Read bassa 2 TIMOTI YEBI 3 Bible Online

2 TIMOTI YEBI 3 - bassa bible

2 TIMOTI YEBI 3

¹Ama mapa inɛ gɛ maa tụwụmangwụ ti zhɛ ta nama hwuŋ na aka ɛmɛwɛɛ.

²Atwa zhɛ no momo lubo, ɛɛ zhɛ no lubo ukwuribi, ɛɛ zhɛ na busa, ɛɛ zhɛ na nda unyanga, ɛɛ zhɛ no gbozhigo iyi, a zha shɛ na hwuga-unu wa atwa na meci aŋ o, a zha shɛ na nda ugwoje o, a zha shɛ a nama shɛshɛshɛ o,

³a zha shɛ a 'yaga okwo tulubo ta butugwumwa o, a zha shɛ na gangana anya aba iwɛ o, ɛ zhɛ na nda izeci ya anya aba ufwu, a zha shɛ mama 'yaga o, ɛ zhɛ na nda abwagara, ɛɛ zhɛ no imo iyi ibiye,

⁴ɛ zhɛ na sanga anya aba ne tidere, iwɛ zha shɛ na ta aŋ o, ɛ zhɛ na mama-sata nu unyanga tɛnda, ɛɛ zhɛ no lubo gi iyi nɛ ya kwulana aŋ, a ganga Agwatana tulubo;

⁵ɛ zhɛ na untangana ụsụbwa we eshe-tupatana Agwatana, ama ɛ zhɛ na tala ashamanjɛ ukpahiŋ ubwa. To tumo iwɛ atwa gana ata o.

⁶Atwa oko namba na ashashɛ atwa ga, a na o hombilo o tono no shimwono, a ima eyikwo na lagwụmanjɛ, aba shɛ eyikwo ata iwɛwɛ ya ngba, anaa na ukwedeyi ụwɛ gɛnɛgɛnɛ inzhɛnjɛ.

⁷Okwo to o soso iyi aka elele, ama e te eri shi kaa o to iwɛ-tɛkana ata tumapa o.

⁸Gana na tu ga Janes na Jambirɛs sukakanɛ la Moses, gobwonu du atwa ga a sukakana iwɛ-tɛkana. Shihaŋsa sha aba shi teni ụdamụ, e teni shi cɛŋ ne rishe-tɛtɛtana o.

⁹Ama a zha shɛ kaa a kaana ugombo, ụlagwụ wa aba kaa zhɛ wa bananɛ atwa kpaaŋ caakwụ, gana na tu una wa atwa ata eyebi banɛ la.

¹⁰Ama inɛɛ bɛ shɛ bu 'wawa imbisegeni mi tebiye, na masha mi mi, ni iyi nɛ namɛ na ahaŋsa mi, ne rishe ri mi tɛtɛtana, ni isɛbwɛ mi ti'ima, no tulubo ti mi, no tishikono ti mi ti tidimi,

¹¹na tɛshɛka ti mi tu ofwugwo, na abaụta mi. Ijɛ kpaaŋ ibɛ shɛ iyi nɛ i n vwutengeni na Antiok, ni Ikonium, nu Lustira. Ibɛ i shɛ tɛshɛka tu ufwugwo tu na Ngee le-egiri tuba; ama Agwangwama kaa n leshiji na tuba hwɛɛ.

¹²Iwɛ-tɛkana, atwa elele na yaa kwụlanɛ maa a shɛ masha mu na ma kwulana Agwatana na amɛ Krast Jisus, ɛ zhɛ a shɛka aŋ.

¹³Ama atwa awɛ keeni ehelekeci zhɛ na kaana tụwụmangwụ ni iyi iwɛ, ɛ zhɛ na inzhanga atwa, atwa du zhɛ na inzhanga aŋ.

¹⁴Ama gabụ, nama ni iyi nɛ ebi seshi, inɛɛ nɛ ahaŋsa bụ 'imɛ tebiye, gana na te ebi mepi atwa na ebi seshi no olugwo aba.

¹⁵Te kwuni taa na cɛnɛnɛ tụ bụ, ibɛ ebi mepi Ti'nyeci te Tijilo ti Iwɛ ya Agwatana, tu na ti eri ta bu pana ti'inta iwɛ ubino na dure rishe-tɛtɛtana ru na ru namɛ na amɛ Krast Jisus.

¹⁶Agwatana ubwa peni atwa n-ndumwa mu bwa me elele maa e 'nyeci mu, ibɛ po maa 'yajɛ ule maa e mbisegeni bụtụ, maa ɛ vwɛ bụtụ uvwi, maa a nanganganɛ bụtụ, keeni maa e vwuri bụtụ ni iyi tiririri,

¹⁷iwɛ maa ga bụtụ ba Agwatana ulwa, maa bu na 'yaga iyi elele nɛ zhɛ ya imanga bụ iwɛ ugondu ubiye we elele.