Read bassa JOSHUA 9 Bible Online

JOSHUA 9 - bassa bible

JOSHUA 9

¹Aka na ta shɛgwuma shɛ na shɛ namɛ hileniye Jodan na cɛnjɛ tu nshama keeni cɛnjɛ tu ulomu nụ ụpalanụ Itekwu ɛtɛ I'wɛtwɛ geri bu Lebanon, hwɛɛ hwụjɛ ijɛ, aba shɛ Ɛhit, na A'amo, ne Ekenan, nɛ Ɛpɛrɛz, nɛ Ɛhiv keeni Ɛjɛbus.

²Aa ụlwatagwụ na ahaŋsa oko maa a njɛ ujasa no Joshua keeni atwa ubwa Isrɛl.

³Ama aka na ta atwa na jɛjɛ ni Gibion hwụjɛ iyi nɛ go Joshua njɛ atwa Jɛriko keeni atwa Ai,

⁴ibɛ po aa njɛ ti'inta, aa mama njɛ gana atwa oko a na banɛ taa dụlụ. Ee petengeni nzhinyacɛ ma aba ozuzu azhɛka, keeni otutu meni mu tụ'walụ ta afwafwa anaa na inganjɛ ee tegeji.

⁵Ee hwuŋtengeni du ozuzu shibida shɛ na ee tegeji, ee uregeni tuzuzu, iyimɛyɛ ye elele nɛ aa 'wananjɛ maa a na ya nu uhwaŋna hwetegeni, yaa ụnshɛ cinya.

⁶Ee zhe no ofwo Joshua nu ugba na oo sotulonu ni Gilgal. Ɛɛ hiɛŋ bụ, medenji atwa vwɛ Isrɛl, Tu banɛ na cɛnjɛ tu na tụ dụlụmɛ, maa tu twa ma unu.

⁷Ama atwa Isrɛl hiɛŋ Ɛhiv[13] ata, Nekeshi hi namɛ fweye to gwumwongonu no tu; gana naa ɛti zhɛ ta twa-unu ne hiiŋ?

⁸Nazhɛ ɛɛ hiɛŋ Joshua, Miaụŋ mụ bụ mu ugondu atɛ shɛ. Ibɛ po go Joshua heŋteni aŋ, bɛɛ hiɛŋ, Ata aba kwuŋ ahiɛ shɛɛ? Ce kwuŋ ahiɛ banɛɛ?

⁹Ɛɛ jishijɛ bụ, ɛɛ hiɛŋ, Miaụŋ mu ga bụ mu ugondu mu banɛ na cɛnjɛ tu na tụ dụlụmɛ, iwɛ urishi wa AGWANGWAMA na shɛ Agwatana bụ na atụ hwụjɛ keeni unabarɛ iyi elele nɛ baa njɛ atwa Ijipti hwɛɛ,

¹⁰keeni iyi nɛ baa njɛ agwuma shi yebi sha A'amo shɛ na shɛ namɛ hileniye Jodan, aba shɛ ge Sihon agwuma Hɛshbon keeni Og, shɛgwuma Bashan a na namɛ na Ashtarot.

¹¹Ibɛ po n-nyarɛ mu tu, ta atwa elele na jɛjɛ na cɛnjɛ tu tu, iti hiɛŋ, 'Waŋna ma iyimɛyɛ nɛ ɛhi zhɛ hi na ya nu uhwaŋna, maa hi teji aŋ uhwaŋna, maa hi mbishi aŋ, hi hiɛŋ, Tɛ shɛ miaụŋ mi hiŋ mu ugondu; tu twa ma unu atuba te hiŋ.

¹²Iyimɛyɛ gɛ tu, i te vwengenji la te etu suje iŋ nu nhwaŋ mu tu, nụ ụjita na etu kwune tahaŋnụ tu ga maa ta zhajɛ pi hiŋ maa tu na ya nu uhwaŋna. Ama hwuwayɛ go hioko ma, ti ye hwetegeni, yaa ụnshɛ cinya.

¹³Otutu ga etu zweni meni mụ tụ'walụ ta afwafwa, a ta shɛ la ofwo ofwo aka na etu zweni mu na aba, ama hioko ma, a dwatwagwawa. Tugwuno tu ga tu tu keeni shibida shɛ ga shi tu shɛ inganjɛ iwɛ tahaŋnụ tu na tu hwuri ụdụlụ.

