³⁴Na aba inɛ ɛtɛ, nazhɛ go Joshua rɛcɛ n-ndumwa mu undwa ata hwɛɛ, ta mu na mu uwebiye-tupana, ta mu na mu unu-tukalana, gana na ti yee 'nyeci nu Utakada ata Undwa hwɛɛ.

³⁵I zasa n-ndumwa me elele mu na go Moses peni aŋ unu, go Joshua rɛtanjɛ shɛ tusotulonu ta atwa Isrɛl hwɛɛ o, te eyikwo, ta atwa na gwụmwatangwụ, ta agaiŋ na namɛ na ashashɛ aba.