Read bassa 2 TIMOTI YEBI 4 Bible Online

2 TIMOTI YEBI 4 - bassa bible

2 TIMOTI YEBI 4

¹Ibɛ po Ama bu tɛtagana-unu tebiye ne eshe Agwatana keeni a na Agwangwama tu Jisus Krast, na zhɛ ba duma hwuŋ ụshɛrɛya wa atwa na ta hwungwa keeni atwa na uwo, te teni cɛŋ na tubanɛ tu bwa keeni Cɛnjɛ-ta-tugwama tu bwa.

²Na ananga iwɛ ɛtɛ; mama 'imɛ maa na nda iyi na aka na ebi beni ohwolu, ta aka na ebi beni shi ohwolu. Nɛ vwɛ uvwi, na tazhɛgana, na kaana ikɛnyi, ni isɛbwɛ-ti'ima hwɛɛ keeni iyi timbisogono.

³Iwɛnɛ po aka e ci ba ta atwa zhɛ na laka imbisegeni tugom, ama gana na tu ukwedeyi wa nda aŋ, ɛ zhɛ momo sutonono embisegeni, a na zhɛ a kwulana shɛcɛbɛ shɛ na sha gwapa aŋ.

⁴Ɛ zhɛ a ganga iwɛ-tɛkana, ɛɛ zhɛ a 'wa ashwa.

⁵Ama gabụ, nda ahaŋsa bu oko ni iyi elele, na la-egiri nụ ụbaụta tɛnda, na nda ugondu u bi'enenji, na untangana ugondu bɛnjɛ-bi-iyi maa ụrɛcɛnjɛ uŋ tebiye tebiye.

⁶Iwɛnɛ po a na ta ụrụpɛ ne mi cebe; aka mi ti'ishiga ci ya.

⁷N twawa ifelu ibiye, N gozhigwo usumwa mu tutu uce, Ngaa untwangwanua rishe-tɛtɛtana.

⁸Inɛɛ nɛ n vwanɛ ya hwuwayɛ i shɛ udara u tiririri na ee n shileni, unaa na Agwangwama na shɛ bɛjɛmɛ-bụ-ụshɛrɛya bi tishiriri, zhɛ ma m pana nụ Ụjita ata. Ama shɛ Ngooko kiri bɛɛ zhɛ ba pana uŋ o, bi zhɛ du ba pana atwa elele na lubi la tubanɛ tu bwa.

⁹Nda gana na ebi eri maa zhajɛ pi mi kakayɛ.

¹⁰Iwɛnɛ po Ge Dimas n genji, bee hwuri Tɛsɛlonika, iwɛnɛ ti bee lubi iyi unyizo ga u hwuwayɛ. Ge Kiriskɛns hwuri Galatia, ga Taitos hwuri Dalmatia.

¹¹Go Luk kiri ta namɛ ne mi. Shapɛ Mak te be ci, iwɛnɛ ti iyi ibwɛ tɛnda i n 'yaganɛ ule.

¹²Ama n tumwanɛ Taikikos utumwa maa ba zha Ɛfɛsɛs.

¹³Ebe ci suje tugwuno ta ata tu mpiala Ngɛɛ gɛnjɛ la nu Troas ni ihwɛ Kapos, keeni atakada, kede una ata u'waba ngwuri kwukwuŋ.

¹⁴Ga Alɛkizanda, na shɛ bụlụma bɛ ɛtumburɛ, bɛ n njɛ iyi iwɛ duwa. Agwangwama kiri zhɛ a tụpana bụ tụlụkpashɛ ti ijɛ ɛtɛ baa n njɛ.

¹⁵Gabụ ni ikɛnyi bụ du na nda pece na bụtụ ata, iwɛnɛ tu baa sukakanɛ iwɛ nɛ ata ananga tebiye.

¹⁶Aka na Ngee peni ajɛshɛgwa mi ehiiŋ, i zasa bụtụ namɛ ne mi o, ama atwa kpaaŋ e n jineci. Ma nda adua maa kede a rɛcɛ aŋ maa a tụpanɛ aŋ iyi nɛ aa njɛ o.

¹⁷Ama Agwangwama namɛ ne mi, bee m peni ukpahiŋ, iwɛ maa Ma ananga iwɛ ta ulwa, iwɛ maa atwa elele na shɛ shɛ Eju a hwụjɛ tedure ni i'enenji mi. Ibɛ po ee n leshiji nu unu bizeci.

¹⁸Agwangwama zhɛ ma n lashɛga kaa ni iyi iwɛ ye elele, bɛɛ zhɛ kaa mo bicingo maa mo tono Cɛnjɛ-ta-tugwama tu bwa ta azuba. Ga ụjɛrụma shɛ una ubwa tutu unyizo-nom. Ami.

¹⁹Walụ Prisika, na Akwila, keeni atwa ihwɛ Onisforos.

²⁰Gɛ Ɛrastos namɛ nu Korint, ama go Trofimos Ngɛɛ gɛnjɛ ni Militos, iwɛnɛ tu u'waba hwuwi shi bu.

²¹Nda gana na ebi eri maa zhajɛ nazhɛ ushwo shɛ. Ge Yibolos ma bu 'walụ, no Pudenes, ne Linos, na Klaudia, keeni miaụŋ-mo-bino hwɛɛ.

²²Ga Agwangwama tu Jisus Krast nama na mpiala mụ bụ. Go tulubo-ti-biye tu nama na bụ.