¹⁴Ibɛ po atwa Isrɛl leshiji iyimɛyɛ ya aba nɛ aa 'waŋnɛ, ama e heŋteni shi tugwo AGWANGWAMA iwɛ aba o.

¹⁵Ibɛ po go Joshua twa-unu wa amɛ-olom na aba, maa e leneni aŋ maa a yɛ uraiŋ. Ehwurembe aba shileni aŋ unu maa ɛ zhɛ a untangana unu ata tutwa.

¹⁶Na aba na ta a twa-unu na aba hwɛɛ, ya namɛ ijitɛ itɛtu gba, nazhɛ atwa Isrɛl hwụjɛ maa a shɛ anya aba a na namɛ to gwumwongonu na aba.

¹⁷Gana na ta atwa Isrɛl kwuni tahaŋnụ ta aba, ya namɛ ijitɛ itɛtu gba, ee ci ashɛpwụ atwa ata. Aba shɛ Gibion, ni Kɛfira, ni Biɛrot, keeni Kiriat-jiarim.

¹⁸Ama atwa Isrɛl kwụnɛ shɛ aŋ ya o, iwɛnɛ te ehwurembe tu'ulwa ta ata go shilwonuo aŋ unu ni izeci ya AGWANGWAMA na shɛ Agwatana Isrɛl. Ibɛ po tu'ulwa ta ata hwɛ hwɛɛ tu ngwulengengeni ehwurembe.

¹⁹Ehwurembe ata hwɛɛ aba jishijɛ, ɛɛ hiɛŋ, Ti shilwonuo aŋ unu ni izeci ya AGWANGWAMA na shɛ Agwatana Isrɛl, ti eri shi kaa to tumongono aŋ ya o.

²⁰Iyi nɛ ɛti zhɛ ta nda aŋ na, ti zhɛ ta ganga aŋ maa a yɛ uraiŋ, iwɛ maa kede AGWANGWAMA njɛ isɛbwɛ no tu iwɛ unu na otu go shilwonuo aŋ o.

²¹Ibɛ po ehwurembe hiɛŋ aŋ, Ge e leneni aŋ maa a yɛ uraiŋ, ama tuba aba zhɛ a sha ya edweji i'wɛ'wɛ, na acɛjɛ meni iwɛ tu'ulwatagwụ tu ga hwɛ hwɛɛ, gana na te ehwurembe go mbiswo aŋ.

²²Ibɛ po go Joshua suyanɛ atwa ata Gibion, bɛɛ hiɛŋ aŋ, Iwembe po ehi ti helekeci, ɛhi hiɛŋ, Tɛ shɛ atwa ụdụlụ tebiye ne hiŋ, tobwolo kaa hiɛ namɛ ciiŋ ciiŋ no tuu?

²³Unu-tukalana ụ hiɛ 'imɛ hwuwayɛ go, iwɛ ijɛ ahiɛ njɛ. Hi zha shɛ hia bana ya na tijama ti i'wɛ'wɛ tudwajɛ keeni meni ticijɛ iwɛ umwono wa Agwatana mi o.

²⁴Nazhɛ ɛɛ jishijɛ Joshua, ɛɛ hiɛŋ, Iwɛnɛ te e mbishi miaụŋ mu ga bụ mu ugondu kpataa, maa AGWANGWAMA na shɛ Agwatana bụ, pwonuo yɛu ibwɛ ugondu go Moses unu maa bi zhɛ ma hi pana cɛnjɛ tu ga hwɛɛ, maa hi iricinji atwa na jɛjɛ na tuba hwɛɛ nu umbe hiŋ. Iwɛbɛ po atɛ njɛ inyɛsɛ hiŋ iwɛ araiŋ tu, ecilo go po atɛ njɛ iŋ ta.

²⁵Tu namɛ ya ni i'ɛlɛ bụ hwuwayɛ go, ɛtɛ njɛ gana elele na ubu kwụlanɛ kwo kaa nɛ teni cɛŋ ne eshe bu.

²⁶Gana go Joshua bicinji aŋ ni i'ɛlɛ ya atwa Isrɛl upo aa kwụnɛ shɛ aŋ ta.

²⁷Gụnụ ụjita ata go Joshua njɛ aŋ ajama i'wɛ'wɛ tudwajɛ keeni uwapa tɛzhagaga iwɛ tu'ulwatagwụ ta atwa Isrɛl hwɛɛ keeni iwɛ utukwu-ụrụpɛ wa AGWANGWAMA. A ta uranjɛ ba ugondu ata tɛnda taa hwayɛ no ofwo na AGWANGWAMA teri.